Read Hmar 2 CHANCHIN SUINA 22 Bible Online

2 CHANCHIN SUINA 22 - Hmar bible

2 CHANCHIN SUINA 22

¹Jerusalema chênghai chun a naupa naupang tak Ahazia chu ama aia chun lalin an siem a; Arabia mihai le pâwl ruol bûka hunghai khan a upahai po chu an that vawng ta si a. Chuongchun, Judai ram lal Jehoram naupa Ahazia chun ro a rêl ta a.

²Ro a rêl ṭan chun Ahazia chu kum sâwmli pahni mi a na, Jerusalema chun kum khat sûng ro a rêl a, a nu hming chu Athalia, Omri naunu a nih.

³Ama khawma Ahab sûngkaw lampuihai kha a hraw ve a; a nu chu khawhlotaka khawsa dinga a thu rawtpuitu a ni si a.

⁴Ahab sûngkuoin an thaw ang khan LALPA mithmuah thil ṭha naw chu a thaw a; a pa a thi hnung chun anni chu a sietna ding chena a thu rawtpuituhai an ni si a.

⁵An thu rawt ang pei chun a fe a, Suria ram lal Hazael chu do dingin Ramoth-gileada chun Israel ram lal Ahab naupa Jehoram le chun a hang fe ve a; Suria mihai chun Joram chu an lo inhliem a.

⁶Chun, Suria ram lal Hazael a donaa Ramaa ama an inhliemnahai chu insukdam dingin Jezreela chun a kîr ta a. Chun, Judai ram lal Jehoram naupa Azaria chu, Ahab naupa Jehoram chu a damnaw leia Jezreela en dingin a zu fe a.

⁷Chuongchun, Ahazia bohmangna chu Pathiena inthawk a na, Joram kuoma a hang fe lei tak chu a nih; chuonga a hung lai chun, Ahab sûngkuo chu sât thlatu dinga LALPAIN hriek a lo nâl tah Nimsi naupa Jehu chu do dingin Joram le khan a hang fe ve si a.

⁸Chun, Jehu chun thupêk Ahab sûngkaw ta dinga a pêk suok lai chun Juda ram lalhai le Ahazia unauhai naupasalhai chu Ahazia rawngbâwlin a hmu a, anni chu a that tâwl ta a.

⁹Chun, Ahazia chu a zawng a, an man a, (Samariaa chun a lo in bihmang a na) Jehu kuoma chun an hung ṭhuoi a, an that ta a; chun, an phûm a, “A lungril po poa LALPA zawngtu Jehosaphat naupa chu a ni ngei,” an ti a. Chuongchun, Ahazia sûngkuoa chun lalram chunga rorêl thei ding mi pakhat khawm an um ta naw a.

¹⁰Chun, Ahazia nu Athalia chun a naupa chu a thi tah ti a hriet chun, a tho a, Juda sûngkuo lal chi po chu a rawt ta vawng a.

¹¹Amiruokchu, lal naunu Jehosabeath chun Ahazia naupa Joas chu a lâk a, lal nauhai thata umhai laia inthawk chun ân rûkhmang a, khum pindanah ama dawntu le chun a sie ta a. Chuongchun, lal Jehoram naunu Jehosabeath, thiempu Jehoiada nuhmei chun (ama chu Ahazia farnu a ni si a,) Athaliaa inthawk chun a thuphmang a, chuongchun, a sukhlum ve naw a.

¹²Pathien ina chun anni leh kum ruk sûng thupin a um a, chun, Athalia chun ram chunga chun ro a rêl a.