Read Hmar 2 CHANCHIN SUINA 6 Bible Online

2 CHANCHIN SUINA 6 - Hmar bible

2 CHANCHIN SUINA 6

¹Chun, Solomon chun a hril a, “LALPA chun inthim sâmupa chun um ka ti a ta.

²Nisienlakhawm, kumkhuoa chêngna dinga hmun i ta dingin, i ta dinga umna ding in ka bâwlpêk ta che hi,” a ta.

³Chun, lal chu a ngha kîr a, Israel inkhâwmhai po po chu mal a sâwm a; Israel mipuihai po po chu an ngîr ṭhup a.

⁴Chun, ama chun a hril a, “Israelhai Pathien LALPA chu inpâkin um raw se, ka pa David kuoma a baua thu lo hril a, a bânhaia lo sukpuitlingtu chu:

⁵ama chun, ‘Aigupta rama inthawka ka mihai ka ṭhuoi suok nia inthawk tah, Israel hnam po po laia inthawkin, ka hming um zingna dinga in bâwlna dingin khawpui ka ruot naw a; ka mi Israelhai chunga lala um dingin tukhawm ka thlang bawk nawh;

⁶amiruokchu, ka hming umna dingin Jerusalem kha ka thlang a, chun, ka mi Israelhai chunga um dingin David chu ka lo thlang ta a,’ tiin.

⁷Chuongchun, ka pa David lungrila chun Israelhai Pathien LALPA hminga in bâwl nuomna a um a.

⁸Amiruokchu, LALPA chun ka pa David kuoma chun, ‘Ka hming dingin, in bâwl dingin lungril i nei a ni âwm a; hieng i lungrila um hi i thaw ṭha ngawt el;

⁹amiruokchu, in chu nang chun bâwl naw ti ni a, i naupa, i ṭhâla hung pieng ding chun, ka hmingin in chu bâwl lem a tih,’ a ta.

¹⁰Chuongchun, LALPA chun thu a hril ta chu a hung puitling pei a; ka pa David hmuna chun ka hung ngîr ta a, LALPAIN a lo tiem ta angin Israel ram lal ṭhungphaa chun ka ṭhung ta a, Israelhai Pathien LALPA hming ding chun in chu ka bâwl ta a nih.

¹¹Chun, chutaka chun bâwm chu kân ṭhut ta a, Israel mipuihai le LALPAIN thuthlung a lo siem tahai chu chu sûnga chun a um nghe nghe a,” tiin.

¹²Chun, Israel mipui inkhâwmhai po po hmaihmaah, LALPA maichâm hmaah a ngîr a, a bânhai chu a phar a;

¹³(Solomon chun dârsen ṭham tawng ngaa sei, tawng nga bawka lien, tawng thuma insâng a siem a, tuollai sûnga a laitaka a ilo daw ta chunga chun a ngîr a, Israel inkhâwmhai po po hmaa chun a dingṭhaṭhuon a, a kuthai chu vân tieng a phar a nih) ama chun a hril a;

¹⁴“Aw LALPA Israelhai Pathien, an lungril po poa i hmaa khawsa hlakhai i siehlawhai chunga zângaina le thuthlung kawl zingtu nang ang hi, hnuoi le vâna khawm Pathien dang an um dêr naw a;

¹⁵i siehlaw ka pa David kuoma khawm i thutiemhai chu i sukpuitling a; anih, i bauin i hril a, vawisûn ni ang bawk hin, i kuthai chun i sukpuitling hlak ta kha.

¹⁶Chuleiin, tuhin aw LALPA, Israelhai Pathien, ‘Ka hmaa i khawsak anga, ka dân hraw dinga i thlahaiin an pawi sa chun; ka mithmuah Israel lal ṭhungphaa ṭhung ding mi intlâksamtir naw ning che,’ tia ka pa David i siehlaw kuoma i lo tiem ta kha hung hre zing rawh.

¹⁷Chuleiin, tuhin, aw LALPA Israelhai Pathien, i siehlaw David kuoma i thu i lo hril ta chu sukdet ni raw se.

¹⁸Nisienlakhawm, thilthaw tinrêngah mihriemhai lai Pathien chu a khawsa ding am a nih? Ngai ta, vân le vânhai vân khawm chun nang chu a dâwl naw che a nih; hi in ka bâwl lem hi chu a chîn nasa âwm de!

¹⁹I hmaa i siehlaw hnina, ṭawngṭaina le kona chu lo ngai dingin, Aw LALPA ka Pathien, a hnina le i siehlaw ṭawngṭaina chu i lo ngaisak a;

²⁰i hmun tieng nghaa i siehlaw hin a ṭawngṭai pha, ṭawngṭaina chu lo ngai dingin, ‘Chutaka chun ka hming chu sieng ka tih,’ i tina hmun tieng ngei chu, chu in tienga chun a sûn a zâna i mit chu în lên theina dingin.

²¹Hi hmun tieng hi nghaa an ṭawngṭai pha chun i mi Israelhai le i siehlaw hnina chu lo ngai la; anih, i umna vâna inthawk ngei chun lo hre la; chun, i lo hriet chun ngaidam bawk la.

²²“Miin a tuolbâwm chungah thil a suksuol a, vânni khâm dinga inkhâmtira um ding a lo ni chun, hi ina hin a hung a, i maichâm hmaa hin a hung inkhâm chun;

²³nang chun vâna inthawkin lo ngai la, thaw la, mi suol chu ama lu chung ngeia a maw phura thungin, i siehlawhai chungthu chu hung rêl rawh; ân dikna ang peia pêka um dingin mi fel chu thiem hung inchangtir bawk la.

²⁴Chun, i mi Israelhai hi an hmêlmahai hmaa chun i chunga an suolna leia hnein lo um hai sienla, hung ngha kîrin, i hming an hung ṭan a, hi ina hin an ṭawngṭaia hnina an hung siem chun;

²⁵nangin vâna inthawk chun lo hre la, i mi Israelhai suol chu ngaidam la, an thlatuhai le anni kuoma i pêk rama chun hung ṭhuoi nâwk rawh.

²⁶I chungah thil an suksuol leiin, ruo sûr lovin vân chu lo ping ta sienla, hi hmun tieng nghaa an ṭawngṭai a, i hming an ṭan a, anni chu i hrem laia an suol chu an nghatsan chun,

²⁷vâna chun lo hre la, an fena ding lampui ṭha închûktir lai chun i siehlawhai le i mi Israelhai suol chu nangin lo ngaidam la; i mihai kuoma rochan dinga i pêk, chu ram chunga chun ruo insûrtir rawh.

²⁸Chun, chu rama chun ṭâm amani a tla a, hri amanih ân lêng a, riel amanih, ṭêk amanih, khâu amanih, tuktulung amani an ṭuong chun; an hmêlmahai chun an khawpuiahai chun anni chu hung inhuol hai sienla, ieng hripui khawm inlêngin, ieng natna khawm um sienla;

²⁹i mi Israelhai po poin amanih, mi tukhawmin amanih hnina le ṭawngṭaina ieng ang khawm lo siem ta sienla, mi tin mâni hri ngei hretu le, mâni lungngaina ngei hretuin hi in tieng hin a bânhai a phar suok chun,

³⁰i umna vâna inthawk chun nangin lo hre la, ngaidam la, mi tin chu, a lungril chu nangin i hriet a, a lampuihai ang po po ngei chun nangin inhmutir rawh; (nang chun, nang chauin mihriem nauhai lungril chu i hriet si a;)

³¹kan thlatuhai kuoma i pêk rama an um sûng po poa i lampuihai chu hraw dinga nangma chu an ṭi theina ding chein.

³²“Chu nawah i mi Israel mi ni lo, mikhuol chungthua chun; i kut phar lei le, i kut thahrât lei le, i hming ropui leia ram hlataka inthawka a hung chun; an hung a hi in tieng nghaa an ṭawngṭai pha chun;

³³i umna hmun vâna inthawk ngei chun lo hre la, mikhuolin a hung kona san tak ang che chu thawpêk rawh; hnuoi chunga mi po pohai chun i mi Israelhai anga, hi in ka bâwl hi i hming a put ti an hriet theina dingin le, i hming ropui chu an hriet a an ṭi theina ding chein.

³⁴I mihai chu an hmêlmahai chunga do dingin fe suok hai sienla, khaw tieng lampuia mani khawm nangin lo tir ta la, i hming dinga in ka ibâwl le, hi khawpui nangin i thlang tieng hi nghaa an ṭawngṭai chun:

³⁵vâna inthawk chun an ṭawngṭaina le hnina chu lo ngai la, an thu chu nangin ṭan rawh.

³⁶I chungah thil an suksuol a, (mi thil suksuol lo an um si naw a) an chungah i lung a sen a, hmêlma kutah i pêk a, ram hlaa manih, a hnaia manih anni chun sala an ṭhuoi hmang chun:

³⁷sala ṭhuoihmanga an umna rama chun anni chu an inngaituoh a, an hung ngha kîr a, sal an nina rama chun nanga kuomah hnina an hung siem a; ‘Thil kan suk suol ta a, rilotakin kan thaw ta a, khawhlotakin kan lo thaw tah a nih,’ tia;

³⁸sala an umna rama an lungril po po le an lungvar po poa nangma kuoma an hung ngha kîr a, sala ṭhuoihmang an nina hmuna chun i hming dinga in ka bâwl tieng le, nangin khawpui i thlang tieng le, an thlatuhai kuoma ram i pêkna tieng nghaa an ṭawngṭai chun;

³⁹i umna hmun vâna inthawk ngei chun, an hnina le an ṭawngṭaina chu lo hre la, nangin an thu chu ṭan la, i chunga thil suksuol i mihai chu nangin ngaidam rawh.

⁴⁰Tuhin, aw ka Pathien, ka ngên che, hi hmuna ṭawngṭaina hi, i mitin hmu sienla, i na chun lo ngai raw se.

⁴¹Aw LALPA Pathien tuhin tho la, i châwlna hmuna chun nang le, i hrâtna bâwm chu; Aw LALPA Pathien, i thiempuhai chu sandamnain inthuomhai sienla, i mi inthienghai chu ṭhatnaah hlim raw hai se.

⁴²Aw LALPA Pathien, i hriek nâl hmai chu innghat hmangtir naw la, i siehlaw David thilthaw ṭhathai chu hre zing rawh,” tiin.