Read Hmar 2 CHANCHIN SUINA 15 Bible Online

2 CHANCHIN SUINA 15 - Hmar bible

2 CHANCHIN SUINA 15

¹Chun, Oded naupa Azaria chunga chun Pathien thlarau a hung a;

²Asa chu tuok dingin a va fe suok a, a kuoma chun, “Nangni Asa le Benjamin le Juda ram po pohai, mi lo ngai ta u; a kuoma in um sûng po chun LALPA chu in kuomah a um a; chun, ama chu in zawng chun in ihmuin um a ta; amiruokchu, ama chu in nghatsan chun nghatsan vêng a ti cheu.

³Chuongchun, hun sâwttak el chu Israel ram chu Pathien indiktak bo, inchûktirtu thiempu le dân boin an lo um ta a;

⁴amiruokchu, an rimsiknaa chun Israel Pathien LALPA kuom tieng chun an kîr nâwk a, ama chu an zawng a, an hmu a ni kha.

⁵Chuong lai hunahai chun mi hung lût ta ding le a suok ta ding khawm chun muongna hrim hrim a um naw a, ram po pohai hluotuhai chunga chun lunginzîngna nasatak a um lem a.

⁶A tum tumin an insukdar vawng a, hnam chungah hnam dang, khawpui chungah khawpui dang; inhmêlmâkna tinrêngin Pathienin anni chu a suklungsen tâwl si a.

⁷Amiruokchu, insukhrât unla; inthlada naw ro, in sinthaw chu lâwmman pêk in ni ding a ni si a,” tiin.

⁸Asa chun hieng thu le, zâwlnei Oded thuhrilhai chu a hriet chun, ân sukhuoi a, Juda le Benjamin ram po poa le Ephraim tlâng rama khawpui a lâkhaia inthawka tirdakumnahai po po chu a sie hmang ta a; LALPA maichâm LALPA tuolpûk hmaa um chu a siem thar bawk a.

⁹Juda le Benjamin rama mi po po le, Ephraim le Manasse le Simeona inthawka chutaka hung inpêm lûthai chu a ko khâwm vawng a; LALPA a Pathien chu a kuomah a um ti an hmu chun Israel rama inthawkin mi tamtak chu ama kuoma chun an lo kai ta si a.

¹⁰Chuongchun, anni chu Asa rorêl kum sâwmpanga kum thla thumnaa chun Jerusalema chun an hung inkhâwm tâwl a.

¹¹Chu ni chun râllâk thila an hung lâk, bâwngchal za sari le berâm sâng sariin LALPA kuomah an inthâwi a.

¹²Chun, an lungvar po po le an lungril po po an thlatuhai Pathien LALPA chu zawng dingin thuthlung an siem a.

¹³chuongchun, mi tukhawm Israel Pathien LALPA zawng lo chu mi lien amanih, mi chîn amanih, pasal amanih nuhmei amani khawm ni sienla sukhlum ding a nih.

¹⁴Chun, rawsemhai, tawtawrâwthai le khêkriin, râwl inringtakin LALPA kuoma chun ṭawng an inkhâm a.

¹⁵Juda mihai po po chu thutiem chun an hlim hle a, an lungril po poin an inkhâm a, an châkna po poa ama chu an zawng leiin, ama chu an ihmua chun a um hrim a; chuongchun, a vêlin anni chu LALPA chun muongna a pêk ta a.

¹⁶Lal Asa chun a nu Maaka khawm chu Asera ta dingin lim tirdakum chu a siem leiin lalnu a ninaa inthawk chun a bân bawk a; chun, Asa chun a milim chu a phûr thlûk a, a suknâwi vawng a, Kidron vadungtêa chun a raw ta a.

¹⁷Nisienlakhawm, Israel rama inthawk chun bâwlhmunhai chu lâk hmang a ni naw a, amiruokchu, a dam sûng po po Asa lungril chu ngiltakin a um a.

¹⁸A pain a lo inhlân tahai le amain ân hlân tahai, tangkaruo dâm, rângkachak dâm, bûr le bêlhai leh Pathien ina chun a hung lâk a.

¹⁹Asa rorêl a kum sâwmthum pangana chen chun indona hrim hrim a um ta naw a.