Read Hmar 2 CHANCHIN SUINA 4 Bible Online

2 CHANCHIN SUINA 4 - Hmar bible

2 CHANCHIN SUINA 4

¹Chunawa khawm dârsen maichâm a siem bawk a, a dungtieng tawng sâwmhni, a khangtieng tawng sâwmhni; ân sângtieng chu tawng sâwm.

²Chun, dâr tuizêng inbiel a sunga sungin, a reia inthawka rei khingtieng tawng sâwm, intie vêl vawng, ân sângtieng tawng nga chu a siem bawk a; a rei a vêlin tawng sâwmthum vêltuok a nih.

³Chun, a rei hnuoia chun kumûm ang a vêla vêlsuok, tawng khat pei sâwm seng, tuizêng vêla chun a siem a. Kumûm lim chu tlar hni a na, tuizêng le chun sung kawp a nih.

⁴Bâwngchal lim sâwmpahni chunga inṭhut a na, pathum chun hmârtieng an ngha a, pathumin simtieng, pathumin thlangtieng, pathum bawkin saktieng an ngha a; chu dâr tuizêng chu an chunga chun inṭhut a nih; an hnungtieng chun sûngtieng a ngha seng a.

⁵Chun, kutpha bawka sa a na; a rei chu no rei anga siem a na, lili pâr angin, bath sâng thum dawng a nih.

⁶Insâwpna dingin châwtawl sâwm a siem a, panga chu changtieng pangah a sie a, panga dang chu vawitiengah; chuong thilhai chu pumrawhmang thilinhlânhai kha sâwpnaah an hmang hlak a, tuizêng ruok chu thiempuhai ta dinga insâwpna a nih.

⁷Chun, anni chungthua thupek angin rângkachak sathâu khâwnvar siena sâwm a siem a, chuonghai chu biek ina chun a sie a, panga chu changtieng pangah, panga dang chu vawitiengah.

⁸Chun, dawkân sâwm a siem a, biekina chun a sie a, panga chu changtieng pangah, panga dang chu vawitiengah. Chun, rângkachak thlêngkûm za khat a siem bawk a.

⁹Chu nawa khawm chun thiempuhai tuolpûk le tuolpûk lien a siem a; chuong tuolpûk kawtkhârhai le chun, chuong kawtkhârhai chu dârsenin ân luon khum a.

¹⁰Chun, maihûn chu a in pangah simsaktieng chun ân ṭhut a.

¹¹Chun, Huram chun bêlhai, thlêngkûmhai le suodûrhai chu a siem a. Chun, Huram chun Pathien ina lal Solomon ta dinga a sinthaw chu a thaw zo ta a,

¹²sûtpui pahnihai, maihûnhai, sûtpui lêrhaia a hmawrbâwkhai, sûtpui pahnihai lêra a hmawrbâwkhai inkûm inkhumna dinga ṭiel chik chek lênhai le;

¹³chuong lên pahnihai ta dinga theibufai zalihai le lên pakhat sûtpui hai chunga hmawrbâwkhai inkûm inkhumna ta dinga theibufai tlar hni pei le chun.

¹⁴Chun, suonkuolhai a siem a, châwtawlhai chu suonkuol chunga inṭhutin a siem a;

¹⁵tuizêng pakhat chu a hnuoia bâwngchal sawmpahni leh.

¹⁶Bêlhai, suodûrhai, sakuoikimhai le chutaka bûr le bêlhai po po chu Huram chun LALPA ina ding chun dârsen tle miin lal Solomon ta ding chun a lo siem vawng a.

¹⁷Zereda le Sukkoth inkâra tlakpil hmuna khan Jordan Phairuomah lal chun a lo sung a na.

¹⁸Chuongchun, Solomon chun hieng bûr le bêlhai po po hi tam tâwk takin a siem a, dârsen lem chu a bûk zât khawm hriet suok ruol a ni naw a.

¹⁹Chuongchun, Solomon chun Pathien ina bûr le bêlhai po po chu a siem a, rângkachak maichâm le, entirna bei siena dawkânhai;

²⁰sathâu khâwnvar siena le a khâwnvarhai, hmun inthieng hmaa chun thupêk anga an chawk zing theina ding, rângkachak inthiengin a siem a;

²¹a pârbâwrhai, khâwnvarhai, chaichehai, rângkachakin, rângkachak inthiengin a siem a;

²²khâwnvar vâm chepnahai, châwtawlhai, haihâwhai, meilâknahai chu rângkachak inthieng bawkin; chun, in lûtna chu, hmun inthiengtaka kawtkhâr sûngril lem le, in kawtkhârhai chu rângkachak an nih.