Read Hmar 2 CHANCHIN SUINA 24 Bible Online

2 CHANCHIN SUINA 24 - Hmar bible

2 CHANCHIN SUINA 24

¹Joas chu ro a rêl ṭan chun kum sari mi chau a na; Jerusalema chun kum sâwmli sûng ro a rêl a; a nu chu Beer-sebaa mi, a hming Zibia a nih.

²Thiempu Jehoiada dam sûng po poa chun Joas chun Pathien mithmuah thil indikhai chu a thaw a.

³Jehoiada chun nuhmei pahni ân neitir a; naupasalhai le naunuhmeihai a nei a.

⁴Joas chun LALPA in chu siem ṭhat a lungril ta a.

⁵Levi mihai le thiempuhai chu a ko khâwm a, an kuomah, “Juda ram khawpuiahai chun fe suok unla, kum tinin in Pathien in siem ṭhatna dingin Israel mihai po poa inthawk chun tangka dâwl unla; hi thil hi hung inhmaw hle dingin ngaituo ro,” a ta. Amiruokchu, Levi mihai chu an inhmaw naw hle el a.

⁶Chun, lal chun thiempu laltak Jehoiada chu a ko a, a kuomah, “Thuthlungna puon ina dingin, Israel mipuihai le LALPA siehlaw Mosie ruot leiman chu Jerusalem le Juda rama inthawka hung la dingin ieng dinga Levi mihai hi i tir naw am a na?

⁷Kha nuhmei rilo Athalia naupasalhai khan Pathien in chu an lo suksiet a; LALPA in ta dinga thilinhlânhai po po kha Baal kuomah an lo pêk vawng ta si a,” a ta.

⁸Chuongchun, lal chun thu a pêk a, thingrem an siem a, LALPA in dâi kawtkhâr puoa chun an inṭhut a.

⁹Chun, Jerusalema le Juda ram po poa chun, thlalêra Pathien siehlaw Mosiein Israel mihai po po chunga leiman bituk a lo siem ta chu LALPA ta dinga hung chawi dingin an puong ta a.

¹⁰Chuongchun, lalhai po po le mipuihai po po chu an hlim hle a, an tangkahai an hung chawi a, thingrema chun an dâwl zo hmakhat chun an thlâk ta zing hlak a.

¹¹Chun, thingrem chu lal hotuhai hmaa Levi mihai chun an hung lâk po leh, tangka tamtak a um ti an hmu chun lal lekhaziektu le thiempu laltak hotu chu an hung a, thingrem chu an sukruok a, an lâk a, a hmuna bawk chun an va sie nâwk hlak a, chuong ang chun ni tin an thaw a, tangka tamtak an inkhâwl a.

¹²Chun, chu chu LALPA in rawngbâwlna sin thaw ang pei chun Jehoiada le lal chun an pêk suok ta a; in bâwlthiemhai le, thing sakthiemhai LALPA in siem ṭha ding chun an ruoi a, LALPA in bâwl ṭha dinga dârsen le thîra sinthawtuhai khawm chu.

¹³Chuongchun, sinthawtuhai chun sin an thaw a; sin chu anni thaw zo famkim a ni ta a , Pathien in chu a ngai ang bawk chun an bâwl ṭha a, an sukdet ta a.

¹⁴Chun, an zo pha chun, tangka danghai chu lal le Jehoiada kuoma chun an hung chawi a; chuonghai chun LALPA ina bûr le bêlhai, rawngbâwlna le inhlânna bûr le bêlhai, haihawhai, rângkachak le tangkaraw bûr le bêlhai chu siem a na. Chun, Jehoiada dam sûng po po chun ni tin hin LALPA ina chun pumrawhmang thilinhlânhai chu an inhlân zing zing hlak a.

¹⁵Nisienlakhawm, Jehoiada chu a hung upa a, a hung tar ta a, a thi ta a; a thi chun kum za le sâwmthum mi a nih.

¹⁶Ama chu David khawpuiah lalhai laia chun an phûm a, Pathien le a in chunga le, Israel ram sûnga chun thil ṭha a thaw hlak leiin.

¹⁷Jehoiada a thi hnung chun Juda ram lalhai chu an hung a, lal kuoma chun devânkaina an hung siem a. Chun, lal khawm chun an thu chu a lo ngai a.

¹⁸An thlatuhai Pathien LALPA in chu an nghatsan a; milimhai le Asera rawng chu an bâwl ta a; chuongchun, hi an rîtlona lei hin Jerusalem le Juda ram chunga chun lungsenna a hung tlung ta a.

¹⁹LALPA kuoma hung ṭhuoi nâwk dingin an kuoma chun zâwlneihai a tir a; anni chu an lo ngâwk a, na an lo daw nuom naw a.

²⁰Chun, thiempu Jehoiada naupa Zekaria kuoma chun Pathien thlarau a hung tlung a, mipuihai chunga chun a ngîr a, an kuomah, “Pathien chun hieng hin a tih, ‘Hlawtling thei nâwna pha el dinga iengdinga LALPA thupêkhai chu in bawsiet am a na? LALPA chu in nghatsan leiin ama khawma a nghatsan cheu a ni hi,’ tiin,” a ta.

²¹Chun, ama chu an phierrûk ta a, LALPA in inhuon tuolsûnga chun lal thupêkin an dêng hlum ta a.

²²Chuongchun, lal Joas chun ama chunga a pa Jehoiada ngilneizie kha a hriet zing ta naw a, a naupa chu a that ta a. Chun, a thi chun, “LALPAIN hung en sienla, phuba la raw se,” a ta.

²³Chun, kum tâwpa chun Suria sipaihai chun ama chu an hung rûn ta a; chuongchun, Juda ram le Jerusalema khawm chun an hung lût a; an mi lienhai po po chu an sukbohmang vawng a, annia râllâk sum po po chu Damaska lal kuomah an inphur vawng a.

²⁴Suria sipai pâwlhai chu mi tlâwmte chau hi an hung a, amiruokchu, LALPA chun sipai pâwl lientak chu an kutah a pêk si a; an thlatuhai Pathien LALPA chu an nghatsan leiin. Chuongchun, Joas chunga chun hremna chu an intlungtir ta a.

²⁵Chun, ama chu an mâksan chun (na inrimtakin ama chu an mâksan si a), thiempu Jehoiada naupasalhai thisen lei khan ama siehlaw ngeiin ama chu a phierrûk ta a; a khum chunga ngei chun a that a, a thi ta a; David khawpuia chun an phûm a, nisienlakhawm, lalhai thlân ina khan chu an phûm nawh.

²⁶Hienghai hi ama phierrutuhai chu an nih: Ammon nu Simeath naupa Zabad hai, Moab nu Simrith naupa Jehozabad hai hi.

²⁷Chun, a naupasalhai chungthu le, ama chunga phurrik nasatak innghat le, Pathien in bâwl thu chu, ngai ta, lalhai chanchin ziekna bua chun an ziek a. Chun, a naupa Amazia chun ama aiin ro a rêl ta a.