Read Hmar 2 CHANCHIN SUINA 3 Bible Online

2 CHANCHIN SUINA 3 - Hmar bible

2 CHANCHIN SUINA 3

¹Chun, Solomon chun Moria tlânga a pa David kuoma LALPA chu ân lâr a, Davidin a lo buotsaina hmun, Jebus mi Ornan hrizâwla a lo thlangna hmun Jerusalema chun LALPA in bâwl chu a ṭan ta a.

²A rorêl a kum lina, a thla hnina, a ni hninaa chun a bâwl ṭan a.

³Pathien in bâwlna dinga Solomonin a lungphûm a phûmhai chu hienghai hi an nih: a dungtieng chu tawnga inkhiin inkhina hmasa dâna chun tawng sâwmruk a na, a khangtieng chu tawng sâwmhni a nih.

⁴Chun, a tuolpûk inpui hmaa mi chu, a dung chu a in khangtieng chen chie, tawng sâwmhni a na, ân sângtieng chu tawng za le sâwmhni a na, a sûng chu rângkachak inthiengin ân luon khum a.

⁵A in lien lem chu fâr thingin ân khum a, rângkachak inthiengin ân luon khum a, a chunga chun intûm thinghai le khaidiet limhai a siem a.

⁶Mawina dingin in chu lunghluhaiin a cheimawi a, a rângkachakhai khawm chu Parvaim rângkachak an nih.

⁷Chutaka a kawtkhârhai, chutaka banghai le kalhai le ṭuong le chu in chu rângkachakin ân luon khum bawk a; bangahai chun cherub limhai a ker bawk a.

⁸Chun, hmun inthieng tak chu a siem bawk a; chu a dungtieng chu a inpui khangtieng ang chiein, tawng sâwmhni a na; a khang khawm chu tawng sâwmhni bawk a nih; chun, rângkachak inthieng talent za ruk laiin ân luon khum bawk a.

⁹Chun, a kilna rikzie chu rângkachak shekel sâwmnga tluk a nih. A pindan chunghnunghai chu rângkachakin ân luon khum a.

¹⁰In inthiengtaka chun cherub pahni a lima cherin[3] a siem a; chuonghai chu rângkachakin ân luon khum a.

¹¹Cherubhai thla chu tawng sâwmhnia sei a na; cherub pakhat thla chu, a in bang va sukin tawng nga a na, a thla khing tieng chu tawng nga bawk a na; cherub dang thla kha a va suk a.

¹²Chun, cherub pakhat dang thla khawm chu bang va tâwkin tawng nga a na, a thla dang pakhat chun cherub thla dang kha va zawmin tawng nga a ni ve bawk a.

¹³Chuongchun, hieng cherub thlahai hin tawng sâwmhni chu an zârhlie a; an kehaiin an ngîr a; an hmaihai chu insûng tieng chu an ngha a.

¹⁴Chun, puonzâr dumpâwl le a senêm le, a senduk le puon zai inhmi a siem a, a chunga chun cherubhai ân chuon bawk a.

¹⁵Chun, in hmatienga chun sûtpui pahni tawng sâwmthum pangaa insâng ve ve a siem a, chuong a lêrtâwpa a hmawrbâwkhai chu tawng nga ve ve an ni bawk a.

¹⁶Chun, hmun inthienga chun khaidiethai a siem a, chuong sûtpuihai lêra chun a thlung a; chun, theibufai za khat a siem bawk a, chuong chu khaidieta chun a khai tâwl a.

¹⁷Biekin tuola chun chuong sûtpuihai chu a phun a, pakhat chu changtieng, a dang chu vawitieng; chun, chu changtienga mi chu a hmingah Jakin ân bûk a, vawitienga mi chu a hmingah Boaz ân bûk bawk a.