Read Hmar 1 CHANCHIN SUINA 26 Bible Online

1 CHANCHIN SUINA 26 - Hmar bible

1 CHANCHIN SUINA 26

¹Kawtkhâr vêngtuhai pâwl ṭhea chun: Kora mihai chu: Kore naupa Meselemia le Asaph naupasalhai laia mi chu.

²Meselemia chun naupasalhai a nei a, nâulutîr chu Zekaria, a pahnina Jediael, a pathumna Zebadia, a palina Jathniel;

³a pangana Elam, a parukna Jehohanan, a pasarina Eliehoenai.

⁴Chun, Obed-edom chun naupasalhai a nei a; nau lutîr chu Semaia a na, a pahnina chu Jehozabad, a pathumna chu Joa, a palina chu Sakar, a pangana chu Nethanel;

⁵a parukna chu Ammiel, a pasarina chu Issakar, a parietna chu Peullethai; Pathienin ama chu mal a sâwm si a.

⁶A naupa Semaia chun naupasalhai an pahnamhai chunga rorêltuhai chu an pieng a; anni chu mi hrât khawkhêng ruok an ni si a.

⁷Semaia naupasalhai chu: Othni le, Rephael le, Obed le, Elzabad, a unauhai chu mi hrât khawkhêng an nih; Elihu le Semakia hi.

⁸Hienghai po po hi Obed-edom naupasalhai thlahai chu an nih, anni le, an naupasalhai le an unauhai khawm mi hrât, rawngbâwlnaa thilthawtheitak ruok sâwmruk pahni, Obed-edom thlahai an nih.

⁹Chun, Meselemia khawmin unauhai le naupasal mi hrâttak, sâwmpariet a nei bawk a.

¹⁰Hosa, Merari thlaa mi khawm chun naupasalhai a nei a; a hotu tak chu Simri a nih (nau lutîr a ni nawh a chu a pa chun hotu takah a siem a nih),

¹¹a pahnina chu Hilkia, a pathumna chu Tebalia, a palina chu Zekaria; Hosa unauhai le naupasalhai po po chu an rêngin sâwmpathum an nih.

¹²LALPA ina rawngbâwl dinga, an unauhai anga chanpuol nei ve, hotu takhai, kawtkhâr vêngtuhai pâwl chu hienghai hi an nih.

¹³Dai kawtkhâr tina ding chun, an pahnam dungzui peiin, a chîn le lien ni leh ṭhum an vâwr pei a.

¹⁴Chun, saktieng panga dinga ṭhumvâwr chu Selemia chungah a tla a. A naupa Zekaria, remruottu vartak ta ding chun ṭhum an vâwr a; a ṭhumvâwrna chu hmârtieng pang dingin a tla a.

¹⁵Obed-edom ta ding chun simtieng pang a tla a, a naupasalhai ta dingin, thil siekhâwmna in chu a tla a.

¹⁶Suppim le Hosa ta ding chun thlangtieng pang a tla a, Salleketh dai kawtkhâra inthawka intlar peia lam fe peia khan.

¹⁷Saktieng panga chun Levi mi paruk an na, hmârtieng ni khatah pali, simtieng ni khatah pali, chun, thil siekhâwmna in ta dingin, pahni peiin.

¹⁸Thlangtieng panga Parbar[8] ta dingin a lampuiah pali, a Parbar hmunah pahni.

¹⁹Hienghai hi Kora mihai le Merari naupasalhai laia kawtkhâr vêngna sin an insem dân chu a nih.

²⁰Chun, Levi mihaia chun, Ahija chu Pathien ina rohai chunga le, thil inhlân tahaia rohai ta dinga enkawltu a nih,

²¹Ladan naupasalhai: Ladana inthawka Gerson thlahai, Gerson mi Ladan kuoma ṭhang pahnamhai luhai chu: Jehieli.

²²Jehieli naupasalhai chu: Zetham, a unaupa Joel leh, LALPA in ro siena in chunga hotu an nih.

²³Amram mihai, Izhar mihai, Hebron mihai, le Uzziel mihai khawm chu sin pêk an nih.

²⁴Mosie naupa, Gersom naupa Sebuel chu sum siekhâwmna chunga rorêltu a nih.

²⁵A unauhai: Eliezer naupa Rehabia, a naupa Jesaia, a naupa Joram, a naupa Zikri le a naupa Selomoth hai an nih.

²⁶Hi Selomoth le a unauhai chu, thilinhlân, lal David le pahnam luhai le, sâng khat chunga hotuhai le za khat chunga sipai hotuhaiin an inhlânhai po po siekhâwmnahai chunga enkawltuhai an nih.

²⁷Indonahai hnênahaia râllâk thilhai chu LALPA in siemṭhatna ding chun an pêk a.

²⁸Chuong zâwlnei Samuel hai, Kis naupa Saula hai, Nera naupa Abner hai, Zeruia naupa Joab haiin an hlânthienghai le, mi tukhawma thil an hung pêkhai chu Selomoth le a unauhai kuta chun a um vawng a.

²⁹Izhar mihaia chun, Kenania le a naupasalhai chu Israel ram ta dinga puotienga sinthawnahaia hotuhai le rorêltuhai an nih.

³⁰Hebron mihaia chun, Hasabia le a unauhai chu, mi huoisen ṭhieu, sâng khat le za sari chu Jordan râl, thlangtienga Israel rama lal ta dinga rawngbâwlnaahai le, LALPA sinthawnahai po po chunga enkawltuhai an nih.

³¹Hebron mihaia chun, Jerija pahnam inthla dân anga Hebron mi chu a hotu a nih. David rorêl a kum sâwmlinaa chun nasataka zawng an na, Gileada Jazera chun mi hrât khawkhêng anni laia chun hmu suok an na.

³²Chun, a unau mi hrât khawkhênghai chu sâng hni le za sari an na; anni chu lal David chun an pahnam luhai chu, lal chungthua le Pathien thil chungthu tinrêngah Reuben mihai, Gad mihai le Manasse hnam zâtvehai enkawltuhaia a siem an nih.