Read Hmar 2 CHANCHIN SUINA 28 Bible Online

2 CHANCHIN SUINA 28 - Hmar bible

2 CHANCHIN SUINA 28

¹Ahaz chun ro a rêl ṭanin kum sâwmhnia upa a na; Jerusalema chun kum sâwmparuk sûng ro a rêl a; a thlatu David ang khan LALPA mithmuah thil indik chu a thaw ve naw a;

²amiruokchu, Israel lalhai lampui chu a hraw a, Baal ta ding chun milim a sunga sunghai chu a siem bawk a.

³Chunawa khawm chun Hinnom naupa ruoma chun riminhnik a raw a ; Israel mipuihai hmaa LALPAIN a hnawtsuok khawhri be mihai tirdakumna ang tak chun a nauhai chu meiah ân lûttir bawk a.

⁴Thing hring tin hnuoia le muol haia le, bâwlhmunhaia chun riminhnik a raw a, ân thâwi bawk a.

⁵Chuleichun, LALPA a Pathien chun Suria lal kuta chun ama chu a pêk ta a, ama chu an hung thaw a, a mi tamtakhai chu salah an ṭhuoi a, Damaskaa chun an hung ṭhuoi tâwl ta a. Nasataka thata hnetu Israel lal kuta chun ama khawm chu pêk a ni ta a.

⁶Remalia naupa Peka chun Judai ramah, mi hrât khawkhêng ṭhieu nuoi khat le sîng hni ni khat sûngin a that a; an thlatuhai Pathien LALPA chu an nghatsan leiin.

⁷Chun, Ephraima mi thil thawtheitak Zikri chun lal naupa Maaseia le insûng rorêltu Azrikam le lal dawttu Elkana chu a that bawk a.

⁸Chun, Israel mipuihai chun an unauhai chu sal nuoi hni, nuhmei le naunuhmeihai le naupasalhai leh an ṭhuoi hmang a; chun, râllâk sum tamtak an lâk bawk a; chu râllâk sum chu Samariaa chun an hung lâk a.

⁹Amiruokchu, LALPA zâwlnei chutaka chun a lo um a, a hming chu Oded a nih; ama chu sipai ruol Samariaa hung lût dinghai chu tuok dingin a fe a, an kuoma chun, “Ngai ta u, in thlatuhai Pathien LALPA chu Juda ram chunga chun a lunginsen leiin anni chu an kutah a pêk ta a, chun, anni chu lunginsenin in that a, chu chu vânah a hang tlung tah a nih.

¹⁰Tuhin Juda mipuihai le Jerusalema mihai chu suoknuhai, suokpahaia siem in lungril a na; amiruokchu, in Pathien LALPA chunga nangni ngei bawsietna chu nangnia ngei khawm hin a um ve a ni naw am a nih?

¹¹Chuleiin, tuhin mi lo ngai unla, in unauhai ngei sala in hung ṭhuoihai, salhai chu tirkîr nâwk vawng ro, LALPA lunginsenna ṭiumtak chu in chungah a um si a,” a ta.

¹²Chun, Ephraim mihai laia ṭhuoitu ṭhenkhathai, Johanan naupa Azaria hai, Mesillemoth naupa Berekia hai, Sallum naupa Jehizkia hai, Hadlai naupa Amasa hai chun indonaa inthawka hunghai chu an lo dang a,

¹³an kuoma chun, “Hitaka hin salhai chu in hung ṭhuoi ding a ni nawh: ei bawsietna le ei suolnahai belsa dingin, LALPA chungah bawsietna mîn tluntir in tum a ni hi; ei bawsietnahai chu a nasa êm êm a, Israel chunga hin lunginsenna ṭiumtak chu a um a nih,” an lo ti a.

¹⁴Chuongchun, inrâlthuomhai chun salhai le râllâk sumhai chu hotuhai hmaa le mipui inkhâwmhai hmaa chun an mâksan ta a.

¹⁵Chun, khieng an hming hrila umhai khi an tho a, salhai chu an ṭhuoi a, râllâk thilhai chu anni laia saruoka umhai chu an insiltir a, anni chu an inthuom a, kekawk an inbuntir a, fâk ding le dâwn ding an pêk a, hriek an nâl a, anni laia hrât nawhai po po chu sabengtung chungah an inchuongtir a, an unauhai kuomah, intûm khawpui Jerikoa chun an hung ṭhuoi ta a; chun, chutaka inthawk chun Samariaa chun an kîr nâwk ta a.

¹⁶Chuong hun laia chun lal Ahaz chun Assuria lal chu ama ṭhangpui dinga fiel dingin mi a tir a.

¹⁷Edom mihai chu an hung nâwk a, Juda ram chu an hung rûn a, salah an ṭhuoi tâwl si a.

¹⁸Philistin mihai khawma Juda ram Simtienga phaia khawpuihai chu an hung rûn a, Beth-semes hai, Aijalon hai, Gederoth hai, Soko hai an khawperhai leh, Timna le a khawperhai leh, Gimzo le a khawperhai leh an lâk a, chuongahai chun an um a.

¹⁹Israel lal[5] Ahaz leiin, LALPAIN Judahai chu a hung suktlâwm a; ama chu Judahai chunga nuomtâwka a khawsak lei le LALPA chunga a bawsiet nasa êm leiin.

²⁰Assuria lal Tiglath-pileser chu a kuomah a hung a, ama chu sukdet nêkin a sukrimsi hle a.

²¹Ahaz chun LALPA ina chanvo le, lal nauhai in le lal ina mi chu a lâk suok a, Assuria lal chu a lo pêk a; nisienlakhawm, a ṭhangkaipui chuong naw a.

²²Chuongchun, hi lal Ahaz hi, a lunginzîng hun laia khawm chun LALPA chungah a bawsiet zuol det pei a.

²³Damaska mihai, ama hung rûntuhai pathienhai chu a biek a, ama chun, “Suria lalhai pathienhaiin anni a ṭhangpui leiin, kei khawm an mi ṭhangpui theina dingin an kuomah inthâwi ka tih,” a ta. Nisienlakhawm, ama sietna le Israel ram sûng po po sietna a ni lem ta a.

²⁴Chun, Ahaz chun Pathien ina bûr le bêlhai chu a lâk khâwm a, Pathien ina bûr le bêlhai chu a vuoknawi vawng a;LALPA in kawtkhârhai chu a khâr vawng ta a; chun, Jerusalem kil tina chun ama ta dingin maichâm a siem a.

²⁵Chun, Juda khawpui hmun tamtaka chun Pathien danghai kuoma riminhnik rawna dingin bâwlhmunhai a siem a, a thlatuhai Pathien LALPA chu a chawk lungsen ta deu deu a.

²⁶A thilthaw danghai chu, a nungchang tinrênghai leh, a hmasa le nuhnung khawm chu, ngai ta, Juda le Israel lalhai lekhabua chun ziek an nih.

²⁷Chun, Ahaz chu a thlatuhai laia chun a in ta a, khawpuiah, Jerusalema chun an phûm ta a; Israel lalhai an phûmna hlak thlâna chun an inzâl ve naw a; chun, a naupa Hezekia chun ama aiins ro a rêl ta a.