Read Hmar 2 CHANCHIN SUINA 5 Bible Online

2 CHANCHIN SUINA 5 - Hmar bible

2 CHANCHIN SUINA 5

¹Chuongchun, LALPA in dinga Solomonin sin a thaw po po chu zo a ni ta a. Chun, Solomon chun a pa Davidin thil a lo hlân tah tangka dâm, rângkachak dâm, bûr le bêl po pohai chu a hung lâk lût a, Pathien in ro siekhâwmna hmuna chun a sie ta a.

²Chun, Solomon chun David khawpui Ziona LALPA thuthlungna bâwm chu hung la dingin, Israel thlahai pahnamhai laia ṭhuoituhai, hnam tin laia luhai le, Israel upahai chu Jerusalema chun a ko khâwm tâwl ta a.

³Israel mihai po po chu thla sarinaa ruoiṭhenaa chun lal kuoma chun an hung khâwm vawng a.

⁴Israel upahai po po chu an hung a, Levi mihai chun bâwm chu an zâwn ta a.

⁵Chun, bâwm le, intuokna puon in le puon ina bûr le bêl inthienghai po po le chun an zu lâk ta a; hieng thilhai hi thiempu Levi mihai chun an zu lâk a nih.

⁶Lal Solomon le Israel mipui ama hmaa hung inkhâwmhai po po chun berâm le bâwngchal a tam tienga tiem sênglo le hril thei lo chun inthâwiin, bâwm hmaa chun an um a.

⁷Chun, thiempuhai chun LALPA thuthlungna bâwm chu, chu in hmun inthieng, hmun inthiengtaka cherubhai thla zar hnuoia a hmun dinga chun an hung lâklût ta a.

⁸Cherubhai chun an thlahai chun bâwm umna hmun chu an zârkhum a, cherubhai chun bâwm le chutaka a zâwnfunghai chu an inkhum sa si a.

⁹Chun, a zâwnfunghai chu an sei êm a, zâwnfung hmawrhai chu hmun inthieng hmaa inthawkin ân hmu thei a; amiruokchu, puotienga inthawk chun ân hmu thei naw a; chutaka chun tu chen hin a um ta a.

¹⁰Chu bâwm sûnga chun, Aigupta rama inthawka an hung suok laia Israel thlahai kuoma LALPAIN thuthlung a siem laia Mosiein Horeba lungphêk pahni a sie lût chau naw kha chu ieng dang khawm a um naw a.

¹¹Chun, thiempuhai chu hmun inthienga inthawka an hung suok chun, (thiempu chutaka um po pohai chu an pâwl hunbi nghâk kher lovin sukthieng an ni hlak si a;

¹²Levi mi chutaka hla saktuhai khawm chu an rêngin, Asaph hai, Heman hai, Jeduthun hai, an naupasalhai le an unauhai leh puon zai inhmi puona inthuomin, perkhuong leh, ṭingṭang leh dârbenthekhai leh maichâm tâwp saktieng panga chun an ngîr a; anni lai chun thiempu za le sâwmhni tawtawrâwt mûttuhai an um bawk a):

¹³LALPA inpâka, lâwmthu hrila, hla saktuhai le tawtawrâwt puhai chu pakhat ang el a, ri inremtaka hriet a ni hlak a; tawtawrâwthai le, dârbenthekhai le, rimawi thawna thuomhnawhai leh an râwlhai an insuo a, LALPA chu inpâka, “Ama chu a ṭha si a; a zângaina chu kumkhuoin um zing a tih,” an ti pha chun, LALPA in chu sûmin a hung sip hlak a,

¹⁴chuongchun, thiempuhai chu sûm lei chun rawngbâwl dingin an ngîr zing thei ta ngai naw a, LALPA ropuina chun Pathien in chu a hung suksip hlak leiin.