Read Hmar 2 CHANCHIN SUINA 29 Bible Online

2 CHANCHIN SUINA 29 - Hmar bible

2 CHANCHIN SUINA 29

¹Hezekia chu kum sâwmhni pangaa upa a niin ro a rêl ṭan a; Jerusalema chun kum sâwmhni pakuo sûng ro a rêl a; a nu hming chu Abija, Zekaria naunu a nih.

²A thlatu Davidin a thaw ta ang po po khan, ama khawmin LALPA mithmua thil indik chu a thaw a.

³A rorêl a kum khatna, a thla khatnaa chun LALPA in chu kawtkhârhai a hawng a, a siem ṭha ta a.

⁴Levi mihai le thiempuhai chu a hung lâklût a, saktieng panga hmun âwla chun anni chu a ko khâwm a,

⁵an kuomah a hril a, “Mi lo ngai ta u, nangni Levi mihai; tuhin nangni le nangni insukthieng unla, in thlatuhai Pathien LALPA in chu sukthieng unla, hmun inthienga inthawka tirdakumna chu la suok ro.

⁶Ei thlatuhai khan an lo bawsiet a, LALPA ei Pathien mithmuah thil suol chu an lo thaw ta si a; an ngha hmang a; LALPA umna hmuna inthawk chun an ngha hmang a, an hnung an innghat ta a.

⁷Chun, tuolpûk kawtkhârhai chu an khâr a, khâwnvarhai chu an herhlum ta a, riminhnik khawm an raw ta naw a, Israel Pathien kuoma chun hmun inthiengah pumrawhmang thilinhlânhai khawm chu an inhlân ta bawk naw a.

⁸Chuleiin, LALPA lunginsenna chu Jerusalem le Judahai chunga chun a um a, in mita in hmu ang hin, inhîpna ding le, makti ding le, inzak dingin a siem ta a.

⁹Ngai ta u, ei thlatuhai chu kâwlhnâma suktlâwm an ni ta a, ei naupasalhai, ei naunuhmeihai le ei nuhmeihai chu hi lei hin salah an um ta a.

¹⁰Tuhin, einia inthawka a lunginsenna ṭiumtak chu lâk hmang a ni theina dingin Israel Pathien LALPA le chun thuthlung siem ka lungril a nih.

¹¹Ka naupasalhai, tuhin ngaitha naw ro; riminhnikhai raw a, a rawngbâwltuhai nia, ama rawngbâwl ding le, a hmaa ngîr dingin LALPA chun a thlang ta si cheu a,” tiin.

¹²Chun, Levi mihai chu an tho ta a; Kohath naupasalhai chu: Amasai naupa Mahath le Azaria naupa Joel; Merari naupasalhai chu: Abdi naupa Kis le Jehalelel naupa Azaria; Gerson mi chu: Zimma naupa Joa le Joa naupa Eden;

¹³Elizaphan naupasalhai chu: Simri le Jeuel; Asaph naupasalhai chu: Zekaria le Mattania;

¹⁴Heman naupasalhai chu Jehuel le Simei; Jeduthun naupasalhai chu; Semaia le Uzziel hai chu.

¹⁵Chun, an unauhai chu an ko khâwm a, anni chu an insukthieng a, LALPA in chu sukfai dingin LALPA thuin lal thupêk ang tak chun an lût ta a.

¹⁶Chun, thiempuhai chu LALPA in sûngril lema chun sukfai ding chun an va lût a, LALPA biek in sûnga thil inthiengnaw an hmu po pohai chu LALPA in inhuonna tuol laia chun an hung lâk suok vawng a. Chun, Levi mihai chun Kidron vadung chena lâk hmang dingin an lâk ta a.

¹⁷Chuong chun, thla khatna ni khatnaa chun inhlân thieng chu an ṭan a, chu thla ni riet ni chun LALPA tuolpûka chun an hung tlung a; chuongchun, LALPA in po po chu ni riet sûng chun an inhlân thieng a; thla hmasatak ni sâwmparuk ni chun an zo ta a.

¹⁸Chun, lal inah lal Hezekia kuoma chun an hung a, “LALPA in po po, pumrawhmang thilinhlânna maichâm le chutaka a bûr le bêlhai po po leh, entirna bei siena dawkân le chutaka a bûr le bêlhai po po leh, kan sukthieng vawng ta a.

¹⁹Chunawa chun, bûr le bêl po po, Ahaz rorêl laia a bawsiet laia a dêhâwn po pohai kha kan buotsai a, kan inhlân thieng ta bawk a; ngai ta, tuhin LALPA maichâm hmaa chun an um a nih,” an ta.

²⁰Chun, lal Hezekia chu inhmatakin a tho vak a, khuoa hotuhai chu a ko khâwm a; LALPA ina chun a hang fe ta a.

²¹Chun, bâwngchal pasari, berâmchal pasari, berâmte pasari le, kêlchal pasari Juda mihai le hmun inthieng le ram ta dinga suol thilinhlân dingin an hung lâk a. Chuongchun, Aron naupasal thiempuhai chu LALPA maichâm chunga chuonghai chu inhlân dingin thu a pêk a.

²²Chuongchun, bâwngchalhai chu an hang that a, thiempuhai chun a thisen chu an indaw a; maichâm chunga chun an the a; berâmchal khawm chu an that a, a thisen chu maichâm chunga chun an the a; berâmtehai khawm chu an that a, a thisen chu maichâm chunga chun an the a.

²³Chun, lal le mipuihai hmaa chun suol thilinhlâna dingin kêlchalhai chu an hung lâk hnai a; an kuthai chu an chunga chun an in nghat a;

²⁴thiempuhai chun an that a, an thisen chun maichâm chunga chun suol thilinhlân chu an inhlân ta a, Israel mi po po ta dinga intlanna siempêk dingin pumrawhmang thilinhlân le suol thilinhlân chu Israel mi po po ta dinga thaw ding a nih tiin lal chun thu a lo pêk ta si a.

²⁵Chun, zâwlnei Nathan hai, lal zâwlnei Gad hai le David thupêk ang tak khan Levi mihai chu LALPA ina chun dârbenthekhai leh, perkhuonghai leh, ṭingṭanghai leh ân umtir a; thupêkhai chu a zâwlneihai hmanga LALPA pêk a ni si a.

²⁶Chun, Levi mihai chu David thil rimawi siemhai le chun an ngîr a, thiempuhai chu tawtawrâwthai leh.

²⁷Chun, Hezekia chun pumrawhmang thilinhlân chu maichâm chunga chun inhlân dingin thu a pêk a. Chun, pumrawhmang thilinhlân chu ṭan a ni ruol chun, LALPA hlahai, tawtawrâwthai, Israel lal David thil rimawi siemhai le chun ṭan an ni ve vawng ta a.

²⁸Chun, mipui po po chun Pathien chibai an bûk a, hlasaktuhaiin an sak a, tawtawrâwt puhai chun an mût a; chuong po po chu pumrawhmang thilinhlân chu zo a ni hmakhat chu thaw zing a na.

²⁹Thilinhlân chu an suktâwp chun lal le a kâwla mihai po po chu an kûn a, chibai an bûk a.

³⁰Chu nawa khawm lal Hezekia le hotuhai chun Levi mihai chu Zâwlnei Asaph le David hla phuok chun LALPA inpâkna chu sak dingin thu an pêk bawk a. Chun, lâwmtakin inpâkna hla chu an sak a, an luhai an kûn a, chibai an bûk a.

³¹Chun, Hezekia chun a dawn a, “Tuhin chu LALPA kuoma chun in inpêk ta a, hung hnai unla, lâwmna thilinhlânhai le inthâwinahai chu LALPA ina chun hung inhlân ro,” a ta. Chuongchun, mipuihai le inthâwinahai chu an hung inhlân a; chun, mi a nuom zât zât chun pumrawhmang thilinhlân khawm chu an hung lâk bawk a.

³²Mipuiin pumrawhmang thilinhlân an hung lâk zât chu bâwngchal sâwmsari, berâmchal za khat, berâmte za hni an na; hienghai po po hi LALPA kuoma pumrawhmang thilinhlân dinga pêk an nih.

³³Chun, thil a pêka pumpêk chu bâwngchal za ruk le berâm sâng thum an nih.

³⁴Nisienlakhawm, thiempuhai chu an tlâwm leiin pumrawhmang thilinhlânhai po po chu an inhlip hman naw a, chuleiin, an unau Levi mihai chun sin chu zo fel a ni vawng chenin, anni thiempuhai an inthien chen chu an ṭhangpui tâwl a. (Levi mihai chu thiempuhai nêk chun inthien dingin lungrila chun an khermei lem si a.)

³⁵Pumrawhmang thilinhlân tam tâwktak bâka chun inremna thilinhlân thâuhai le pumrawhmang thilinhlân poa dâwnmi thilinhlânhai an um bawk a. Chuongchun, LALPA ina rawngbâwlna chu ân dawt peia siem fel chu a ni ta a.

³⁶Chun, chuong mipuihai ta dinga Pathienin thil a buotsai ta leiin Hezekia le mipuihai khawm chu an hlim ta a; chuong thil chu inhmaw thuta thaw a ni si a.