Read Hmar 2 CHANCHIN SUINA 11 Bible Online

2 CHANCHIN SUINA 11 - Hmar bible

2 CHANCHIN SUINA 11

¹Rehoboam chu Jerusalem a hung tlung chun Benjamin le Juda sûngkuo, nuoi khat le sîng riet, thlang ṭhieu, Israelhai do dinga indo mi, Rehoboam ta dinga ram chu hung la kîr nâwk dingin a ko khâwm tawl a.

²Nisienlakhawm, Pathien mi Semaia kuoma chun LALPA thu chu a hung tlung a,

³“Judai ram lal Solomon naupa Rehoboam le, Judai rama Benjamin mihai le Israel mi po pohai kuoma chun thu hril la,

⁴LALPAIN hieng hin a tih ti rawh, ‘Hang fe nâwng in ta, in unauhai chu indopui bawk nâwng in tih: mi tin chu mâni in sengah kîr nâwk el ro: hi thil hi keima thaw a ni si a,’ tiin, ” a ta. Chuongchun, LALPA thu chu an zâwm a, Jeroboam hang do tumnaa inthawk chun an kîr ta a.

⁵Rehoboam chu Jerusalema chun a um a, Judai rama inhumhimna dingin khawpuihai a bâwl a.

⁶Bethlehem dâm, Etam dâm, Tekoa dâm,

⁷Beth-zur dâm, Soko dâm, Adullam dâm,

⁸Gath dâm, Maresah dâm, Ziph dâm,

⁹Adoraim dâm, Lakis dâm, Azeka dâm,

¹⁰Zora dâm, Aijalon dâm, Hebron dâm, chuong chu Judai rama umhai le, Benjamin rama khawpui kul neihai a nih.

¹¹Chun, kul dettakhai chu a sukdet nâwk zuol a, chuonga chun hotuhai a sie a, fâk ding le hriek le uoin dâm ân khâwl bawk a.

¹²Khaw tin hmun tamtaka chun feihai, phâwhai a sie a, nasatakin a sukhrât a. Judai hnam le Benjamin hnam chu ama tieng an ṭhang a.

¹³Levi mihai le thiempuhai chu an umna sûnga inthawk chun ama kuomah Israel ram sûng po poa chun an hung pakai a.

¹⁴Levi mihai chun an ram le an khuohai chu an mâksan a, Jerusalem le Judai rama chun an hung a; Jeroboam le a naupasalhai chun anni chu LALPA ta dinga thiempu sinhai chu thaw lo dingin an hnawt suok si a,

¹⁵chuongchun, ama siem bâwngtêhai, kêlchalhai le bâwlhmunhaia ding chun thiempuhai a ruot fâwm ta a.

¹⁶Chun, an hnunga khawm chun, Israel hnamhai lai po poa mi, Israel Pathien LALPA chu lungrila zawngtuhai chun an zui a; an thlatuhai Pathien LALPA kuoma inthâwi ding chun Jerusalemah an hung hlak a.

¹⁷Chuongchun, kum thum sûng chun Judai lalram chu an sukdet tiel tiel a, Solomon naupa Rehoboam chu ân sukdet hle el ta a; kum thum sûng chu David le Solomon lampui chu an hraw si a.

¹⁸Chun, Rehoboam chun David naupa Jerimoth le Jesai naupa Eliab naunu Abihail naunu Mahalath chu nuhmeiah a nei a;

¹⁹amanu chun naupasalhai a neipêk a; Jeus le Semaria le Zaham.

²⁰Ama hnunga chun Absalom naunu Maaka chu a nei a; ama chun Abija, Attai, Ziza le Selomith a neipêk a.

²¹Chun, Rehoboam chun a nuhmeihai le a thaikêmhai po po nêkin Absalom naunu Maaka chu a hmangai lem a, (nuhmei chu sâwmpariet a nei a, thaikêm sâwmruk leh; chun, naupasal sâwmhni pariet le naunuhmei sâwmruk a nei bawk si a).

²²Chun, Rehoboam chun Maaka naupa Abija chu lalah, a unauhai laia hotutakah a ruot a; ama chu lala siem a lungril si a.

²³Chun, vartakin a thaw a, Juda le Benjamin ram po poa chun a naupasalhai chu a semdar rak a, khawpui kul neihai po poa chun; fâk ding khawm tam tâwk takin a pêk bawk a. An ta dingin nuhmeihai khawm tamtak a zawngpêk bawk a.