Read Hmar 2 CHANCHIN SUINA 35 Bible Online

2 CHANCHIN SUINA 35 - Hmar bible

2 CHANCHIN SUINA 35

¹Josia chun LALPA kuoma fekân ruoiṭhe chu Jerusalema chun a hmang a; thla hmasa tak ni sâwmpali ni chun fekân ruoiṭhena ding chu an that a.

²Thiempuhai chu an sinthawahai[7] chun a ruot a, LALPA in rawngbâwlnaa ding chun ân fui tâwl a.

³LALPA ta dinga inthieng Israel po po inchûktir hlak Levi mihai kuom a chun, “Israel lal David naupa Solomonin in a bâwla khan Thuthlungna bâwm inthieng chu sie ro; in liengkoahai zâwn ngâi ta naw ni a; tuhin in Pathien LALPA le a mi Israelhai rawng chu bâwl ro.

⁴Nangni khawm Israel lal David ziek ang le, a naupa Solomon ziek ang tak khan an pahnam ang peiin in pâwl bi chu insiem unla.

⁵Chun, Levi hnam inṭhe dân ang pei le, in unau mipuihai pahnam inṭhe dân ang pei chun hmun inthienga chun ngîr unla.

⁶Chun, fekân ruoiṭhena ding chu that unla, nangni le nangni chu inhlân thieng ro; Mosie hmanga LALPA thu ang tak kha thaw dingin in unauhai ta ding khawm chun buotsai bawk unla,” a ta.

⁷Chun, Josia chun chu hnam mipui, a umhai po kuoma chun ran ruol laia mi berâmte dâm, kêlte dâm sîng thum le bâwngchal sâng thum fekân ruoiṭhenaa inhlân dingin a pêk a; hi hi lal suma mi a nih.

⁸Chun, a hotuhai chun Levi mihai le thiempuhai le mipui kuoma chun nuom thua thilinhlân dinghai chu an pêk bawk a. Hilkia le Zekaria le Jehiel, Pathien in rorêltuhai chun thiempuhai kuoma chun fekân ruoiṭhena dingin ran chîn sâng hni le za ruk le, bâwngchal za thum an pêk a.

⁹Konania le a unauhai Semaia le Nethanel le, Levi mihai hotuhai Hasabia le, Jeiel le, Jozabad chun Levi mihai kuomah fekân ruoiṭhenaa thilinhlân dingin ran ruol chîn sâng nga le bâwngchal za nga an pêk bawk a.

¹⁰Chuongchun, rawngbâwlna chu buotsai a ni ta a, lal thupêk ang tak chun thiempuhai chu an hmuna chun an ngîr a, Levi mihai chu an pâwl dân ang peiin an thaw ta a.

¹¹Chun, fekân ruoiṭhena ding chu an that a, thiempuhai chun an kutin thisen chu an the a, Levi mihai chun an inhlip a.

¹²Chun, pumrawhmang thilinhlânhai chu an sie hmang a, Mosie lekhabua ziek anga LALPA kuoma inhlân dinga, chu hnam thlahai pahnam inṭhe dân ang peia an pêk suok theina dingin. Chuongchun, bâwngchalhai khawm chu chuong ang bawk chun an thaw a.

¹³Chun, fekân ruoiṭhena ding chu dân ang peiin meiah an em hmin a, chun, thilinhlân inthienghai sa kha chu bêlhai le, bêl bau ûmhai le, bêl indarhaiin an suong a, mi po pohai kuoma chun inhmâwtakin an fepui ta a.

¹⁴Chun, chu hnunga chun anni ta ding le thiempuhai ta ding chun an buotsai ta a; Aron naupasalhai thiempuhai chun pumrawhmang thilinhlân le a thâuhai chu zân chenin an buoipui ta a; chuleiin, Levi mihai chun anni le Aron naupasal thiempuhai ta ding chun an buotsai el a nih.

¹⁵Chun, David le Asaph le Heman le lal zâwlnei Jeduthun thupêk angin hlasaktuhai, Asaph naupasalhai chu an hmuna chun an um a; chun, kawtkhâr vêngtuhai chu dâi kawtkhâr tina chun an um bawk a; an sinthawhai chu an mâksan a ṭûl naw a, an unau Levi mihai chun an ta dingin an buotsaipêk leiin.

¹⁶Chuongchun, lal Josia thupêk angin, LALPA rawngbâwlna po po chu ni khat sûngin, fekân ruoiṭhe hmang ding le LALPA maichâm chunga pumrawhmang thilinhlân inhlân ding chu, buotsai vawng a ni ta a.

¹⁷Chun, Israel mipui chutaka umhai chun chu nia chun fekân ruoiṭhe chu an hmang a, chawlṭhanglo bei ruoiṭhe chu ni sari an hmang bawk a.

¹⁸Zâwlnei Samuel hun laia inthawk ta khan chuonga fekân ruoiṭhe chu Israel rama lal tu khawma Josiain a hmang ang hin an hmang ngai naw a, thiempuhai le Levi mihai le, Israel le Juda chutaka umhai po po le, Jerusalema chênghai khawma an hmang ngai naw a.

¹⁹Josia rorêl a kum sâwmparietnaa chun a nih a hi fekân ruoiṭhe hi hmanga a um chu.

²⁰Hieng po po hnunga hin, Josia chun biekin chu a siem ṭha zo chun Aigupta lal Neko chu Euphrates vadung panga Karkemis chu rûn dingin a hang fe a; Josia chu ama tuok ding chun a fe suok ta a.

²¹Nisienlakhawm, ama chun aiâwtuhai a hung tir a, a kuomah, “Nang Juda lal, nang hi iengtin am ka thaw ding che a na? Vawisûn hi nang do ding chein ka hung naw a, amiruokchu, indona ka neipuihai chu do dingin a ni lem ka hung; chun, Pathien chun inhmaw dingin thu a mi pêk a, Pathien chu sukbuoi lo dingin insûm hrâm la, ama chu ka kuomah a um a, sukbohmang rawi a ti che,” tiin.

²²Nisienlakhawm, Josia chun ama chu a kîrsan chuong naw a, ama chu a do ngei theina dingin, ân sukdanglam a; Pathien baua inthawka Neko thu chu a ngaisak naw a, ama chu Megiddo ruoma do ding chun a suok ta a.

²³Chun, thal kâp mihai chun Josia chu an kâp a, chun, lal chun a siehlaw kuoma chun, “Ka hliem nasa hle el si a, mi sie hmang ro khai,” a ta.

²⁴Chuongchun, a siehlawhai chun sakawr tawlailîra inthawk chun an lâk suok a, a sakawr tawlailîr danga chun an sie a, Jerusalemah an hung ṭhuoi ta a; a thi a, a thlatuhai thlân ina chun phûmin a um ta a, Juda le Jerusalem po poin Josia chu an sûn a.

²⁵Chun, Jeremia khawm chun Josia chu a sûn a; vawisûn ni chen hin, hlasaktu pasal le hlasaktu nuhmeihai khawm chun Josia an sûnna hla chu an lân sam a; Israel rama chun thupêkhaiah an siem a, chuong chu, ngai ta, sûnnaa chun ziek an nih.

²⁶Josia thilthaw danghai le, a thilthaw ṭhathai chu, LALPA dâna ziek ang tak chun,

²⁷a thilthawhai a hmasatak le a nuhnungtak chu, ngai ta, Juda le Israel ram lalhai lekhabua chun ziek a nih.