Read Hmar 2 CHANCHIN SUINA 34 Bible Online

2 CHANCHIN SUINA 34 - Hmar bible

2 CHANCHIN SUINA 34

¹Rorêl a ṭan chun Josia chu kum rieta upa a na, Jerusalema chun kum sâwmthum pakhat sûng ro a rêl a.

²LALPA mithmuah thil indik chu a thaw a, a thlatu David lampuihai chu a hraw a, changtienga manih, vawitienga manih khawm a pêthmang naw a.

³Naupang a la ni laiin, a rorêl a kum rietnaa inthawk chun a thlatu David Pathien chu a zawng ṭan a; chun, kum sâwmpahninaa chun Juda ram le Jerusalem chu Asera dâm, milim a kera kerhai dâm, milim a sunga sunghai dâm le bâwlhmun po poa inthawk chun a sukthieng ṭan ta a.

⁴Ama hmaihmaa ngei chun Baal maichâmhai chu a sukchim a; nisa milimhai, chuonghai chung daia umhai chu a phûr thlûk a; Asera le milim a kera kerhai le a sunga sunghai chu a vuok nâwi vawng a, pilvutin a siem a, an kuoma lo inthâwi hlaktuhai thlân chungahai chun a phul a.

⁵Chun, thiempuhai ruhai chu an maichâmhai chunga chun a raw a, Juda ram le Jerusalem chu a sukthieng a.

⁶Chun, Manasse le Ephraim le Simeon khawpuihaia, Naphtali chenin, an sietna hmun vêlahai chun chuong ang chun a thaw bawk a.

⁷Chun, maichâmhai chu a sukchim a, Asera chu, milim a kera kerhai le chun a vuok nâwi vawng a, Israel ram po poa inthawk chun nisa milimhai po po chu a phûr thlûk vawng a, Jerusalema chun a kîr nâwk ta a.

⁸Chun, chuonga ram le in chu a sukthieng laia a rorêlna a kum sâwm pariet kum chun, Azalia naupa Saphan hai, khawpui sûng rorêltu Maaseia hai, Joahaz naupa Joa, thil inchiktuhai chu a Pathien LALPA in chu siem ṭha dingin a tir ta a.

⁹Thiempu laltak Hilkia kuoma chun an hung a, Levi mi kawtkhâr vêngtuhaiin Manasse le Ephraim mihai kuta inthawk le, Israel mi a la um sun po poa inthawk dâm, Juda le Benjamin mi po poa inthawk dâm, Jerusalema chêngtuhaia inthawka an lâk khâwmhai, Pathien ina sum hung lâka umhai kha, an hung pêk a.

¹⁰Chun, chu chu LALPA in enkawlna sin thawtuhai kuta chun an pêk a; chun, LALPA ina sinthawtuhai chu in siem ṭhatna ding le bâwl ṭhatna ding chun an pêk a,

¹¹in bâwltuhai le thingrem siemtuhai kuoma lung saksahai, thing a zawmna dinghai inchâwkna ding le, Juda lalin a lo suksiet tah in bâwlna dinga thingtumhai siemna dingin.

¹²Mihai chun sin chu ringumtakin an thaw a; annihai enkawltuhai chu Merari naupasalhai, Levi mi Jahath le Obadia hai; Kohath mi naupasalhai Zekaria le Mesullam hai chu an nih; Levi mihai, thil ri sutna thilhaia themthiem taphawthai chu.

¹³Chun, phurrik phurtuhai enkawltuhai khawm an ni bawk a, rawngbâwlna sin chu kawng ieng anga khawm an enkawl pei a; chun, Levi mihai chu ziektuhai, hotuhai le kawtkhâr vêngtuahai an um a.

¹⁴Chun, LALPA ina tangka lâk lûta um chu an hung lâk suok chun, Hilkia chun Mosiein a pêk, LALPA dân lekhabu chu a hmusuok a.

¹⁵Chun, Hilkia chun a dawn a, lekhaziektu Saphan kuoma chun, “LALPA ina chun dân lekhabu chu kan hmusuok tah,” a ta. Chuongchun, Hilkia chun lekhabu chu Saphan kuoma chun a pêk ta a.

¹⁶Saphan chun lekha chu lal kuoma chun a chawi a; Saphan chun lal kuoma chun thu a hung intlun nâwk a, “I siehlaw hai kuoma thaw dinga pêk ang khan an thaw a;

¹⁷LALPA ina tangka hmua um kha an bun suok a, sinthawtuhai kuta le a enkawltuhai kuta chun an pêk suok ta a,” tiin.

¹⁸Chun, ziektu Saphan chun lal kuoma chun, “Thiempu Hilkia chun lekhabu a mi lo pêk a,” a ta. Chun, chutaka chun Saphan chun lal hmaa chun a tiem ta a.

¹⁹Chun, lal chun dân thuhai chu a hriet chun a puonhai a keithlêr a.

²⁰Chun, lal chun Hilkia hai, Saphan naupa Ahikam hai, Mika naupa Abdon hai le lekhaziektu Saphan le lal siehlaw Asaia chu thu a pêk a,

²¹“Fe unla, kei le, Juda le Israel rama mâksana la umhai ta ding hin lekhabu hmu suoka um thu ang khan LALPA mi hung râwnpêk ta u; lekhabua ziek po po, ang taka thaw dinga, ei thlatuhai chun LALPA thu chu an lo pawm ta naw lei khan, LALPA lunginsenna ei chunga bunthlâka um hi a nasa a nih,” tiin.

²²Chuongchun, Hilkia le lalin a tirhai po po chu, silfên vêngtu Hasra naupa Tokath naupa Sallum nuhmei, zâwlneinu Hulda kuoma chun an fe ta a, (chuong lai chun Jerusalema vêng pahninaa chun a um a nih), a kuoma chun chuong thua chun thu an hril ta a.

²³Ama chun an kuomah, “Israel Pathien LALPA chun hieng hin a tih, ‘Ka kuoma nangni hung tirtu cheu kuoma chun hieng hin hril ro,

²⁴LALPA chun hieng hin a tih, Ngai ta u, hi hmuna le hi hmun hluotuhai chunga chun thil ṭha naw ka hung intlungtir ding a nih; Juda ram lal hmaa an tiem tah lekhabua khâng ṭawngsiehai po po kha,

²⁵kei an mi lo nghatsan ta a; an kut sinthawhaia lunginsen dinga an mi chawktho theina dingin pathien danghai kuoma chun riminhnikhai an raw a; chuleiin, ka lunginsenna chu hi hmun chunga hin bunthlâk a ni ta a, sukre el ni ta naw nih,’ tiin.

²⁶Amiruokchu, Juda lal, LALPA chu thu indawn dinga tirtu cheu kuoma chun hieng hin hril in ta, Israel Pathien LALPA chun hieng hin a tih, ‘Thu i lo hriet ta chungthua chun,

²⁷hi hmun le a sûnga chênghai chungthua, thuhai chu i hriet phinga i lungril ân nêm a, nangma le nangma chu Pathien hmaa chun în sukhnuoi leiin le, i puonhai i keithlêr a, ka hmaa chun i ṭap leiin kei khawma ka hung hriet ve che a nih.

²⁸Ngai ta, i thlatuhai kuomah infetir ka ti che a, i thlâna chun thlamuongtakin fêng i ta, hi hmun le a sûnga umhai chunga thil ṭha naw ka hung intlungtir dinghai po po chu i mithaiin hmu naw nih a tih,’ ti ro,” a ta. Chuongchun, lal chu, thu chu an hung intlun nâwk a.

²⁹Chun, lal chun mi a tir a, Jerusalem le Juda rama upahai po po chu a ko khâwm ta a.

³⁰Chun, lal chu LALPA ina chun a hang fe a; Juda rama mi po pohai le Jerusalema chêngtuhai le, thiempuhai le Levi mihai le, mi po po a chîn a lienin an hang fe ve a; LALPA ina thuthlungna lekhabu hmua um sûnga thuhai po po an na hrieta chun a tiem ta a.

³¹Chun, lal chu a hmuna chun a ngîr a, LALPA chu zui a, a thupêkhai, a thuinhriettirhai, a thuruothai chu a lungril po po le a lungvar po poa zâwm a, lekhabua thuthlung thu zieka umhai po po chu thaw dingin LALPA hmaa chun thuthlung a siem ta a.

³²Chun, Benjamin le Jerusalema umhai po po chu chuong anga um dingin a ti a. Jerusalema chênghai chun an thlatu Pathien, Pathien thuthlung ang chun an thaw a.

³³Chun, Josia chun Israel mihai ihluo ram po poa inthawk chun tirdakumna po po chu a lâk hmang a, Israel rama umhai po po LALPA an Pathien rawng chu ân bâwltir a. A dam sûng po po chun an thlatuhai Pathien LALPA zuinaa inthawk chun an pêthmang naw a.