Read Hmar 2 CHANCHIN SUINA 1 Bible Online

2 CHANCHIN SUINA 1 - Hmar bible

2 CHANCHIN SUINA 1

¹Chun, David naupa Solomon chu a rama chun sukdet a ni ta a, LALPA a Pathien chu a kuomah a um a, ama chu nasatakin a chawimawi a.

²Solomon chun, Israel mi po pohai le, sipai za khat pâwl le sâng khat pâwl hotuhai kuoma le, rorêltuhai kuoma le, Israel rama lalhai po po kuoma le, pahnam luhai kuoma chun thu a hril a.

³Chuongchun, Solomon le a kuoma mipui inkhâwmhai po po chu Gibeona bâwlhmuna chun an hang fe ta a; LALPA siehlaw Mosien thlalêra Pathien ta dinga intuokna in a siem chu chutaka chun a um si a.

⁴Nisienlakhawm, Pathien bâwm chu David chun Kiriath-jearima inthawk khan a hung lâk a, Davidin a siena dinga a buotsai hmuna khan a lo sie ta a; Jerusalema khan, chu hmun ding chun puon in a lo zâr ta si a.

⁵Chunawa khawm, dârsen mâichâm Hur naupa, Uri naupa Bezalelin a lo siem ta chu LALPA biekbûk hmaa chun a um bawk a; Solomon le mipui chun an va pan a.

⁶Chun, Solomon chu LALPA hmaa dârsen maichâm intuokna ina uma chun a hang fe a, a chunga chun pumrawhmang thilinhlân sâng khat lai ân hlân a.

⁷Chu zân chun Solomon kuomah LALPA chu a hung inlâr a, a kuomah, “Ieng am a na ka pêk ding che, mi hni rawh,” a ta.

⁸Solomon chun Pathien kuoma chun, “Ka pa David kuoma chun lunginsietna nasatak i lo inentir ta a, ama aia chun tuhin lalah i mi siem ta a.

⁹Tuhin, Aw LALPA Pathien, ka pa David kuoma i thutiem chu sukpuitling ni raw se; tam tienga hnuoia pilvut zât rau ang mipui chunga hin lalah i mi siem ta si a.

¹⁰Hi mipuihai hmaa hin ka lûta ka suok theina dingin tuhin varna le hrietthiem theina nangin mi pe la; chuong naw chun, hi i mihai hieng zât lâwm lâwm hi tuin am ro rêlpêk thei an ta?” a ta.

¹¹Pathien chun Solomon kuomah, “Hi hi i lungrilah a um a, hausaknahai, neinungnahai le inzaumnahai amanih, nangma theidatuhai che hringna amanih, i hni naw a, dam sâwtna khawm i hni bawk naw a, amiruokchu, ka mihai, an chunga lala ka siemnahai che chu ro i rêlpêk theina dinga nangma ta dinga varna le hrietthiem theina i hni lem leiin;

¹²varna le hrietthiem theina chu i kuoma pêk a ni ta a; i hmaa lalhai tukhawma an nei dêr lo le, nangma hnunga tukhawma chuong anga an nei dêr lo ding hausaknahai le, neinungnahai le, inzâkaina pêng ka ti che,” a ta.

¹³Chuongchun, Solomon chu a vân zinna Gibeona bâwlhmun, intuokna puon in hmaa inthawk chun Jerusalema chun a hung ta a; chuongchun, Israel chunga chun ro a rêl ta a.

¹⁴Chun, Solomon chun sakawr tawlailîrhai le sakawr chung chuong mihai chu a kei khâwm a, sakawr tawlailîr sâng khat le za li le, sakawr chung chuong mi sîng khat le sâng hni a nei a; chuong chu sakawr tawlailîr khawpuiahai le lal kuomah Jerusalema chun a sie a.

¹⁵Chun, lal chun tangka le rângkachak chu Jerusalema chun lung ang el le, Sidar thing chu phai rama theichang kûng ang ela tama intiengin a sie a.

¹⁶Chun, Solomonin sakawr a neihai chu Aigupta rama inthawka inchâwk suok vawng an nih; lal sumdâwng mihai chun a ruol ruolin an lo khâr hlak a, a ruola inchâwk pei a nih;

¹⁷chuongchun, an hung lâk a, Aiguptaa inthawkin sakawr tawlailîr chu tangkaruo shekel za ruk peiin an intlungtir bawk a; chun, sakawrhai chu Hit mi lalhai le Suria lalhai ta ding khawmin an suktlungpêk hlak a; sakawrhai chu tangkaruo shekel za le sâwmnga peiin an intlungtir a nih.