Read Hmar 2 CHANCHIN SUINA 21 Bible Online

2 CHANCHIN SUINA 21 - Hmar bible

2 CHANCHIN SUINA 21

¹Jehosaphat chu a thlatuhai kuoma chun a in ta a; David khawpuiah a thlatuhai kuomah chun phûmin a um ta a; a naupa Jehoram chun ama aia chun ro a rêl ta a;

²chun, unauhai, Jehosaphat naupasalhai a nei a: Azaria, Jehiel, Zekaria, Azaria, Mikael, Sephatia; hienghai po po hi Israel ram lal Jehosaphat naupasalhai an nih.

³Chun, an pa chun an kuoma chun thilpêk nasatak elhai , tangka dâm, rângkachak dâm, thil hlutakhai dâm le Juda rama khawpui kul neihai leh a pêk a; amiruokchu, Jehoram chu nau lutîr a ni leiin lalram chu a pêk a.

⁴Chuonga Jehoram chu a pa ram chunga chun a hung inlal a, a hung insukhrât phing chun a unauhai po po le Israel rama lal tamtak chu kâwlhnâmin a that tâwl ta a.

⁵Rorêl a ṭan chun Jehoram chu kum sâwmthum pahni a na; Jerusalema chun kum riet sûng ro a rêl a.

⁶Ama chun Ahab sûngkuoin an thaw ang khan, Israel ram lalhai lampuia bawk khan a fe a; Ahab naunu nuhmeiah a nei a; LALPA mithmua thil ṭha lo chu a thaw a.

⁷Nisienlakhawm, LALPA chun David sûngkuo chu a sukbohmang naw a, David kuoma thuthlung a lo siem ta lei le, ama le a thlahai kuoma khâwnvar pêk zing zing dinga a lo tiem ta leiin.

⁸Ama hun laia chun Edom ram chu Judahai chunga chun an hel a, anni chunga chun lal an siem ta a.

⁹Chun, Jehoram chu ama le a sakawr tawlailîr po pohai le a hotuhai le chun ân thawk a, zân lai a hang ṭhâwng a, sakawr tawlailîr hotuhai le ama inhuoltu Edom mihai chu a thaw ta a.

¹⁰Chuongchun, vawisûn ni chen hin Edom mihai chu Judahai chunga chun an hel ta zing a; chu huna bawk chun Libna khuo khawm chu an lo hel ve a; a thlatuhai Pathien LALPA chu a lo nghatsan tâk leiin.

¹¹Chunawa khawm chun Juda ram tlângahai chun bâwlhmunhai a siem a, Jerusalema umhai chu ân uirettir a, chuongchun, Juda ram chu an lo ṭhuoi hmang ta a.

¹²Chun, a kuoma chun zâwlnei Elija kuoma inthawkin lekha ziek a hung a, “I pu David Pathien LALPA chun hieng ang hin a ti a nih, ‘I pa Jehosaphat lampuihai chu i hraw naw a, Juda ram lal Asa lampuihai khawm chu i hraw bawk naw a;

¹³Israel lalhai lampuihai chu i hraw lem a. Ahab sûngkuoin an lo thaw ta angin, Jerusalema umhai le Juda rama mihai chu i lo inuirettir ta a; chun, i pahnama mi i unauhai nanga nêka ṭha lemhai chu i that bawk a,

¹⁴ngai ta, LALPA chun i mihai, i nauhai, i nuhmeihai le i thilnei po pohai chu hripuiin nasatakin a hrem ding a nih;

¹⁵i phîng natna leiin nang khawma natna nasatak nei i ta; ni tin tinin, chu natna leia i rîlhai a suok zo vawng hmakhat chun nei i tih,’ ” tiin.

¹⁶Chun, Ethiopia mihai kâwla um Arabia le Philistin mihai lungril chu Jehoram chunga chun LALPAIN a chawktho a;

¹⁷Juda ram chu an hung rûn a, an hung lût a; lal ina thil hmua umhai po po an lâk vawng a; a naupasalhai le naunuhmeihai leh, chuongchun, a naupasalhai laia a naupang tak Jehoahaz ti chau naw chu a naupasal hrim hrim mâksanpêk a ni naw a.

¹⁸chun, hieng thilhai po po hnunga hin LALPA chun a phîngah natna dam thei lovin a hrem a.

¹⁹Chuong anga kum hni ân vawi hnung chun, a natna lei chun a rîl chu a suok a, natna natakin a thi ta a. Chun, a mihai chun a thlatuhai chawimawinaa meipui an sêm ang khan, ama ta dingin meichawk an siempêk naw a.

²⁰Rorêl a ṭan chun kum sâwmthum pahni mi a na, Jerusalema chun kum riet ro a rêl a; ama chu ngainatna hlaw lovin a thi ta a; David khawpuia chun an phûm a, lalhai thlâna ruok chu ni lovin.