Read Hmar 2 CHANCHIN SUINA 32 Bible Online

2 CHANCHIN SUINA 32 - Hmar bible

2 CHANCHIN SUINA 32

¹Hi ringumna le hieng thilhai thaw a ni hnunga hin Assuria lal Sennakerib chu a hung a; Juda ram a hung lût a, khawpui kulneihai chu ân huol a, ama ta dinga hne el dingin a ngaituoh a.

²Chun, Hezekia chun Sennakerib chu a hung a, Jerusalem hung do a tum a nih ti a hriet chun,

³khawpui puotienga tuikhur tuihai chu hrukping dingin a mi thilthawtheihai le a upahai chu a rawn ta a; chun, ama chu an ṭhangpui ta a.

⁴Chuongchun, mipui nasatak el chu an pung ta a; tuikhur po po le, ram laia tui luong vadungtêhai po po chu an hrukping ta vawng a, “Iengdingin am Assuria lal chu hungin, tui tamtak hung nei el a ta?” an ti a.

⁵Chun, ân sukhuoi a, kul se tahai po po chu a siem ṭha a; chutaka chun kuldâi danghai le râl vêngbûkhai chu a bâwl bawk a; chun, David khawpuia Millo chu a sukdet a, hriemhai le phawhai chu tamtakin a siem a.

⁶Chun, mipuihai chunga chun indona hotuhai chu a ruot a, khawpui dâi kawtkhâr bula hmun âwl liena chun ama kuomah a ko khâwm tâwl a; an kuoma chun thlamuongumtakin thu a hril a,

⁷“Hrât unla, insukhuoi ro, Assuria lal lei chun ṭi naw unla, beidawng bawk naw ro; ama kuoma um mipui nasatakhai lei khawm chun, ama kuoma um nêk chun eini kuoma um chu a hrât lem si a;

⁸ama kuoma chun tisaa sipai pâwl an na, amiruokchu, eini kuoma chu LALPA ei Pathien chu mi ṭhangpui ding le ei indona chu do dingin a um a nih,” tiin. Chun, mipui chu Juda lal Hezekia thuhrila chun an sâwldam hle a.

⁹Hi hnunga hin Assuria lal Sennakerib chun Jerusalemah a siehlaw a hung tir a (ama chu Lakis tlung hma el khan a um a, a sipaihai po po khawm ama kuoma chun an um a) Juda lal Hezekia le Jerusalema Juda umhai po po kuoma chun a hung tir a.

¹⁰“Assuria lal Sennakerib chun hieng hin a tih, ‘Jerusalem lâk chu ieng am a na in ring nawna?

¹¹Hezekia hin, Assuria lal kuta inthawk chun LALPA ei Pathien chun mi sansuok a tih, tiin dangchâr le ṭâma inthitir el ding cheuin a thlêmthlûk cheu a ni naw am a nih?

¹²Hi Hezekia bawk hin bâwlhmunhai le maichâmhai chu a lâkhmangin, Juda ram le Jerusalema mihai chu, maichâm pakhat hmaa chun Pathien chibai bûk in ta, a chunga chun riminhnik khawm in raw ding a nih, tia thu pe kha?

¹³Kei le ka thlatuhai chun ram tin, hnam tin chunga chun ieng angin am kan thaw hlaka ti in hriet naw am a nih? Hieng ramhaia hnamhai pathienhai hin ka kuta inthawkin an ram ieng kawng khawmin an sanhim thei hlak am a nih?

¹⁴Ka puhaiin an lo sukbohmang letdêr ta hnamhai pathien po po lai chun tu am ka kuta inthawka a mihai sansuok thei ding a um a, in Pathien khawm chun ka kuta inthawkin a sansuok theina bîk ding cheu chu?

¹⁵Chuleiin, tuhin Hezekia hin hlêm naw raw se cheu, hieng ang kawng hin thlêmthlu bawk naw raw se cheu, nangni khawma ring hrim hrim naw ro; ka thlatuhai le keima kuta inthawk hin, tu ram amanih, tu hnam amani pathien chun a mihai chu a sansuok thei hrim hrim ngai si naw a; ka kuta inthawk hin in Pathien chun a va sansuok thei âwm naw cheu de aw!’ ” tiin.

¹⁶Chun, a siehlawhai chun LALPA Pathien chunga le a siehlaw Hezekia chunga chun hi nêk hman hin an la hril siet nasa det lem a.

¹⁷Israel Pathien LALPA chu hrilse dingin lekha a ziek a, ama kal zâwnga thu hril dingin, “Ram tina hnam tin pathienhai chun ka kuta inthawk hin an mihai an sansuok ngai naw angin, Hezekia Pathien khawm hin ka kuta inthawkin a mihai chu sansuok bîk naw nih,” tiin.

¹⁸Chun, khawpui chu an lâk el theina dingin Jerusalema mi umhai, kula umhai chu suklâu ding le, sukbuoi dingin Juda ṭawngin râwl inringtakin an khêk khum a.

¹⁹Chun, Jerusalema Pathien chu hnuoia hnamhai pathienhai, mihriem kutsuokhai anga chun an hril a.

²⁰Chun, lal Hezekia le Amoz naupa zâwlnei Isai chu hi thu lei hin an ṭawngṭai a, vân tieng nghain an khêk a.

²¹Chun, LALPA chun vântirko a hung tir a, ama chun Assuria lal riebûka mi hrât khawkhênghai po po le ṭhuoituhai le hotuhai po po chu a sukhlum a. Chuongchun, hmai thûmtakin a ramah a kîr nâwk ta a. Chun, ama chu a pathien ina a hung lût laiin ama rîla rasuokhai ngei chun chutaka chun kâwlhnâmin an that ta a.

²²Chuongchun, LALPA chun Hezekia le Jerusalema umhai chu Assuria lal Sennakerib le mi danghai kuta inthawk chun a sanhim ta a, an vêla mihaia inthawk chun a vêng a.

²³Chun, mi tamtak chun Jerusalemah LALPA kuomah thilpêkhai le, Juda lal Hezekia kuomah thil hluhai an hung chawi a; chuongchun, chutaka inthawk chun hnam po pohai mithmua chun chawimawiin a um ta a.

²⁴Chuong lai chun Hezekia chu thi ngamin a na ta a, chun LALPA kuomah a ṭawngṭai a; chun, ama kuoma chun thu a hung hril a, inchikna a hung pêk a.

²⁵Nisienlakhawm, ama chunga ditsakna thaw ang huin Hezekia chun a ngaisak nâwk ta naw a; a lungril chu ân ngaisâng si a; chuleichun, ama chunga chun lunginsenna chu a um a, Jerusalem le Juda ram chunga khawm chun.

²⁶Amiruokchu, Hezekia chun a lungril chapona chu ân sîr nâwk a, ân sukhnuoi a; ama le Jerusalema umhai le chun; chuongchun, Hezekia dam sûng khan chu LALPA lunginsenna an chunga a hung tlung ta naw a.

²⁷Hezekia chun ropuina le hausakna nasatak el chu a nei a; tangka dâm, rângkachak dâm, lung mantam dâm, riminhnik dâm, phawhai dâm, bûr le bêl ṭha tinrênghai ta dingin siekhâwmna inhai ama ta dingin a siem a;

²⁸hriek le uoin le bu hung punghai dinga siekhâwmna inhai dâm, ran ruolhai ta dinga inhai le, sa chi tinrêng po po ta dinga inhai a siem bawk a.

²⁹Chunawa khawm chun bâwng ruol dâm, berâm ruol dâm, khawpuihai dâm tamtak el a nei bawk a, Pathien chun thil tamtak el ama chu a pêk si a.

³⁰Hi Hezekia bawk hin Gihon tuikhur hnâr sakhnung lem kha a hrukping a, David khawpui thlangtieng panga khan a lâk thlâk a. Hezekia chu a sinthaw po poa chun a hlawtling pei a.

³¹Nisienlakhawm, Babulon lalhai, chu rama thilmakhai chu indawn suok dinga a kuoma mi hungtirhai chungthua chun, a lungrila umhai po po chu a hriet theina dingin, fie dingin Pathien chun ama chu a thlathlam a.

³²Hezekia thilthaw danghai le, a thilthaw ṭhathai chu, ngai ta, Israel le Juda lalhai lekhabua chun, Amoz naupa zâwlnei Isai thil hmulâwkhaia chun ziek a nih.

³³Chun, Hezekia chu a thlatuhai lai a in ta a; David naupasalhai thlân in hang kainaa khan an phûm a; Juda mi po po le Jerusalema um po po chun a thi ni chun ropuitakin an râl a. Chun, a naupa Manasse chun ama aia chun ro a rêl ta a.