Read Hmar 2 CHANCHIN SUINA 20 Bible Online

2 CHANCHIN SUINA 20 - Hmar bible

2 CHANCHIN SUINA 20

¹Hi hnunga Moab mihai le Ammon mihai chu, Meunim mi ṭhenkhathai le chun Jehosaphat chu do dingin an hung thaw ta a.

²Chun, mi tuhai amanih an hung a, Jehosaphat kuoma chun, “Suria rama tuipui râla inthawkin mipui nasatak nangma rûn ding chein an hung a, ngai ta, Hazazon-tamarah an um,” tiin an hril a, (chu chu Engedi leh angkhat a nih).

³Chuongchun, Jehosaphat chu a ṭi ta a; LALPA chu a zawng a, Juda ram po poa bunghei a rawt ta a.

⁴Chun, Juda mihai chu LALPA ṭhangpuina zawng dingin an inkhâwm a; Juda ram khawpui po poa inthawkin LALPA chu zawng dingin an hung tâwl a.

⁵Jehosaphat chu LALPA inah, Biekbûk tuolzawl thar hmaa Juda le Jerusalem mipui pungkhâwmhai laia chun a ngîr a;

⁶A hril a, “Aw LALPA, kan thlatuhai Pathien, nang chu vân Pathien i ni naw am a nih? Hnamhai lalram po pohai chunga rorêltu chu nang i ni naw am a nih? I kuta chun hrâtna le thilthawtheina a um a, chuleiin, tukhawma dang thei naw ni hai che.

⁷Aw kan Pathien, i mi Israelhai hmaah hi ram hluotuhai hi i hnawt suokin, i ruolpa Abraham thlahai kuomah kumkhuoa dingin i pêk a ni naw am a nih?

⁸Chuongchun, chutaka chun an um a, i ta dingin i hmingin hmun inthieng chutaka chun an bâwlpêk che a,

⁹‘Thil ṭha naw dâm, kâwlhnâm dâm, rorêlna dâm, hri amanih, ṭâm amanih kan chungah a hung tlung chun nangma hmaa le hi in hmaa hin ngîr kan ta, (i hming chu hi ina hin a um si a,) kan rimsiknaa chun nang hung ko kan ti che a, nang chun mi lo sandam i tih,’ tiin.

¹⁰Tuhin, ngai ta, Ammon le Moab mihai le Seir tlâng Aigupta rama inthawka an hung suok laia nangin Israel mihai inrûntir lo le, insuksiettir lo a i în umtirhai khan,

¹¹ngai ta, nangin hluo dinga i mi pêk, i chana inthawka hunga mi hnawt suok dinga an mi hung thawzie hi lo hre la.

¹²Aw kan Pathien, nangin an chungah ro i rêl ding a ni naw am a nih? Hieng keini mi hung thaw tum pâwl nasatak el chunga hin hrâtna kan nei si naw a; ieng am thaw ding a na ti khawm kan hriet bawk nawh; nangma tieng kan hung ngha a nih,” tiin.

¹³Chuongchun, Juda mihai po po chu LALPA hmaa chun an nauhai le an nuhmeihai le an nautêhai rawi leh chun an ngîr a.

¹⁴Chun, Asaph naupasalhai Levi mi, Mattania naupa, Jeiel naupa, Benaia naupa, Zekaria naupa, Jahaziel chunga chun mipui inkhâwmhai laia chun LALPA thlarau a hung tlung a;

¹⁵ama chun a hril a, “Nangni Juda mi po pohai, Jerusalem hluotu po pohai le nang lal Jehosaphat, lo ngai ta u, LALPA chun hieng ang hin in kuomah a ti a nih, ‘Hi mipui tamtak lei hin beidawng naw unla, ṭit khawm ṭi bawk naw ro; indona chu in ta a ni naw a, Pathien ta a ni lem si a.

¹⁶Zînga hin anni chu zuk thaw unla, ngai ta u, Ziz lam tunga khan an hung a nih; Jeruel thlalêr tlung hmaa phairuom tâwpa khan anni chu hmûng in tih.

¹⁷Hi indonaa hin in do ngai kher naw nih, intlar phawt unla, ngîr ṭawk ṭawk ro; LALPA sandamna chu en zing el ro; aw Juda mihai le Jerusalem mihai, ṭi naw unla, beidawng bawk naw ro; zingah anni chu hang thaw unla, LALPA chu in kuomah a um si a,’ ” tiin.

¹⁸Chun, Jehosaphat chu a hmaia hnuoi sikin a lu a kûn a, chun, Juda mi po po le Jerusalema chêngtuhai chu LALPA hmaa chun an bawkkhup a, LALPA chibai an bûk a.

¹⁹Chun, Kohath mihai le Kora thla Levi mihai chu râwl nasataka inringa Israel Pathien LALPA chu inpâk dingin an ngir ta a.

²⁰Chun, zîngkâr inhmatakin an tho a, Tekoa thlalêra chun an hang fe a, chun, chuonga an fe suok lai chun Jehosaphat chu a ngîr a, “Aw Juda le Jerusalema chêngtuhai, mi lo ngai ta u; LALPA in Pathien chu ring unla, chuongchun, sukdetin um in tih; a zâwlneihai chu ring unla, chuongchun, hlawtling in tih,” a ta.

²¹Chun, mipuihai chu ân fui zo hnung chun, sipaihai hmaa an fe suok phaa inthieng mawina chu inpâka LALPA kuoma hla sak dingin mi a ruot a: “LALPA kuomah lâwmthu hril ro, a zângaina chu kumkhuoin a um zing si a, ti ro” a ta.

²²Chun, an inpâk a, hla an hang sak ṭan phing chun Juda ram hung rûntuhai Seir tlâng le, Moab le Ammon mihai chunga chun inchân rutuhai LALPA chun ân chân tir ta a; chuongchun, hnein an um ta a.

²³Moab le Ammon mihai chu Seir tlâng khuo deltuhai chu that vawng a, anni sukbohmang dingin an hung tho ta a; chun, Seir tlâng hluotuhai an hung sukrêm hnunga khawm chun, mi tin chu mi dang dang insukbohmangtuo an tum seng ta a.

²⁴Chun, Juda mihai chu thlalêra vêngna in insânga an hang tlung chun; mipuihai chu an hei en a; chun, ngai ta, mithi ruong hnuoia tluhai chu an hmu a; tukhawm a damsuok hrim an um dêr naw a.

²⁵Chun, Jehosaphat le a mihai chu an thuom hlîppêk dinga an hung chun lunghluhai, silfênhai, hausakna nasatak elhai chu anni lai chun an hmusuok a, chuonghai chu an phur sêng lo rauin an lâk a; chuong ang lâwm chun a tam a, ni thum sûng zet chu râllâk thilhai chu an lâk a.

²⁶Chun, a ni li ni chun anni chu Beraka ruoma chun an inkhâwm a, chutaka chun LALPA chu an chawimawi a, chuleiin , a hmun hming chu tu chen hin “Malsâwmna[4] ruom” ti a ni ta a.

²⁷Chun, Juda rama mi po po le Jerusalema mihai chu an kîr nâwk ta a; Jehosaphat chu anni rawi hmaa chun hlimtakin Jerusalema fe ding chun a kîr ta a; LALPA chun an hmêlmahai chunga hlim dingin anni chu a lo siem ta si a.

²⁸Chun, Jerusalema chun LALPA inah perkhuonghai, ṭingṭanghai, tawtawrâwthai leh an hung lût a.

²⁹Chun, Israelhai hmêlmahai chu LALPA chun a dopui ti an hriet chun chuong ramhaia lalramhai po po chunga chun LALPA ṭina chu a um a.

³⁰Chuongchun, Jehosaphat ram huop sûng chu a re ṭawk ṭawk a; a Pathien chun a vêl po poa chun râlmuongna a pêk si a.

³¹Jehosaphat chun Juda ram chunga chun ro a rêl a, a rorêl ṭan chun kum sâwmthum panga a na; Jerusalema chun kum sâwmhni panga a rêl a; a nu hming chu Azuba, Silhi naunu kha a nih.

³²A pa Asa lampui kha a hraw a, LALPA mithmua ân dik chu thawin a pêtsan ngai naw a.

³³Amiruokchu, bâwlhmunhai chu lâk hmang a ni naw a; mihai khawm chun an thlatuhai Pathien tienga chun an lungrilhai an lân nghat chie naw a.

³⁴Jehosaphat thilthaw, a hmasa le a nuhnunghai chu, ngai ta, Hanani naupa Jehu chanchin bu, Israel lalhai lekhabua chun ziek a nih.

³⁵Chun, hi hnunga hin Juda ram lal Jehosaphat chu Israel ram lal Ahazia le chun an inzawm a ; ama chun khawhlotakin a thaw a;

³⁶lawnghai siema, Tarsisa fe dingin ama chu ân zawmpui a; chuong chun, Ezion-gebera chun lawnghai chu an siem ta a.

³⁷Chun, Maresaa Dodavahu naupa Eliezer chun Jehosaphat chunga chun a hrillâwk a, “Ahazia chu în zawmpui leiin, LALPA chun i sinthawhai chu a suksiet tah,” a ta. Chuongchun, lawnghai chu an kawise a, Tarsisa chun an fe thei ta naw a.