Read Hmar 1 CHANCHIN SUINA 5 Bible Online

1 CHANCHIN SUINA 5 - Hmar bible

1 CHANCHIN SUINA 5

¹Israel nau lutîr Reuben naupasalhai chu (ama chu nau lutîr a na, nisienlakhawm, a pa khum chu a sukpawrche leiin a nau lutîr nina chu Israel naupa Josef naupasalhai kuoma chun pêk a ni tah a; chuleiin, a thlatu thu bul chu inthla dân pângngai anga ngai a ni ta naw a.

²Juda chu a unauhai nêk chun a chunghnung lem a, chuongchun, amaa chun lalnau nina chu pêk a na, amiruokchu, rohluotu nina chu Josef ta a nih).

³Israel nau lutîr Reuben naupasalhai chu: Hanok, Pallu, Hezron le Karmi an nih.

⁴Joel naupasalhai chu: a naupa, Semaia; ama naupa chu Gog, ama naupa chu Simei,

⁵ama naupa chu Mika, ama naupa chu Reaia, ama naupa chu Baal;

⁶ama naupa chu Beera, Assuria lal Tiglath-pileserin sala a ṭhuoihmang chu a nih, ama chu Reuben thlahai lal a nih.

⁷Chun, an pahnama a unauhai an thlahai an inthla thu lâk a ni lai chun lal chu:Jeiel le Zekaria le

⁸Bela, Azaz naupa, ama chu Sema naupa, ama chu Joel naupa, Aroera inthawka Baal-meon le Nebo chen raka umhai chu an nih;

⁹chun, Gilead rama chun an ran ruolhai chu an pung hle ta leiin vadungpui Euphratesa inthawka saktieng thlalêr lûtna chen khan an hluo ta a.

¹⁰Saula dam laiin Hagar mihai leh an indo a, anni chu an hne a; chuongchun, Gilead sak ram po poah an puon inhai chu an zar ta a.

¹¹Chun, Gad mihai chu anni epin Basan ramah, Saleka chen khan an um ve thung a;

¹²a lutak chu Joel, a pahnina Sapham le Janai le Saphat an nih Basana chun,

¹³chun, an pahnamhai chu, an sûngkuo ang dungzuiin hieng hi an nih: Mikael hai, Mesullam hai, Seba hai, Jorai hai, Jakan, Zia le Eber, pasari hi an nih.

¹⁴Hienghai hi Huri naupa, Abihail naupasalhai chu an nih: ama chu Jaroa naupa, ama chu Gilead naupa, ama chu Mikael naupa, ama chu Jesisai naupa, ama chu Jahdo naupa, ama chu Buz naupa;

¹⁵Guni naupa Abdiel naupa Ahi chu a nih, an pahnama hotu chu.

¹⁶Anni chu Basan rama Gileada le a khawpuihaia le Saron khawpuihaiah, an ramri chenin an um a.

¹⁷Hienghai po po hi Juda lal Jotham inlal lai le Israel lal Jeroboam inlal laia inthla thu suinaa ziek an nih.

¹⁸Reuben mihai le Gad mihai le Manasse hnam zâtve, mi huoisen phaw le thal chawi thei, thalngula kâp theia indonaa fe thei ṭhieu le indo thiem mi chu sîng li sâng li za sari le sâwmruk an nih.

¹⁹Anni chu Nodab hai, Naphis hai, Jetur hai le Hagar mihai leh an indo a.

²⁰Anni chunga chun ṭhangpuiin an uma, Hagar mihai chu an kuta pêkin an um ta a; anni le um po pohai le chun; indonaa chun Pathien chu an ko a, ama chun anni chu a dawn a, anni chun amaa chun ringna an innghat si a.

²¹An ran ruolhai chu an lâk a, sanghâwngsei sîng nga, berâm nuoi hni le sîng nga, sabengtung sâng hni, mihriem nuoi khat leh.

²²Mi tamtak chu thatin an um a, indona chu Pathien ta a ni si a. Chun, anni chu an aia chun sala ṭhuoi anni hma po chun an um ta a.

²³Chun, Manasse hnam zâtve thlahai chu chu rama chun an um a; anni chu Basana inthawkin Hermon tlâng le Senir le Baal-hermon chenin an insuklien a.

²⁴Chun, hienghai hi an pahnam luhai chu an nih: Epher, Isi, Eliel, Azriel, Jeremia, Hodavia le Jahdiel hi; anni hi mi hrât khawkhêng, mi hming inthang, an pahnama luhai chu an nih.

²⁵Chun, an thlatuhai Pathien chunga chun an bawsiet ta a; an hmaa Pathienin a sukbohmanghai, chu rama mihai pathienhai chu bein an zâwm a.

²⁶Chuongchun, Israel Pathien chun Assuria lal Pul lungril le Assuria lal Tiglath-pileser lungril chu a chawktho a, Reuben mihai, Gad mihai, Manasse hnam zâtve le chun a man a, Halah, Habor, Hara le Gozan vadung chenin vawisûn ni chen hin a hung ṭhuoi ta a.