Read Hmar 2 CHANCHIN SUINA 10 Bible Online

2 CHANCHIN SUINA 10 - Hmar bible

2 CHANCHIN SUINA 10

¹Rehoboam chu Sekema chun a fe a; Israelhai po po chu ama chu lala siem dingin Sekema chun an hung si a.

²Chun, Nebat naupa Jeroboam chun chu chu a lo hriet chun, (Solomon hmaa inthawka a tlânhmangna Aigupta rama chun a la um a ni si a.) Jeroboam chu Aigupta rama inthawk chun a hung kîr ta a.

³Chun, mi an tir a, ama chu an ko ta a; chuongchun, Jeroboam le Israelhai po po chu an hung a, Rehoboam kuoma chun an hril a,

⁴“I pa khan kan rîngkawl chu riktakin a lo siem ta a; chuleiin, tuhin i pa rawngbâwlna riktak le, kan chunga rîngkawl rik ân nghat hi mi sukzâng pêk la, chuongchun, i rawngbâwl kan tih,” an ta.

⁵Anni kuoma chun, “Ni thum hnungah ka kuomah hung nâwk ro,” a lo ti a, chuongchun, mipui chu an fe ta a.

⁶Chun, Rehoboam chun mi upahai, a pa Solomon damlaia a hmaa ngîr hlakhai chu, “Hi mipuihai hi dawn kirna dingin ieng thurâwn am in mi pêk a,” tiin, a râwn a.

⁷Anni chun a kuomah, “Hi mipui chunga hin za i ngai a, anni hi i suklungawi a, an kuomah thu ṭha i hril chun kumkhuoin i siehlawhai nîng an tih,” an ta.

⁸Nisienlakhawm, upahai thurâwn ama an pêk ta chu a nghatsan a, ama hmaa ngîr hlak, ama ruolpuihai tlangvâlhai chu a rawn ta a.

⁹An kuoma chun, “Hieng mipui, ‘I pain kan chunga rîngkawl a innghat hi mi sukzângpêk rawh,’ tituhai hi ieng dawnna am ei inkîr thei ding ieng am thurâwn in nei a?” a ta.

¹⁰Tlangvâlhai, ama ruolpuihai chun an hril a, a kuomah, “ ‘I pain kan rîngkawl a sukrik êm a, nangin keini mi sukzângpêk rawh,’ i kuoma tituhai mipui kuoma chun hieng ang hin ti la, hieng ang hin an kuoma chun hril rawh, ‘Ka kutte chu ka pa kâwngbâwr nêkin a lien lem a.

¹¹Tuhin ka pain rîngkawl rik a lo inphurtir ta cheu a; kei chun in rîngkawl chu belsâng ka tih; ka pain vuoknain a lo hrem cheu a ni chun, kei chun ainuvêtin hrem ka ti cheu,’ tiin,” an ti a.

¹²Chuongchun, Jeroboam le mipuihai po po chu ni thum ni chun lalin, Ni thum niah ka kuomah hung nâwk ro, tia a lo inthla ang khan a kuomah an hung ta a.

¹³Lal chun vîntakin a lo dawn a; lal Rehoboam chun mi upahai thurâwn chu a nghatsan a,

¹⁴tlangvâlhai thurâwn angin, “Ka pa chun in rîngkawl chu a lo sukrik hle ta a, keiin chu chu belsâng ka ta; ka pain vuoknain a lo hrem cheu a ni chun, kei chun chu ainuvêtin hrem ka ti cheu,” tiin a lo hril a.

¹⁵Chuongchun, lal chun mipuihai thu chu a ngai naw a; Silon mi Ahija hmanga Nebat naupa Jeroboam kuoma a thu lo hril tah, a thu chu LALPAIN ân tlungtir theina dingin, Pathienin a hung intlungtir a ni si a.

¹⁶Chuonga Israel po po chun lal chun an thu a ngai nawh ti an hriet chun mipuihai chun an dawn a, “David a hin chanvo ieng am ei nei hrim luo a? Jesai naupaa hin rochan ieng khawm ei nei bawk nawh; mi tin mâni puon in sengah fe ro, Aw Israelhai: David, tuhin nangma insûng ngei chu inngaituo ta,” tiin.

¹⁷Chuongchun, Israelhai po po chu an puon inhaia chun an ṭin tâwl ta a. Amiruokchu, Judai ram khawpuihaia umhai Israel mipuihai chunga khan chu Rehoboam chun ro a rêl zing a.

¹⁸Chun, lal Rehoboam chun Hado- ram, leiman hotu chu a tir a, Israel mipuihai chun ama chu lungin an lo dêng a, a thi ta a. Chun, lal Rehoboam chu a sakawr tawlailîrah a chuong a, inhmâwtakin Jerusalemah a tlânse ta a.

¹⁹Chuongchun, Israel sûngkuo chu David sûngkuo chunga chun, vawisûn ni chen hin an hel ta a.