Read Hmar 2 CHANCHIN SUINA 14 Bible Online

2 CHANCHIN SUINA 14 - Hmar bible

2 CHANCHIN SUINA 14

¹Chuongchun, Abija chu a thlatuhai kuoma chun a in ta a, ama chu David khawpuia chun an phûm a, a naupa Asa chun ama aia chun ro a rêl ta a; ama inlal sûng chun kum sâwm sûng chu ram chu râlmuongin a um a.

²Chun, Asa chun a Pathien, LALPA mithmuah thil indik le ṭhahai chu a thaw a;

³bâwlhmunhai le maichâm danglamhai chu a lâk hmang a, lungphunhai chu a sukthliek a, Asera chu a phûr thlûk bawk a;

⁴chun, Juda mihai chu an thlatuhai Pathien LALPA chu zawnga thupêk le dânhai chu thaw pei dingin thu a pêk bawk a.

⁵Juda ram sûng khawpui po pohaia inthawk chun bâwlhmunhai le nisa limhai chu a lâk hmang vawng a; ram chu ama hmaa chun a re ṭawk ṭawk a.

⁶Juda rama chun khawpui kul neihai chu a bâwl a, LALPAIN ama chu châwlna a pêk leiin, ram chu a re ṭawk ṭawk a, chuong kumahai chun indona a nei si naw a.

⁷Chun, ama chun, Juda mihai kuoma chun, “Hieng khawpuihai hi bâwl ei tiu a, a banghai, a kulbîng insânghai, a dai kawtkhârhai le a kalna thîrhai siem ei tiu; ei Pathien LALPA chu ei zawng leiin ram chu ei hnuoiah a um a nih; ama chu ei zawng leiin kil tinah ama chun châwl a mi pêk a ni hi,” a ta. Chuongchun, an bâwl a, hlaw khawm an hlawtling pei ta a.

⁸Chun, Asa chun Juda hnama inthawkin âwmphâw le fei chawi mi sipai nuoi thum a nei a; Benjamin hnama inthawkin phaw chawia thalngul kuoi mi nuoi hni le sîng riet a nei bawk a: hieng mihai po po hi mi hrât khawkhêng ruok an nih.

⁹Chun, Ethiopia mi Zera chun sipai maktaduoi khat le sakawr tawlailîr za thum leh anni chu a hung thaw a; ama chu Maresa chenin a hung a.

¹⁰Chun, Asa chu ama tuok ding chun a suok a, Maresaa Zephatha ruoma chun indo ding chun an inep ta a.

¹¹Asa chu a Pathien LALPA kuoma chun a khêk a, “LALPA chau naw chu, hrâtna nei lo mihai ta dinga, mi thilthawtheia inthawka ṭhangpui ding mi dang tukhawm an um naw a; Aw LALPA kan Pathien, mi ṭhangpui la; nangmaah kan innghat si a, hi mipui hi i hming leiin kan hung do a ni hi. Aw LALPA nang chu kan Pathien i na, nangma chu tukhawma hne naw raw se che,” tiin.

¹²Chuongchun, LALPA chun Asa hmaa le Juda mihai hmaa chun Ethiopia mihai chu a hung thaw a; Ethiopia mihai chu an tlânse ta a.

¹³Asa le a kuoma mipui umhai chun anni chu Gerar chenin an hnawt a; Ethiopia mihai chu nasatakin an thi a, ṭhang an khaw thei ta naw a; LALPA le a sipaihai hmaa chun sukbohmangin an um a; anni chun râllâk sum tamtak an lâk a.

¹⁴Chun, Gerar vêla khuohai po po chu a thaw vawng a, LALPA ṭitna chu an chunga chun a hung tlung tâwl si a, khawpuihai po po chu an suksiet a, chuonga hai chun râllâk thil tamtakhai chu a um si a.

¹⁵Ran ruol bûkhai chu an rûn pei a, berâm tamtakhai le sanghâwngsei leh an lâk ṭeu a, Jerusalemah an kîr ta a.