Read Hmar 2 CHANCHIN SUINA 12 Bible Online

2 CHANCHIN SUINA 12 - Hmar bible

2 CHANCHIN SUINA 12

¹Rehoboam ram chu sukdet a hung na, a hung hrât phing chun, LALPA dân chu a nghatsan ta a, Israelhai po po khawm chun ama an zui ve a.

²Chun, Rehoboam inlal kum nganaa chun Aigupta rama lal Sisak chun Jerusalem a hung rûn a, LALPA chungah an lo bawsiet ta leiin;

³sakawr tawlailîr sâng le za hni le sakawr chung chuong mi sîng ruk leh; Aigupta rama inthawka ama hung zuitu Lubim mihai, Sukkiim mihai, Ethiopia mihai le chu tiem sêng ruol lo an nih.

⁴Chun, Judai rama khawpui kul neihai chu a lâk a, chuongchun, Jerusalema chun a hung pei a.

⁵Chun, zâwlnei Semaia chu Rehoboam le hotu, Judai ram Sisak leia Jerusalema hung khâwmhai kuoma chun a hung a, an kuoma chun, “LALPA chun hieng ang hin a tih, ‘Kei in mi nghatsan tah, kei khawma Sisak kutah ka mâksan ding cheu a nih,’ tiin,” a ta.

⁶Chun, lal tak le Israel upahai chu an insukhnuoi a, “LALPA chu a fel a nih,” an ti a.

⁷LALPA chun anni chu an insukhnuoi ti a hmu phing chun, Semaia kuoma chun LALPA thu chu a hung tlung ta a, “Anni le anni chu an insukhnuoi a, anni chu sukbohmang vawng naw ning a, amiruokchu, ṭhenkhat sansuokna chu phalpêk ka ta, Sisak kuta hin, Jerusalem chunga ka lungsenna chu bunthlâk ni naw ni.

⁸Amiruokchu, a siehlawhai hung nîng an ta, hieng ramhaia lalram rawngbâwlna le ka rawngbâwlna chu an hriet theina dingin,” tiin.

⁹Chuongchun, Aigupta lal Sisak chun Jerusalem chu a hung rûn a, lal in rothilhai le LALPA in rothilhai chu a lâk hmang a; chuong chu a lâk hmang vawng a, Solomonin rângkachak phaw a siemhai khawm kha a lâk hmang vawng a.

¹⁰Chun, lal Rehoboam chun chuong aia chun dârsen phâwhai a siem a, lal in kawtkhâr vêngtu, vêngtu pâwl hotu kuoma chun ân kawltir a.

¹¹LALPA ina chun lal chu a lût po leh, vêngtu chu a hung a, chuong phâwhai chu a chawi hlak a; chun, vêngtu pindana chun a sie kîr nâwk hlak a nih.

¹²Chun, ama chu ân sukhnuoi tâk lei chun LALPA lunginsenna chu ama sukbohmang let dêr lo dingin lâkkieng a lo ni ta a; chunawa khawm, Judai ram chu a la ṭha zing bawk a.

¹³Chuongchun, lal Rehoboam chu Jerusalema chun ân sukdet a, ro a rêl ta a, ro a rêl ṭan tir chun Rehoboam chu kum sâwmli le kum khat a ni ta a, chun, Jerusalemah, Israel hnam po po laia inthawka a hming um zingna dinga LALPAIN a thlang suok khawpuia chun kum sâwmpasari a rêl bawk a; a nu hming chu Ammon mi Naama a nih.

¹⁴LALPA chu zawng dinga a lungril a hmang naw leiin thil ṭha naw chu a thaw ta a.

¹⁵Chuongchun, Rehoboam thilthawhai, a hmasa le nuhnunghai khawm, thla thu sui dân ang peiin zâwlnei Iddo le zâwlnei Semaia chanchinbuhaia chun ziek an ni naw am a nih? Chun, Rehoboam le Jeroboam inkâra hin indonahai a um zing zing bawk a.

¹⁶Chun, Rehoboam chu a thlatuhai kuomah a in ta a, David khawpuia chun phûmin a um a; chun, a naupa Abija chun ama aia chun ro a rêl ta a.