Read Hmar 2 CHANCHIN SUINA 33 Bible Online

2 CHANCHIN SUINA 33 - Hmar bible

2 CHANCHIN SUINA 33

¹Manasse chu ro a rêl ṭan chun kum sâwmpahnia upa a na, Jerusalema chun kum sâwmnga panga sûng ro a rêl a.

²Ama chun LALPAIN Israel mihai hmaa a hnawt suokhai, khawhri be mihai tirdakumna ang chun LALPA mithmuah thil ṭha naw chu a thaw a.

³A pa Hezekiain a lo suksiet ta hnung bâwlhmunhai kha a siem ṭha nâwk a; Baal ta dingin maichâmhai a dâw thar nâwk bawk a; Asera a siem a, vâna thil umhai po po chu chibai a bûk a, an rawng a bâwl bawk a.

⁴Chun, LALPA ina chun mâichâmhai a siem a, LALPA chun a kuoma, “Jerusalema hin ka hming chu kumkhuoin um zing a tih,” a tinaa chun.

⁵LALPA in tuolpûk pahnia chun vâna thil umhai po po ta ding chun maichâmhai a siem a.

⁶Hinnom naupa ruoma chun a naupasalhai chu meiah ân hlân a; aisân a hmang a, zâwldiaihai a hmang a, dâwi a hmang bawk a, thlarau zâwlhai a ruoi bawk a, thiemrauhai leh; LALPA mithmua chun thil suol nasatak el ama chu suklungsen dingin a thaw ta a.

⁷Chun, milim kerṭielhai, ama siem chu LALPA ina chun a sie a; chu chungthua chun Pathien chun David le a naupa Solomon kuoma chun, “Hi ina le Jerusalema khawm, Israel hnam po po laia inthawka ka thlang suoka hin, kumkhuoa dingin ka hming chu sieng ka ta,

⁸in thlatuhai ta dinga ram ka iruot a inthawk chun Israel kepha chu sawn ta bawk naw ning a; Mosie hmanga thupêkhai, thuruothai, dânhai po po, anni thu ka pêkhai po po chu an thaw phawt chun,” a lo tina LALPA ina chun a sie a nih.

⁹Manasse chun Juda le Jerusalema umhai chu ân suksuoltir a; chuongchun, Israelhai hmaa LALPAIN a sukbohmang hnamhai nêk hman khan thil suol an thaw nasa lem a.

¹⁰Chuongchun, Manasse le a mihai kuoma chun LALPA chun thu a hril a, nisienlakhawm, an pawisa naw a.

¹¹Chuleiin, LALPAIN Assuria lal sipai hotuhai chu a hung ṭhuoi a, Manasse chu khaidietin an khit a, thîr kawl an inbuntir a, Babulonah an fepui ta a.

¹²Chuongchun, rimsitaka a hung um huna chun LALPA a Pathien chu a zawng a, a thlatuhai Pathien hmaa chun ama le ama chu nasatakin ân sukhnuoi ta a.

¹³Chun, ama kuoma chun a ṭawngṭai a, ama chu dawnsakin a um a, a hnina chu ngaiin a um a, ama ramah, Jerusalema chun hung ṭhuoi nâwkin a um ta a. Chun, Manasse chun LALPA chu Pathien a nih ti a hriet ta a.

¹⁴Chun, hi hnunga hin Nga dai Kawtkhâr lûtna, phairuom a, Gihon sîr thlang a, David khawpui dang a puo lema chun kul a bâwl a; Ophel tieng a sukkuol a, insângtakin a suksâng a; chun, Juda rama khawpui kul neiahai chun hotu thilthawtheitakhai a sie tâwl a.

¹⁵Chun, Pathien danglamhai le, milimhai chu LALPA ina inthawk chun a lâk suok a, LALPA in tlânga maichâm a lo siem tahai po po le, Jerusalema mihai le khan a lâk hmang vawng a; khawpui puoa chun a peihâwn ta a.

¹⁶LALPA maichâm chu a buotsai a, chutaka chun inremna thilinhlânhai, lâwmthu hrilna inthâwinahai ân hlân a, Israel Pathien LALPA rawng chu bâwl dingin Juda mihai chu thu a pêk ta a.

¹⁷Nisienlakhawm, mipuihai chu bâwlhmunhaiah an lân thâwi ta rawp a chu, LALPA an Pathien kuoma chun a nih an inthâwi.

¹⁸Manasse thilthaw danghai le a Pathien kuoma a ṭawngṭaina dâm le Israel Pathien, LALPA hminga a kuoma zâwlneiin a hril thuhai dâm chu ngai ta, Israel lalhai thilthawhai lai chun ziek a nih.

¹⁹A ṭawngṭaina dâm, ama Pathienin a lo ngaisak dânhai dâm, a suolna po po le a bawsietna po po le, bâwlhmun a siemna hmunhai le, ama le ama ân sukhnuoi hmaa Asera a siem dâm le, milim ker a siemhai thu chu, ngai ta, Hozai chanchinbua chun ziek an nih.

²⁰Chuongchun, Manasse chu a thlatuhai lai a in ta a, ama ina ngei chun an phûm ta a, a naupa Amon chun ama aia chun ro a rêl ta a.

²¹Amon chu ro a rêl ṭan chun kum sâwmhni pahnia upa a na; Jerusalema chun kum hni sûng ro a rêl a.

²²A pa Manasse ang bawk khan, LALPA mithmuah thil suol chu a thaw a; Amon chu a pa Manassein milim ker a lo siem tahai po po kuoma khan ân thawi a, an rawng a bâwl a.

²³A pa Manasse ân sukhnuoi ta ang khan ama hi chu LALPA hmaa chun ân sukhnuoi ve naw a; chuongchun, hi Amon hi chu a suol nasa deu deu ta a.

²⁴Chun, a siehlawhai chun ama chu an phierrûk a, ama in sûnga ngei chun an that ta a.

²⁵Amiruokchu, chu rama mihai chun lal Amon phierrutuhai po po an that a; chun, chu rama mipuihai chun a naupa Josia chu ama aia chun lalah an siem ta a.