Read Hmar 2 CHANCHIN SUINA 19 Bible Online

2 CHANCHIN SUINA 19 - Hmar bible

2 CHANCHIN SUINA 19

¹Juda ram lal Jehosaphat chu thlamuongtakin Jerusalema a ina chun a kîr ta a.

²Chun, Hanani naupa zâwlnei Jehu chu ama tuok dingin a lo va fe suok a, lal Jehosaphat kuoma chun, “Mi rilo chu ṭhangpuiin, LALPA theidatu chu i hmangai ding a ni maw? Hi thil lei hin LALPA lungsenna chu i chungah a um a nih.

³Amiruokchu, nangmaa hin thil ṭha hmusuok a ni ve bawk a, hi rama inthawka Asera chu sie hmang a, Pathien chu zawng dinga i lungril chu i siem ta leiin,” a ta.

⁴Chun, Jerusalema chun Jehosaphat chu a um a; Beer-sebaa inthawka Ephraim tlâng ram chenin mipuihai laia chun a fe suok a; an thlatuhai Pathien LALPA kuom tienga chun anni chu a hung ṭhuoi kîr nâwk tâwl a.

⁵Chun, Juda khawpui kul neihai po poa khaw tinah, ram sûnga chun rorêltuhai a sie tâwl a,

⁶rorêltuhai kuoma chun, “In thaw chu ngaituo hlak unla, mihriem ta dinga ro rêl in ni naw a, LALPA ta ding lem a nih; chun, ama chu in rorêlnaah in kuomah a um a nih.

⁷Chuleiin, tuhin, LALPA ṭina chu in chungah um sienla, chu chu pawisa hle unla, thaw khawm thaw bawk ro; ei Pathien LALPAA chun khawhlona hrim a um naw a; mi inza bîkna khawm a um naw a, thamna lâkna khawm a um bawk nawh,” a ta.

⁸Chunawa khawm chun Jehosaphat chun Jerusalema chun Levi mihai le thiempuhai le, Israel pahnam ṭhuoituhai chu thubuoiahai le LALPA ta dinga rorêl dingin a sie bawk a. Chun, Jerusalema chun an kîr ta a.

⁹Chun, anni ân fui a, “ LALPA ṭi pumin, ringumtakin, lungril ṭha famkimin in thaw ding a nih.

¹⁰Chun, in unau an khawpuihaia chênghaia inthawka thisen le thisen inkâra manih, dân le thupêkhai inkâra manih, thuruot le rorêlhai inkâra mania thubuoihaiin in kuomah an hung inkhing chun, LALPA chungah an suksuol a, nangni le in unauhai chunga lunginsenna chu a hung tlung nawna dingin anni chu in kâwk ding a nih: hi hi thaw hlak unla, suksuol naw ti niu.

¹¹Chun, ngai ta u, thiempu lal tak Amaria chu LALPA thu chungchâng po poa chun nangni hotu a na; Juda sûngkaw chunga rorêltu Ismael naupa Zebadia chu lal thu chungchânga po po chun a ni bawk a; Levi mihai khawm chu in hmaa chun hotuhai ni bawk an tih. Huoitakin thaw unla, mi ṭha kuoma chun LALPA chu um ngei a tih,” tiin.