Read Hmar 2 CHANCHIN SUINA 31 Bible Online

2 CHANCHIN SUINA 31 - Hmar bible

2 CHANCHIN SUINA 31

¹Chun, hieng thil po po hi zo a ni hnung chun, Israel chutaka umhai po po chu Juda khawpuiahai chun an fe a, lungphunhai chu an suknâwi a, Asera chu an phûrthlûk a; Benjamin le Juda ram po poa bâwlhmunhai le maichâmhai chu an vuok chim vawng a; Ephraim le Manasse rama khawm, a rênga an suksiet vawng hmakhat chun an thaw pei a. Chu, Israel mipuihai chu, mi tin mâni hmun nei sengah, mâni khawpui sengah an kîr ta a.

²Hezekia chun an pâwlhai ang peiin thiempuhai le Levi mihai chu an pâwl a ruotpêk a; mi tin an sinthaw ang peiin, thiempuhai le Levi mihai chu LALPA bûk dai kawtkhârhaia inpâk a, lâwmthu hril a, rawngbâwl a, inremna thilinhlânhai le pumrawhmang thilinhlânhai chu thaw dingin.

³Chun, pumrawhmang thilinhlâna lal chan ding khawm ran a ruot a, anih, LALPA dâna ziek anga zîngtieng le zântienga pumrawhmang thilinhlânhai le, châwlnia pumrawhmang thilinhlânhaia le, thla tharhaia le, ruoiṭhe hunbi neihaia ding chun.

⁴Chunawa khawm, LALPA dâna an hrât theina dingin Levi mihai le thiempuhai chu an chan chu pe ve dingin Jerusalema umhai chu thu a pêk bawk a.

⁵Thupêk chu phuongdar a ni phing le chun Israel mipuihai chun bu dâm, uoin dâm, khuoizu dâm le lo hmasuok po poa ra hmasatakhai chu tamtak el an hungpêk tâwl a; thil po poa sâwma pakhat khawm tamtak el an hung pêk tâwl a.

⁶Juda ram khawpuihaia um Juda le Israel mipuihai chun bâwng le berâmhaia sâwma pakhat dâm, an Pathien LALPA kuoma thilinhlân sukthieng tahai dâm chu an hung chawi a, a bûm bûmin an hung sie a.

⁷Thla thumnaa chun thil siekhâwm chu an ṭan a, thla sarinaa chun an zo ta a.

⁸Chun, Hezekia le hotuhai chu an hung a, thil siekhâwmhai chu an hmu chun LALPA le a mi Israelhai chu an inpâk a.

⁹Hezekia chun Levi mihai le thiempuhai chu thil siekhâwm chungthu chu ân dawn a.

¹⁰Zadok sûngkuoa mi, thiempu laltak Azaria chun a dawn a, “Mipui haiin LALPA ina an thilpêkhai an hung chawi china chun kan fâkin a huntâwk kan nei ta a; a chuong tamtak hman kan nei rau a; LALPA chun a mihai chu mal a sâwm si a, hi siekhâwm nasatak hi kan fâk mahla chu a ni hi,” an ta.

¹¹Chun, Hezekia chun LALPA ina chun, pindanhai buotsai dingin thu a pêk ta a; chun, an buotsai ta a.

¹²Chun, thilpêkhai, sâwmapakhat pêkhai, thilinhlânhai chu ringumtakin an hung lâk a; chu chunga chun Levi mi Konania chu a rorêltu a nih; a unaupa Simei chu a dawttu a na.

¹³Chun, Jehiel, Azazia, Nahath, Asahel, Jerimoth, Jozabad, Eliel, Ismakia, Mahath le Benaia chu, Pathien in rorêltu Azaria le lal Hezekia ruotin, Konania le a unaupa Simei hnuoia enkawltuhai an nih.

¹⁴Chun, saktieng dâi kawtkhâr vêngtu Levi mi Imna naupa Kore chu thil inthiengtakhai le, LALPA kuoma thilpêkhai chu sem dinga, Pathien kuoma mâni nuomthua thilinhlânhai chunga hotu a nih.

¹⁵Ama hnuoia chun Eden, Miniam- in, Jesua, Semaia, Amaria le Sekania hai, thiempuhai khawpuihaia an sin ruotahai chun, an unauhai chu, a chîn le lien kuoma an chan chit chu sem dingin an um bawk a;

¹⁶pasal tienga inthla dâna suiin, kum thuma[6] upa chin chung tienga mi, LALPA ina lût taphawt elhai kha, an pâwl ang peia an rawngbâwlnaa an sin chan an ni tin chan ang pei a fe hlakhai tiem lovin;

¹⁷Levi mihai le an pahnam ang pei a, thiempuhai inthla sâwng dâna kum sâwmhni le a chungtieng mi po po an pâwla an chan ang chun an ruot a;

¹⁸chun, thiempuhai chu, an nau le têhai inthla sâwng dânah, an nuhmeihai, an naupasalhai, an naunuhmeihai mipui laia po po chun, an rawngbâwlna dinga ruot senga chun inthiengna dingin an inhlânthieng tâwl a;

¹⁹thiempu Aron naupasalhai an khawpuihai khaw hmawr phûla umhai khawm chun, khawpui tamtak elahai chun, Levi mihai laia inthla dâna tiem sa po pohai le thiempuhai laia pasal po pohai kuoma an chanhai sempêk dingin, an hming suota ruot an um bawk a.

²⁰Chuong ang tak chun lal Hezekia chun Juda ram sûng po poa chun a thaw suok vawng a; a Pathien LALPA hmaa ringumna le, thil indik le thil ṭha chu a thaw ta a.

²¹Chun, LALPA ina rawngbâwlna sin a thaw tinrênga le, dâna le, thupêkahai chun, a Pathien chu zawng dingin lungril po poin a thaw hlak a; a hlawtling ngei a.