Read Hmar 1 CHANCHIN SUINA 29 Bible Online

1 CHANCHIN SUINA 29 - Hmar bible

1 CHANCHIN SUINA 29

¹Chun, lal David chun mipui inkhâwmhai po po kuoma chun, “Ka naupa Solomon Pathienin ama ngei a hung thlang hi, a la naupangin a la dâwng a, sin hlak chu a nasa hle a; a in chu mihriem ta ding ni lovin, LALPA Pathien ta ding a ni si a.

²Tuhin, ka Pathien in ta ding chun ka thei ang tâwp po po chu ka lo buotsai ta a; rângkachak thilhai dinga chun rângkachak, tangkaruo thilhai dinga chun tangkaruo, dârsen thilhai dinga chun dârsen dâm, thîr thilhai dinga chun thîr dâm, thing thilhai dinga chun thing dâm, berul lunghai, lung inbûk dinghai, lung a phûma phûm dinghai le, ze tum tum dinghai dâm, lunghlu chi tinrênghai le sailungvâr chihai leh; tam tâwk takin.

³Chu nawa khawm chun, ka Pathien in dinga ditsakna tak ka nei leiin, rângkachak le tangkaruohai keima ta ngei siekhawl ka nei ti ka hmu chun, chu in inthieng ta dinga ka buotsaihai po po bâka chun, ka Pathien in ta ding chun ka pêk sa bawk a;

⁴chu chu rângkachak talent sâng thum, Ophir rângkachak chu; tangkaruo inthieng, a in bang chu sûngtienga zûtna dingin talent sâng sari: rângkachak thilhaia dingin rângkachak,

⁵tangkaruo thilhaia dingin tangkaruo, themthiemhai kuta siem dinga sin iengkima dinga hmang ding po pohai chu. LALPA kuomah vawisûn hin tu am inpumpêk dingin inphaltakin inhlân a ta?” a ta.

⁶Chun, pahnam laia hotuhai le, Israel hnam laia hotuhai le, za khat le sâng khat pâwl chunga hotuhai leh, lal sin chunga rorêltuhai le chun phaltakin an inpêk ta a.

⁷Chuongchun, Pathien in rawngbâwlna ding chun rângkachak talent sâng nga le, darik sîng khat le, tangkaruo talent sîng khat le dârsen talent sîng khat le, sâng riet le, thîr talent nuoi khat an pêk a.

⁸Chun, lunghlu lo neituhai chun LALPA in ro ina dingin Gerson mi Jehiel kuta chun an pêk bawk a.

⁹Chun, mipuihai chu phaltaka an inhlân lei chun an hlim a, lungril tluongtaka LALPA kuoma an inhlân lei chun; chun, lal David ngei khawm chu namênin a lâwm naw a.

¹⁰Chuleichun, David chun mipui inkhâwmhai po po hmaa chun LALPA chu ân pâk a; David chun a hril a, “Aw LALPA, kan thlatu Israel Pathien, chatuon chatuonin nang chu inpâkin um la;

¹¹Aw LALPA, ropuina dâm, thilthawtheina dâm, chawimawina dâm, hnena dâm, inlalna dâm i ta an na; hnuoi le vâna um po pohai chu i ta an ni vawng si a; Aw LALPA, lalram chu nangma ta a na, mi po po chungah nang chu lu anga chawimawiin i um hi.

¹²Hausaknahai le inzakainahai chu nangmaa inthawka hung suok a na, nang chun mi po po chungah ro i rêl a; nangma kuta chun thilthawtheina le hrâtna chu a um a; chun, i kuta chun mi tin kuoma hrâtna pêkna ding le sukropuina ding chu a um a.

¹³Chuleiin, tuhin, kan Pathien, i hming ropui chu kan inpâkin, lâwmthu kan hril che.

¹⁴Hieng anga inhâwktaka inhlân theina che kan hung nei hi, kei hi tu am ka na, ka mihai khawm hi tuhai am an na? thil po po chu nangmaa inthawka suok a na, nangma ta ma ma chu kan pêk el che a ni si a.

¹⁵Kan thlatuhai po po ang bawk khan i hmaa hin pêm le mikhuol el kan ni si a; hi hnuoia hin kan nihai chu hlîm ang el a na; tukhawm um sawng hrim khawm an um nawh.

¹⁶Aw LALPA kan Pathien, i hming inthieng ta dinga in bâwlna dinga hieng kan buotsaihai po po siekhâwm hi nangmaa inthawka hung a na, nangma ta ruok a nih.

¹⁷Ka Pathien, nang chun lungril chu i fie hlak a, felnaa chun lâwmna i nei ti khawm ka hriet a. Keia ngai chun, keia lungril tluongtakin hieng thilhai po po hi ka lo inhlân ta a; tuhin, i mihai hitaka umhai hin phaltaka i kuoma inhlân dingin anni chu hlimtakin ka hmu a nih.

¹⁸Aw LALPA, kan thlatuhai Abraham hai, Isak hai, Israel hai Pathien, i mihai lungril ngaituonahai hi kumkhuoa dinga kawl zing dingin; an lungril chu nangmaa chun sukdet rawh;

¹⁹ka naupa Solomon kuoma khawm, i thupêkhai le, i thu inhriettirhai le, i thuruothai chu zâwm dingin le, hieng thilhai po po hi thaw a, a châkkhai ka lo sielâwk tahai chun lalin bâwl dingin lungril ṭha famkim pe bawk rawh,” a ta.

²⁰Chun, David chun, mipui inkhâwmhai po po kuoma chun, “Tuhin LALPA in Pathien chu inpâk ro,” a ta. Chuongchun, mipui inkhâwmhai po po chun LALPA an thlatuhai Pathien chu an inpâk a, an luhai an kûn a, lal le LALPA chu chibai an bûk ta a.

²¹Chun, LALPA kuoma chun, inthâwinahaiin a zînga chun an inthâwi ta a; LALPA kuoma chun pumrawhmang thilinhlânhai chu an inhlân a; bâwngchal sâng khat, berâmchal sâng khat, berâmte sâng khat, dâwn mi thilinhlânhai leh, Israel mi po po ta dingin tam tâwk zeta inthâwinahai chu an inhlân a;

²²chu ni chun hlimna nasatak leh LALPA hmaa chun an dâwnin an fâk ta a. Chun, David naupa Solomon chu a ṭum hninaa chun lal dingin an siem nâwk ta a, ama chu hotu ni dingin le Zadok chu thiempu dingin LALPA hmaa chun hriek an nâl ta a.

²³Solomon chu a pa David ai awin LALPA lalṭhungphaa chun lalah a ṭhung ta a; ama chu a hung butlingin, Israel mi po pohai chun a thu an awi ta a.

²⁴Chun, lalhai po po le, mi thilthawtheitakhai le a naupasalhai po po chu David naupasalhai ang tak khan lal Solomon kuoma chun an intuklût vawng tâwl a.

²⁵Chuongchun, LALPA chun Solomon chu Israel mihai po po mithmua chun nasatakin a chawimawi a; Israel rama ama hmaa lal tukhawm chunga um ngai lo, lal inlalna chu ama chunga chun a pêk a.

²⁶Chuongchun, Jesai naupa David chun Israel ram po po chunga chun ro a rêl a.

²⁷Israel chunga ro a rêl sûng chu kum sâwmli a nih; Hebrona khan kum sari ro a rêl a, Jerusalema khan kum sâwmthum le kum thum a rêl a.

²⁸Ama chu upatakin, tarkûnin, hausatak le inzaumtakin a thi ta a; chuongchun, a naupa Solomon chun ama aia chun ro a rêl ta a.

²⁹Chuongchun, lal David thilthawhai, a hmasa le a nuhnung khawm, zâwlnei Samuel chanchinbua chun ziekin a um a, zâwlnei Nathan chanchinbua le, zâwlnei Gad chanchinbua khawm chun ziek a nih;

³⁰rambunghaia lalramhai po po chunga le, Israelhai chunga le ama chunga hun lo liem tahai le, a thilthawtheizie le a rorêlhai po po chu chuonghaia chun ziek an nih.