Read Hmar 1 CHANCHIN SUINA 9 Bible Online

1 CHANCHIN SUINA 9 - Hmar bible

1 CHANCHIN SUINA 9

¹Chuongchun, Israel mihai po po chu thla insui dâna tiem vawng an na, Israel lal lekhabua chun ziek an nih: Judahai ruok chu an bawsietna leiin Babulona sala ṭhuoihmangin an um a.

²Chun, an hmun nei an khawpuihaia um hmasatakhai chu Israelhai, thiempuhai, Levi mihai, Nethinim mihai hi an nih.

³Chun, Jerusalema chun Juda thlahai, Benjamin thlahai le Manasse le Ephraim thlahai chu an um a;

⁴Uthai, Ammihud naupa, Omri naupa, Imri naupa, Bani naupa a na; Juda naupa Perez thlahai an nih.

⁵Chun, Silon mi chu a nau lutîr Assaia le a naupasalhai leh.

⁶Zera naupasalhai chu: Jeuel, an unauhai leh za ruk le sâwmkuo.

⁷Chun, Benjamin naupasalhai chu: Sallu, Mesullam naupa, Hodavia naupa, Hassenua naupa;

⁸Jeroham naupa Ibneia le Uzzi naupa Ela, Mikri naupa le Sephatia naupa Mesullam, Reuel naupa, Ibnija naupa;

⁹an unauhai leh an thla thu sui dân angin za kuo sâwmnga paruk an nih. Hienghai po po hi an pahnam ang peia an pahnam luhai an nih.

¹⁰Chun, thiempuhaia chun: Jedaia, Jehoiarib, Jakin,

¹¹Azaria, Hilkia naupa, Mesullam naupa, Zadok naupa, Meraioth naupa, Ahitub Pathien ina rorêltu naupa a nih:

¹²Jeroham naupa Adaia, Pashur naupa, Malkija naupa, Adiel naupa Maasai leh, Jahzera naupa, Mesullam naupa, Mesillemith naupa, Immer naupa;

¹³an unauhai leh an pahnama luhai chu sâng khat za sari le sâwmruk an nih; Pathien ina rawngbâwlna sina dinga mi theitak ruok an nih.

¹⁴Levi mihaia chun: Hassub naupa Semaia, Azrikam naupa, Hasabia naupa; Merari naupa hai an nih.

¹⁵Bakbakkar, Heres, Galal le Mattania, Mika naupa, Zikri naupa, Asaph naupa,

¹⁶Semaia naupa Obadia, Galal naupa, Jeduthun naupa, Asa naupa Berekia, Elkana naupa, Netophath mihai khuohaia umhai chu.

¹⁷Chun, kawtkhâr vêngtuhai chu: Sallum, Akkub, Talmon, Ahiman le an unauhai leh; Sallum chu a hotutak a na,

¹⁸saktieng panga lal kawtkhâr chu a vêng a; Levi thlahai rabawk vêngtuhai an nih.

¹⁹Chun, Kore naupa Sallum, Ebiasaph naupa, Kora naupa, a unauhai leh, an pahnama mi, Kora mihai chu, rawngbâwlna enkawltuhai chu an na, biekbûk kawtkhâr vêngtuhai an nih: an thlatuhai khawm chu LALPA rabawk vêngtuhai, a lûtna vêngtuhai chu an nih.

²⁰Kha hma po khan Eleazar naupa Phinehas chu an chunga rorêltu a na, a kuoma chun LALPA chu a um a.

²¹Chun, Meselemia naupa Zekaria chu intuokna puon in kawtkhâr vêngtu a na.

²²Chun, hienghai po po dai kawtkhâra vêngtuhai ni dinga thlanghai po po chu za hni le sâwm pahni an nih. Hienghai hi an khuohaia an thla thu suidân ang peia tiem an na, David le zâwlnei Samuelin an rawngbâwlna ruot ang peia an lo namdethai chu an nih.

²³Chuongchun, anni le an thlahai chenin biekbûk in, LALPA in enkawlna sin chu an chang a.

²⁴A sîr lia chun vêngtuhai chu an um a, saktieng, thlangtieng, hmârtieng le simtiengah.

²⁵Chun, an unauhai, an khuoa umhai chu, ni sari sûng peiah rawngbâwla anni le um dingin a châng chângin an hung hlak ding a na;

²⁶Levi mi, kawtkhâr vêngtu hotutak hai pali chu rawngbâwlna ruota chun an um a na, Pathien ina ro in le, pindanhai chu an enkawl a nih,

²⁷chun, zîng tin tina chu chu hawng chu an sin a na, chu enkawl chu an mawphurna a ni leiin Pathien in vêla chun an riek hlak a.

²⁸Chun, anni laia ṭhenkhat chu rawngbâwlna bûr-le-bêlhai chunga enkawltu an na; a ni zât tiema la suok a, a ni zât tiema sie lût hlak ding an ni si a.

²⁹Mi ṭhenkhat chu thuomhnawhai, hmun inthiengtaka bûr le bêlhai po po chunga dâm, beiphit indi chunga dâm, uoin dâm, hriek dâm, riminhnik dâm, beraw dâm, enkawl dinga ruot an nih.

³⁰Chun, thiempuhai naupasal ṭhenkhathai chun riminhnik chawkpawl chu an buotsai a.

³¹Levi mi pakhat, Kora chi Sallum nau lutîr Mattithia chu thlêngdâra thil zêuhai tienga enkawlna sin nei a na.

³²An unau ṭhenkhathai, Kohath mihai thlahai chu entirna bei chunga sin nei, châwlni tina buotsaituhai chu an nih.

³³Chun, hienghai hi hlasaktuhai, Levi sûngkuo pahnama luhai, pindana um zinga sin danga châng ve lohai chu; an sina chun a sûn a zâna ruoi an ni si a.

³⁴Hienghai hi Levi sûngkuo pahnama an thla po poa luhai, mi thei pâwl, Jerusalema umhai chu an nih.

³⁵Gibeona chun Gibeon hai thlatu, Jeiel chu a um a, a nuhmei hming chu Maaka a nih,

³⁶a nau lutirtak chu Abdon a na. Zur, Kis, Baal, Nera, Nadab,

³⁷Gedor, Ahio, Zekariah le Mikloth leh,

³⁸Chun, Mikloth chun Simeam a nei a. Anni khawm chu an unauhai hnaiah Jerusalema chun an chêng ve a.

³⁹Nera chun Kis chu a nei a, Kis chun Saula a nei a; Saula chun Jonathan, Malkisua, Abinadab le Esbaal a nei a.

⁴⁰Chun, Jonathan naupa chu Merib-baal a na; Merib-baal chun Mika a nei a.

⁴¹Mika naupasalhai chu: Pithon, Melek, Tahrea le Ahaz an nih.

⁴²Ahaz chun Jara a nei a, Jara chun Alemeth a nei a, Azmaveth le Zimri leh. Zimri chun Moza a nei a,

⁴³Moza chun Binea a nei a; ama naupa chu Rephaia, ama naupa chu Eleasa, ama naupa chu Azel;

⁴⁴chun, Azel chun naupasal paruk a nei a, an hming chu hieng hi an nih: Azrikam, Bokeru, Ismael, Searia, Obadia le Hanan; hienghai hi Azel naupasalhai chu an nih.