Read Hmar 2 CHANCHIN SUINA 36 Bible Online

2 CHANCHIN SUINA 36 - Hmar bible

2 CHANCHIN SUINA 36

¹Chun, chu ram mipuihai chun Josia naupa Jehoahaz chu an ṭhuoi a, a pa aia chun Jerusalema lalah an siem ta a.

²Jehoahaz chu ro a rêl ṭan chun kum sâwmhni pathuma upa a na; Jerusalema chun thla thum sûng ro a rêl a.

³Aigupta lal chun ama chu Jerusalema chun ân lalna a suktlâwm a, an ram chu rângkachak talent khat le tangkaruo talent za khat ân chawitir a.

⁴Chun, Aigupta lal chun a unaupa Eliakim chu Jerusalem le Juda ram chunga chun lalah a siem a; a hming chu Jehoiakim in a thleng ta a. Chun, Neko chun a unaupa Jehoahaz chu a ṭhuoi a, Aigupta ramah a fepui ta a.

⁵Jehoiakim chu rorêl a ṭan chun kum sâwmhni pangaa upa a na; Jerusalema chun kum sâwmpakhat sûng ro a rel a; a Pathien LALPA mithmuah thil ṭha naw chu a thaw a,

⁶ama chu doin, Babulon lal Nebukadnezzar chu a hung a, thîrkawlhaiin a khuop a, Babulona ṭhuoi dingin.

⁷Nebukadnezzar chun LALPA ina bûr le bêlhai khawm chu Babulon tieng a phur hmang a, Babulona biekina chun a sie tâwl a.

⁸Jehoiakim thil thaw danghai le, thil tirdakum a thawhai le, amaa hmua umhai chu, ngai ta, Juda le Israel ram lalhai lekhabua chun ziek a nih; chun, Jehoiakin, a naupa chun ama aia chun ro a rêl ta a.

⁹Jehoiakin chu rorêl a ṭan chun kum rieta upa a na, thla thum le ni sâwm sûng Jerusalema chun ro a rêl a. LALPA mithmuah thil ṭha nawhai chu a thaw a.

¹⁰Chun, kum hung inlet nâwka chun Nebukadnezzar chun mi a tir a, ama chu Babulonah, LALPA ina bûr le bêl ṭhahai le chun an hung ṭhuoi a, a unaupa Zedekia chu Juda le Jerusalem chunga chun lalah a siem ta a.

¹¹Zedekia chu rorêl a ṭan chun kum sâwmhni pakhata upa a na; Jerusalema chun kum sâwmpakhat sûng ro a rêl a;

¹²a Pathien LALPA mithmuah thil ṭha naw chu a thaw a; LALPA baua inthawka thuhriltu Jeremia hmaa khawm chun ama le ama chu ân sukhnuoi naw a.

¹³Pathiena ṭawng inkhâmtirtu Nebukadnezzar chunga khawm chun a hel bawk a; Israel Pathien LALPA kuoma kîr dingin, a lungril a sukngar a, ân sukkâwmâw bawk a.

¹⁴Chu nawa khawm chun, khawhri be mihai tirdakumna po po angin mipuihai le thiempu lalhai khawm chun nasatakin an bawsiet a; Jerusalema LALPA in a sukthieng ta chu an sukpawrche ta a.

¹⁵A umna hmun le a mihai chu a lunginsiet leiin, an thlatuhai Pathien LALPA chun an kuoma chun a tirkohai chu a tir a,

¹⁶nisienlakhawm, Pathien tirkohai chu an nuisan a, a thu chu an hmusit a, a zâwlneihai chu an nuiêu a, sukṭhat nâwk theina um ta lo hiel khawpa, mipuihai chunga LALPA lungsenna chu chawkthoa a um hiel chen chun.

¹⁷Chuleichun, an chunga chun Kaldai lal a hung tir a, anni chun hmun inthienghaia chun an tlangvâlhai dâm kâwlhnâmin an that a, tlangvâl amanih, nunghâkhai amanih, upa amanih, tar amani chunga khawm lunginsietna an nei naw a, chuongchun, an rêng chun a kutah a pêk a.

¹⁸Pathien ina bûr le bêlhai, a lien le chînhai khawm, LALPA ina ro siekhâwlhai, lal ina ro siekhâwlhai le, a hotuhai tahai chen khawm chun Babulon tieng a lâk vawng a.

¹⁹Chun, Pathien in chu an raw a, Jerusalem kul chu an vuokchim a, chutaka a lal inhai po po chu meiin an raw a, chutaka bûr le bêl ṭhahai po po chu an suksiet bawk a.

²⁰Kâwlhnâma inthawka lo suok tahai chu Babulon tieng a ṭhuoi a; Persia ram rorêl a ni chen khan anni chu a nauhai le ama siehlawhai an na;

²¹chu ram chun a châwlni a hmang hmakhat chu Jeremia baua LALPA thu kha sukfamkim a ni theina dingin; râusana a um sûng po chu châwlni chu a hmang a na, kum sâwmsari suktling dingin.

²²Persia lal Kura inlal kum khatnaa chun, Jeremia baua LALPA thu sukfamkim a ni theina dingin, Persia lal Kura lungril chu LALPA chun a chawktho a, thuphuong a ram sûng po poa chun a siem a, zieka ziek khawmin a sie bawk a,

²³“Persia lal Kura chun hieng ang hin a tih, Vâna Pathien LALPA chun hnuoi chunga ram po po chu a mi pêk a; Juda rama Jerusalema chun in bâwlpêk dingin a mi ruot ta a. Nangni laia ama mihai taphawt kuoma chun LALPA a Pathien chu um sienla, hang fe raw se,” tiin.