Read Hmar 2 CHANCHIN SUINA 25 Bible Online

2 CHANCHIN SUINA 25 - Hmar bible

2 CHANCHIN SUINA 25

¹Amazia chu ro a rêl ṭan chun kum sâwmhni pangaa upa a na; Jerusalema chun kum sâwmhni pakuo ro a rêl a, a nu hming chu Jehoaddan, Jerusalem mi a nih.

²LALPA mithmuah thil indik chu a thaw a; amiruokchu, lungril ṭha famkim leh ni lovin.

³Lalram chu ama ta dinga sukdet a ni phing chun, a pa lal thattu a siehlawhai kha a that tâwl a.

⁴Nisienlakhawm, an nauhai chu a that naw a, LALPA thupêk ang a, Mosie lekhabua dâna ziek angin a thaw lem ta a; “Nauhai ta dingin pahai chu thi naw ni hai a, nauhai chu pahai ta dingin thi bawk naw ni hai; amiruokchu, mi tin mâni suolna senga ding chun thi lem an tih,” tiin.

⁵Chunawa khawm Amazia chun Juda mihai chu a ko khâwm a, Juda le Benjamin chia mi po pohai chu za pâwl hotu hnuoia dâm, sâng pâwl hotu hnuoia dâm an pahnam ang peiin an inumtir a; kum sâwmhni le a chungtienga mi po chu a tiem a, phâw le fei hmang thei, indo dinga fe suok thei ṭhieu le thlangsuok ṭhieu mi nuoi thum an um a.

⁶Chun, tangka talent za khatin Israel rama inthawkin mi huoisen nuoi khat a ruoi bawk a.

⁷Nisienlakhawm, Pathien mi a kuomah a hung a, “Aw lalpa, Israel sipaihai hi nanga ruolin fe ve naw raw hai se, Israelhai kuoma chun LALPA chu a um si naw a; anih, Ephraim mihai po po huomin.

⁸Nisienlakhawm, in fe suok a ni hrim hrim chun, huoitakin thaw la, indonaa chun va hrât rawh, hmêlmahai hmaa chun Pathien chun suktlâwm a ti che; Pathien chun ṭhangpui ding le pei thla dingin thilthawtheina a nei si a,” a ta.

⁹Amazia chun Pathien mi kuoma chun, “Anleh, Israel sipaihai kuoma tangka talent za ka lo pêk ta chu ieng tin am thâwng ei ti leh?” a ta. Pathien mi chun, “Hi nêka tam khawm hi pe ding chein LALPA chu a thei a nih,” tiin a dawn a.

¹⁰Amazia chun, Ephraima inthawka a kuoma sipai hunghai kha an in tienga fe nâwk el dingin a ṭhe thlâk ta a; chuongchun, Judahai chunga chun an lungsen chu nasatakin a chawk ta a, lunginsen ṭiumtak chun in an inlawi nâwk ta a.

¹¹Chun, Amazia chu ân sukhuoi a, a mihai chu a ṭhuoi suok a, Chi Ruoma chun a fe ta a; Seir mihai sîng khat rau chu a hang hne ta a.

¹²Chun, mi dang sîng khat bawk chu Juda mipuihai chun a hringin an ṭhuoi a, lungpui sîpa chun an hung ṭhuoi a, chuongchun, lungpui sîpa inthawk chun an pei thlâk a, an rêng chun an inphit vawng tâwl ta a.

¹³Chun, sipai pâwla mihai chu, indo dinga ama le fe lo dinga Amazia chun a tirkirhai khan Samaria inthawk Beth-horon chenin Juda ram khawpuihai chu an hang rûn a, mi sâng thum an that a, râllâk sum tamtak an lâk bawk a.

¹⁴Chun, Amazia chu Edom mihai that a hung kîr hnung chun, Seir mihai pathien chu a hung lâk a, a pathienhai ni dingin a sie a, an hmaa chun a kûn a, an kuoma chun riminhnikhai a raw ta a.

¹⁵Chuleichun, LALPA lunginsen chu Amazia chunga chun a hung ṭal ta a, a kuoma chun zâwlnei a tir a, a kuomah, “I kuta inthawka an mihai ngei khawm sanhim thei si lo, mipuihai pathienhai chu iengdinga i zawng am a na?” a ti a.

¹⁶Chun, ama le an inbiek zing lai chun lal chun a kuomah, “Lal thurawnpuituah kan siem che am a nih? Fîmkhur rawh; iengdingin am thatin um i ta?” a ta. Chuongchun, zâwlnei chun, “Ka thurâwn chu i pawisa naw a, hi thil hi i thaw leiin, Pathien chun suksiet a tum che a nih ti ka hriet a nih,” a ta, a to ta a.

¹⁷Chun, Juda ram lal Amazia chun thurawn a lâk a, Israel lal Jehu naupa Jehoahaz naupa Joas kuomah mi a tir a, “Hung ta, hmai le hmaisan ngeiah hang inen ei tih,” tiin.

¹⁸Chun, Israel ram lal Joas chun Juda ram lal Amazia kuoma chun mi a tir a, “Lebanona hlingbukin Lebanona Sidar thing kâwlah mi tirin, ‘I naunu kha ka naupa nuhmei dingin pe rawh,’ tiin; chun , Lebanona ramsahai chu an hung a, hlingbuk chu an chîl thlûk ta a.

¹⁹A ni luo, ‘Edom chu ka hang hne a’ i ta, i lungrilin uong dingin a dawm sâng che a ni hi; i inah um ṭawk ṭawk el rawh, i sietna ding chu chawksuok ṭâl dîm nîng a ti; nang tlûng i ta, nang ngei chu, chun nang le chun Juda ram chu tlu bawk a tih,” a ta.

²⁰Amiruokchu, Amazia chun a ngai chuong naw a, an hmêlmahai kuta a pêk theina dinga Pathien ithaw a nih, Edom pathienhai an lo zawng ta lei khan.

²¹Chuongchun, Israel ram lal Joas chu a hang fe a; Juda rama Beth-semesa chun ama le Juda ram lal Amazia chu hmaisan ngeia chun an inen ta a.

²²Israel hmaa chun Juda chan chu a se nâwkzuol ta a; mi tin chu mâni puon ina seng an tlânse ta a.

²³Chun, Israel ram lal Joas chun Jehoahaz naupa Joas naupa Juda ram lal Amazia chu Beth-semesa chun a man a, Jerusalema chun a hung ṭhuoi a, Ephraim tienga dâi kawtkhâra inthawka a kia dâi kawtkhâr chen, tawng za li zet Jerusalem kul chu a vuok chim a.

²⁴Chun, Obed-edom le Pathien ina rângkachak le tangkaruo le bûr le bêlhai po po, lal ina ro thilhluhai le, hrên ding salhai le chun a lâk a, Samaria chun a kîr ta a.

²⁵Chun, Israel lal Jehoahaz naupa Joas thi hnung chun Juda lal Joas naupa Amazia chu kum sâwmpanga a la dam a.

²⁶Chun, Amazia thilthaw danghai, a hmasa le nuhnunghai khawm chu, ngai ta, Israel le Juda lalhai lekhabua chun ziek a ni naw am a nih?

²⁷Chun, Amazia chu LALPA zuinaa inthawka ân herhmang china khan chu Jerusalema chun ama chunga phierrûkna an siem a, Lakis tieng chen a tlânse a, amiruokchu, Lakis tieng chun mi an tir pei a, chutaka chun an that ta a.

²⁸Chun, a ruong chu sakawr chungah an hung lâk a, a thlatuhai laiah David khawpuia chun an phûm ta a.