Read Hmar 2 CHANCHIN SUINA 13 Bible Online

2 CHANCHIN SUINA 13 - Hmar bible

2 CHANCHIN SUINA 13

¹Jeroboam inlal kum sâwmparietnaa chun Abija chun Juda rama chun ro a rêl ṭan a.

²Ama chun kum thum lai Jerusalemah ro a rêl a; a nu hming chu Mikaia, Gibea mi, Uriel naunu kha a nih. Chun, Jeroboam le Abija inkâra khawm chun indona a um a.

³Abija chun indonaa mi hrât ruol sipai pâwl thlang ṭhieu nuoi li lai chun indonaa chun a hang thaw a; Jeroboam khawm chun mi hrât khawkhêng thlang ṭhieu nuoi riet leh indonaa chun ama chu a hung ep ve bawk a.

⁴Abija chu Ephraim tlâng rama Zemaraim tlâng chunga chun a ngîr a.“Aw Jeroboam le Israel mi po pohai, mi lo ngai ta u;

⁵LALPA Israelhai Pathienin David le a thlahai kuomah Israel ram chu kumkhuoa dingin machi thuthlung hmangin a pêk a nih, ti in hriet naw am a ni?

⁶David naupa Solomon siehlaw, Nebat naupa Jeroboam hi thoin, a pu chungah a lo hel el hi.

⁷Chun, ama kuoma chun mi teplohai, mi hmangna bohai chu an inkhâwm a, Rehoboam chu a la naupanga, lungril dâwng a ni lai khan, anni chu Solomon naupa Rehoboam kalin an insukhrât a, ama chun a lo dang zo ta naw kha a na.

⁸Chun, tuhin David naupasalhai kuta LALPA ram chu do thei dingin in inngaituoh a, mipui nasatak in na, in kuoma chun in pathienhai dinga Jeroboamin a siem rângkachak bâwngtehai chu an um bawk a.

⁹LALPA thiempuhai Aron naupasalhai le Levi mihai chu in hnawtsuokin, ram dang mihai dân angin thiempuhai in insiem fâwm a ni naw am a nih? chuleichun, mi tukhawm berâm pasari le bâwngchal tuoia ama inpumpêk dinga hung taphawt chu pathien ni lohai thiempuhai chu an ni thei pei a.

¹⁰Amiruokchu, keini chu LALPA chu kan Pathien a na, ama chu kan nghatsan naw a; LALPA ta dinga rawngbâwltu thiempu kan neihai chu Aron naupasalhai an na, Levi chihaiin an ṭhangpui a;

¹¹riminhnik thilinhlânhai le pumrawhmang thilinhlânhai chu zîng tin le zân tin LALPA kuoma chun an raw a; entirna bei khawm chu dawkân inthieng chunga chun indawt thliein an sie a; chun, rângkachak sathâu khâwnvar siena khawm, chutaka a khâwnvarhai zân tina sit ding leh; LALPA kan Pathien thupêk ang chu kan kawl zing a; amiruokchu, nangni chun in nghatsan a ni hi.

¹²Chun, en ta u, Pathien chu kan hma tieng keini lai a um a; in chunga inlâuna sukri dingin suklauna tawtawrâwthai le thiempuhai chu an um bawk a; Aw Israel mihai, in thlatuhai Pathien LALPA chu do naw ro khai; in hlawtling naw ding a ni si a,” tiin.

¹³Nisienlakhawm, Jeroboam chun an hnung tienga hung dingin lambun pâwl a siem a; chuongchun, Juda hmaa chun an um a, lambun pâwl chu an hnunga chun an um bawk a.

¹⁴Chun, Juda mihai chu an hei nghakîr chun, ngai ta, râl chu an hma le hnunga chun an um ta a; LALPA chu an ko a, thiempuhai chun tawtawrâwthai chu an mût ta a.

¹⁵Chun, Juda mihai chu an khêk a; chuonga Juda mihai an khêk chun, Pathienin Israelhai po po le Jeroboam chu Abija le Juda mihai hmaa chun a hung suktlâwm ta a.

¹⁶Chuongchun, Juda mihai hmaa inthawk chun Israel mihai chu an tlânse a; chun, Pathienin an kuta chun anni chu a pêk ta a.

¹⁷Abija le a mihai chun nasatakin anni chu an that ta a, chuongchun, thlang ṭhieu Israel mi nuoi nga chu thatin an tlu ta a.

¹⁸Chuongchun, chu huna chun Israel thlahai chu sukhnuoiin an um ta a, Juda thlahai ruok chun an thlatuhai Pathien LALPA chu an ringsan leiin an hne ta a.

¹⁹Abija chun Jeroboam chu a hnawt pei a, amaa inthawk chun khawpuihai a lâk a; Bethel le chutaka a khawperhai leh, Jesana le chutaka a khawperhai leh, Ephron le chutaka a khawperhai leh.

²⁰Abija dam sûng chun Jeroboam chu a hrât suok nâwk ta ngai naw a; LALPA chun a hrem a, ama chu a thi ta a.

²¹Chun, Abija chun thil a hung thawthei deu deu a, nuhmei sâwm pali a nei a, naupasal sâwmhni pahni le naunuhmei sâwmparuk a nei a.

²²Abija thilthaw danghai, a thawdânhai le a thuhrilhai chu zâwlnei Iddo hrilfiena bua chun ziek an nih.