Read Hmar 2 CHANCHIN SUINA 17 Bible Online

2 CHANCHIN SUINA 17 - Hmar bible

2 CHANCHIN SUINA 17

¹A naupa Jehosaphat chun ama aia chun ro a hung rêl a, Israel chunga chun do dingin ân sukdet hle ta a.

²Juda rama khawpui kul neihai taphawta chun sipaihai a sie a, Juda rama le Ephraim rama khawpui a pa Asain a lo lâk tahaia khan sipai pâwl lienhai chu a sie bawk a.

³Chun, LALPA chu Jehosaphat kuoma chun a um a, a thlatu David lampui hmasahai chu a hraw lei le Baal chu zawng lova,

⁴a thlatuhai Pathien chu zawnga, a thupêkhai chu Israel mihai thaw ang ni lova, a zâwm leiin.

⁵Chuleiin, LALPA chun a kuta chun ram chu a tungding a; Juda ram po po chun Jehosaphat kuoma chun thilpêkhai an hung chawi a; chuongchun, hausaknahai le inzâkaina chu nasatakin a nei ta a.

⁶Chun, LALPA kawngahai chun a lungril chu a thle a; chu nawa khawm Juda rama Asera le bâwlhmunhai po po chu a lâk hmang a.

⁷Chun, ân lal a kum thum kuma chun a hotuhai Benhail, Obadia, Zekaria, Nethanel le Mikaia chu Juda ram khawpuihaia inchûktir dingin a tir tâwl a;

⁸anni lai chun Levi mi Semaia, Nethania, Zebadia, Asahel, Semiramoth, Jehonathan, Adonija, Tobija, Tob-adonija le Levi mihai chu an ṭhang a; anni laia chun thiempu Elisama le Jehoram chu an ṭhang ve bawk a.

⁹LALPA dân lekhabu chu chawiin, Juda rama chun an inchûktir ta a; chuongchun, Juda ram khawpuiahai po po chun an fe lâwn a, mipuihai chu an inchûktir ta a.

¹⁰Chun, Judai ram vêla ramhaia lalram po poahai chun LALPA ṭina chu a um ta a; chuongchun, Jehosaphat chu an do ngam naw a.

¹¹Chun, Philistin mi ṭhenkhathai chu Jehosaphat kuoma chun thilpêkhai le, siechawi dingin tangkaruo an hung pêk a; chun, Arabia mihai khawma ran ruol, berâmchal sâng sari le za sari le, kêlchal sâng sari le za sari an hung kei a.

¹²Chuongchun, Jehosaphat chu nasatakin a hung lien ta a; Juda rama chun kulhai le siekhâwmna khawpuihai a siem ta a.

¹³Juda rama khuohaia chun sin tamtak el a nei a, chun, Jerusalema chun indo mi, mi hrât khawkhênghai a nei bawk a.

¹⁴Chun, hi hi an pahnam ang peia intiemna chu a nih: Juda hnama chun sâng chunga hotuhai chu: hotu Adna, ama hnuoia chun mi hrât ṭhieu nuoi thum an um a;

¹⁵ama dawta chun hotu Jehohanan, ama hnuoia chun nuoi hni le sîng riet an um a;

¹⁶ama dawta chun Zikri naupa Amasia, LALPA kuoma inphaltaka inpetu chu; ama hnuoia chun mi hrât khawkhêng nuoi hni an um bawk a;

¹⁷Benjamin hnama mi chu: mi hrât khawkhêng Eliada, ama hnuoia chun mi phâw le thalngula inthuom nuoi hni an um a;

¹⁸chun, ama dawta chun Jehozabad a na, ama hnuoia chun indo dinga inpeisa mi nuoi khat le sîng riet an um bawk a.

¹⁹Juda ram po poa khawpui kul neihai lalin a siehai ti lova chun hienghai hi lal vêngtuhai chu an nih.