Read Hmar 2 CHANCHIN SUINA 18 Bible Online

2 CHANCHIN SUINA 18 - Hmar bible

2 CHANCHIN SUINA 18

¹Jehosaphat chun hausaknahai le inzâkaina chu nasatakin a nei a, chun, Ahab le chun inpumkhatna chu a siem ta a.

²Kum ieng zât amani hnunga chun Ahab kuomah Samaria chun a zu fe thla a. Chun, Ahab chun ama le ama hung zuituhai ta dingin bâwngchalhai le berâmhai tamtak a thatpêk a; chuongchun, ama le Ramothgileada hang fe dingin a fiel ta a.

³Israel ram lal Ahab chun Juda ram lal Jehosaphat kuoma chun, “Ramoth-gileadah ei hang fe ding?” a ta. Ama chun, “Kei le nang ka mihai le i mihai pumkhat ei na; indonaa chun, nangni leh ṭhang hmunkhat kan tih,” a ta.

⁴Jehosaphat chun Israel ram lal kuoma chun, “Vawisûn hin LALPA thu chu indawn raw khai, ka hni che hi,” a ta.

⁵Chuongchun, Israel ram lal chun zâwlnei za li lai chu a ko khâwm a, an kuomah, “Ramoth-gileada chun indo dingin kan hang fe ding am, annawleh ka tosan el ding?” a ta. Anni chun, “Hang fe ro, Pathien chun lal kutah a pêk suok ding a ni si a,” an ta.

⁶Nisienlakhawm, Jehosaphat chun, “Hienghai naw hi ei râwn thei ding LALPA zâwlnei dang hrim an um naw am a nih?” a ta.

⁷Israel lal chun Jehosaphat kûoma chun, “Mi pakhat LALPA thu ei indawn theina ding chu a la um a, amiruokchu, ama chu ka theidaa, ka chungthua hin thu a hril ṭha ngai hrim hrim naw a, thil ṭha naw chau naw chu; chu mi chu Imla naupa Mikaia a nih,” a ta. Jehosaphat chun, “Lal chun chuong chun ti naw phawt raw se,” a ta.

⁸Chun, Israel lal chun hotu pakhat a ko a, “Imla naupa Mikaia chu inhmâwtakin hung ṭhuoi rawh,” a ta.

⁹Chun, Israel ram lal le Juda ram lal Jehosaphat chu, an lal puona inthuomin an lal ṭhungpha ve vea chun an ṭhung a; Samaria lûtna dai kawtkhâr bula tuollaia chun an ṭhung a, chuongchun, zâwlneihai po po chun an hmaa chun thu an hril ruol duol duol a.

¹⁰Chun, Kenaan naupa Zedekia chun thîrin saki ân siem fâwm a, “LALPA chun hieng hin a tih, ‘Sukbohmang an ni vawng hmakhat chu hienghai le hin Suria mihai chu i sik ding a nih,’ tiin,” a ta.

¹¹Chuongchun, zâwlneihai po po chun, chuong ang seng chun an hril ta a, “Ramoth-gileada chun hang fe la, hang hlawtling rawh, LALPA chun lal kuta chun a pêk suok ngei ding a ni si a,” tiin.

¹²Chun, thangko Mikaia ko dinga fe khan a kuomah thu a hril a, “Ngai ta, thu bau khat angin zâwlneihai thu chun lal ta dinga ṭha chu an hril seng a; chuleiin, ka hni che hi, nanga thu khawm chu anni hril ang bawk chu ni sienla, thu ṭha hril rawh,” tiin.

¹³Mikaia chun, “LALPA chu a hring zing a, ka Pathienin a hril chu, chu chu ngei chu hril ka tih,” a ta.

¹⁴Chun, lal kuom a hung tlung chun lal chun a kuomah, “Mikaia, Ramoth-gileada chun indo dingin kan hang fe ding am, annawleh ka tosan el ding?” a ta. Ama chun, “Hang fe la, hang hlawtling rawh, i kutah pêk suok an ni ding a nih,” a ta.

¹⁵Chun, lal chun a kuoma, “LALPA hmingin thudik chau naw chu iengkhawm ka kâwlah i hril ngai nawh ti hi vawi iengzât rau am ka sukdetpui ding che a na?” a ta.

¹⁶Ama chun, “Israel mihai po po chu, berâm a vêngtu boa, an invâk hmang angin tlângahai chun indarin ka hmu a; chun, LALPA chun, ‘Hienghai hin vêngtu an nei naw a, mi tin chu mâni in sengah thlamuongtakin inkîrtir seng ro,’ a tih,” tiin.

¹⁷Chun, Israel ram lal chun Jehosaphat kuoma chun, “Keima chungthua chun a se tieng chau naw chu a ṭha tieng chun thu hril naw ni ti ka hril hrim che a ni naw am a nih?” a ta.

¹⁸Chun, Mikaia chun a hril a, “Chuleichun, LALPA thu chu ngai rawh. LALPA chu a lalṭhungphaa chun ṭhung a, vân sipaihai po po chu a changtieng le a vawitienga ngîr ka hmu a nih.

¹⁹Chun, LALPA chun, ‘Israel ram lal Ahab chu Ramoth-gileada chun a hang fe a, chutaka chun a hang thi theina dingin tuin am thlêm a ta?’ a ta. Chun, mi pakhat chun chuong ang chun a hril a, mi dang khawmin chuong ang bawk chun an hung hril pei a.

²⁰Chun, thlarau pakhat chu a hung suok a, LALPA hmaa chun a ngîr a, ‘Keiin hang thlêm ka tih,’ a ta. Chun, LALPA chun, ‘Iengtinam ie?’ a ta.

²¹Ama chun, ‘Hang fêng ka ta, a zâwlnei po pohai baua chun thlarau inkhêl hang nîng ka tih,’ a ta. Chun, ama chun , ‘Ama chu thlêm ngei i ta, hlaw khawm hang hlawtling ngei i tih; fe suok la, chuong ang tak chun hang thaw rawh,’ a ta.

²²Chuleiin, tuhin ngai ta, hieng i zâwlneihai baua hin khêl hrilna thlarau a sie ta a; chuleichun, LALPA chun i chungthua chun thil ṭha naw chu a hril tah a nih,” tiin.

²³Chun, Kenaan naupa Zedekia chu a hung hnai a, “Keimaa inthawkin i kuoma thu hril dingin LALPA thlarau chu khaw tieng am a fe leh?” tiin, Mikaia chu a bienga chun a ben ta a.

²⁴Chun, Mikaia chun, “Ngai ta, pindan sûngrila inbihmang dinga i fe pha, chu ni ngei chun la hrieng i tih,” a ta.

²⁵Chun, Israel lal chun, “Mikaia hi man unla, khawpui enkawltu Amon kuoma chun ṭhuoi nâwk ro; lal naupa Joas kuoma le chun;

²⁶chun, ‘Hi mipa hi lunginah sie unla, thlamuongtaka ka hung nâwk hmakhat chun rimsikna tui le rimsikna beiin ama hi châwm ro,’ lalin a tih, ti ro,” a ta.

²⁷Chun, Mikaia chun, “Thlamuongtaka i hung nâwk hrim hrim chun, LALPAIN kei mi hmangin thu a hril naw nîng a tih,” a ta. Chun, “Mipuihai, nangni po poin lo hre ta u,” a ta.

²⁸Chuongchun, Israel ram lal le Juda ram lal Jehosaphat chu Ramothgileada chun an hang fe ta a.

²⁹Chun, Israel lal chun Jehosaphat kuoma chun, “Insukdanglam ka ta, indonaah hang fêng ka tih; amiruokchu, nang chu i lal puon sil zing la,” a ta. Chuongchun, Israel lal chu ân sukdanglam a, indonaa chun an hang fe ta a.

³⁰Chun, Suria lal chun sakawr tawlailîrhai hotuhai kuoma chun, “Israel lal ngat naw chu mi lien amanih, mi chîn amani khawm chu va do naw ro,” tiin thu a pêk a.

³¹Chun, sakawr tawlailîr hotuhai chun Jehosaphat chu an hmu chun, “Israel lal a ni a,” an ta. Chuleiin, ama chu do dingin an inhuol ta a; amiruokchu, Jehosaphat chu a khêk a, LALPA chun ama chu a ṭhangpui ta a; chuongchun, amaa inthawka inkieng dingin Pathien chun a hung thaw ta a.

³²Chun, sakawr tawlailîr hotuhai chun Israel lal a ni nawh ti an hmu chun, ama an hnawt lai chu an kîrsan ta a.

³³Chun, mi tuin amanih tum bîk nei lovin a thalngul chu a kuoi a, Israel lal chu a râlthuom inzawmna kâr taka chun a kâp ta a; chuleichun, a tawlailîr khaltu kuoma chun, “Kei her la, sipaihai laia inthawk hi mi fe suokpui raw khai, ka hliem nasa êm el,” a ta.

³⁴Chu ni chun indona chu a zuol pei a, ngai ta, Israel lal chu Suriahai chu doin a tawlailîra chun zântieng chenin a ṭhang zing a; chun, ama chu nisa tlâk hun lai taka hin a thi ta a.