Read Hmar 2 CHANCHIN SUINA 26 Bible Online

2 CHANCHIN SUINA 26 - Hmar bible

2 CHANCHIN SUINA 26

¹Chun, Juda mihai po po chun Uzzia chu an ṭhuoi a, ama chu kum sâwm paruka upa a na, a pa Amazia hmuna chun lalah an siem ta a.

²Eloth chu a bâwl a, Juda rama chun a pêk nâwk a; chu hnunga chun lal chu a thlatuhai lai chun a in ve ta a.

³Uzzia chun ro a rêl ṭan chun kum sâwmparuka upa a na; Jerusalema chun kum sâwmnga pahni sûng ro a rêl a, a nu hming khawm Jerusalema mi Jekolia a nih.

⁴Ama khawm chun a pa Amazia lo thaw ta ang tak khan LALPA mithmuah thil indik chu a thaw a.

⁵Pathiena thil hmulâwk hrietthiemna nei Zekaria dam sûng po chun Pathien chu zawng dingin ân siem a; LALPA chu a zawng sûng po chu, Pathien chun ân hlawtlingtir bawk a.

⁶Chun, a fe suok a, Philistin mihai ân dopui a; Gath kul le, Jabne kul le Asdod kul chu a suksiet a; chun, Philistin mihai laia le Asdod biela chun khuohai a siem bawk a.

⁷Chun, Philistin mihai le Arabia mihai Gur-baal le Meunima umhai laia chun Pathien chun a ṭhangpui a.

⁸Chuongchun, Ammon mihai chun Uzzia kuomah sie an hung chawi a, a hming chu Aigupta ram lûtna chen rauin a hung inthang ta a; a hung hrât êm êm el ta si a.

⁹Chunawa khawm, Uzzia chun a Kil dâi Kawtkhâr bula dâm, Ruom dâi Kawtkhâra dâm, chun, kul hung kâwina hmuna dâm khan vêngna in insânghai a bâwl a, sipaihai a sie sip a.

¹⁰Thlalêra dâm khawm vêngna in insânghai a bâwl a, tuisunsuohai tamtak a cho bawk a, ran ruol tamtak a nei si a, tlângṭhuta le phaizâwla dâm khawm chun; lo hmun ṭhahai le tlâng rama dâm chun huon puhai le grêp hrui enkawltuhai a nei a, huon siem vêl hi a châk zâwngtak a ni si a.

¹¹Chunawa khawm Uzzia chun indo mi, sipai pâwl, Hanania kut hnuoi, hotu Maaseia le lekhaziektu Jeielin anni tiema an nizât ang peia, a pâwl peia indoa fe suok hlakhai chu a nei bawk a.

¹²Pahnamhai laia ṭhuoituhai, mi hrât khawkhênghai an rênga an nizât chu sâng hni le za ruk an nih.

¹³Anni kut hnuoi a chun sipai inchûkthiem sa, hmêlma chunga lal chu ṭhangpui dinga, thilthawtheina nasatak le va do thei mihai chu nuoi thum, sâng sari le za nga an nih.

¹⁴Chun, Uzzia chun an ta dingin, sipai po pohai ta ding chun, phâwhai, feihai, thîr lukhumhai, indona zakuohai, thalngulhai, dêngvira dinga lunghai le a siemrêl vawng a.

¹⁵Jerusalema chun mi themthiemhai hmusuokin, khâwl lihai, vêngna in insânghaia um ding le, a kia vêngna in insânga ding chun, lunghai le thalhai chu kâp thei dingin, a siem bawk a. Chuongchun, a hming chu nasatakin ân dar a, a suksuol hma po khan chu maktaka ṭhangpuiin a um si a.

¹⁶Nisienlakhawm, a hung hrât chun, a lungril a hung uong a, khawhlotakin a thaw ta a, a Pathien LALPA chunga chun a bawsiet ta a; riminhnik rawna maichâm chunga riminhnik raw dingin LALPA biek ina chun a fe ve ta a.

¹⁷Ama hnunga chun thiempu Azaria chu, LALPA thiempu sâwmriet, mi thil thawtheitak takhai le chun a va lût ve a;

¹⁸lal Uzzia chu an sawisêl a, a kuoma chun, “Uzzia, LALPA kuoma riminhnik raw hi nanga chan a ni naw a, Aron naupasalhai thiempuhai, riminhnik raw dinga sukthienga umhai chan a ni lem; hmun inthienga inthawk hin fe suok rawh; i bawsiet a ni ta si a; LALPA Pathiena inthawka inza i kaina khawm ni chuong bawk naw nih,” an ta.

¹⁹Uzzia chu a lunginsen a; riminhnik chu raw dingin riminhnik râwna mei lâkna chu a kuta chun a um zing a; chun, thiempuhai chunga a lunginsen lai chun, riminhnik râwna maichâm sîra, LALPA ina thiempuhai hmaa chun a bâwka hin inphârna hri a hung suok ta a.

²⁰Chun, thiempu laltak Azaria le thiempu danghai po po chun ama chu an en zing a, chun, ngai ta, a bâwka chun a hung inphâr ta a, chutaka inthawk chun inrangtakin an hnawtsuok ta a; anih, LALPA chun ama chu a hrem tâk lei chun ama ngei khawm chun fe suok chu ân hmaw ta a.

²¹Chuongchun, lal Uzzia chu a thi ni chen chun ân phâr ta a; ân phâr leiin in hranah a um a; LALPA ina inthawk chun tuithlâr a ni ta si a; a naupa Jotham chu lal in enkawltu, ram sûnga mipuihai rorêltu a hung ni ta a.

²²Chun, Uzzia thilthaw, a hmasa le a nuhnunghai khawm Amoz naupa Zâwlnei Isai chun a ziek a.

²³Chuongchun, Uzzia chu a thlatuhai laia chun a in ta a; inphûmna thlân muol lalhai taa chun a thlatuhai lai chun an phûm ta a, “Inphâr a ni annâwm,” an ti si a; chun, a naupa Jotham chun ama aia chun ro a rêl ta a.