Read Hmar 2 CHANCHIN SUINA 8 Bible Online

2 CHANCHIN SUINA 8 - Hmar bible

2 CHANCHIN SUINA 8

¹Chun, kum sâwmhni sûng, Solomonin ama in le LALPA in a bâwl sûng chun,

²Huramin Solomon kuoma khawpui a pêkhai chu, Solomon chun a siem ṭha a, chuonga chun Israel mipuihai chu ân umtir a.

³Chun, Solomon chu Hamathzobaa chun a va fe a, a va hne ta a.

⁴Thlalêr hmuna chun Tadmor khuo chu a siem a, sie khâwmna khawpuihai po po chu Hamatha chun a bâwl a.

⁵Beth-horon chunghnung le, Beth-horon thlanghnung lem chu a bâwl bawk a, chuong chu khawpui kul nei, bang neia dai kawtkhâr le kalna thîrhai nei an nih;

⁶chun, Baalath le siekhâwmna khawpui Solomonin a neihai po po le, sakawr tawlailîrhai ta dinga khawpuihai po po le, sakawr chung chuong mihai ta dinga khawpuihai le, Lebanon le Jerusalem le, a rorêlna ram sûng po poah Solomonin a nuomsip tâwlna dinga bâwl a nuomhai po po chu a nih.

⁷Chun, hnam po pohai, Hit mihai, Amor mihai, Periz mihai, Hiv mihai, Jebus mihai a la umhai Israel mi ni lohaia le,

⁸an thlahai chu rama an mâksana Israelhaiin an lo sukbohmang nawhai chunga chun vawisûn ni chen hin Solomon chun suok nina sie chu ân chawitir a.

⁹Amiruokchu, Israel mipuihai chu Solomon chun a sinthawnaa chun siehlawah a siem naw a; indo mi le, a hotutakhai le, a sakawr chung chuong mihai le a sakawr tawlailîrhai chunga rorêltuhai an ni lem a.

¹⁰Chun, hienghai hi Solomon hotutakhai, za hni le sâwmnga, mipuihai chunga ro phurtuhai chu an nih.

¹¹Solomon chun Pharao naunu chu David khawpuia inthawkin a in dinga bâwla chun a zu ṭhuoi a; “Israelhai lal David ina chun ka nuhmei chu a um ding a ni nawh, a hmunhai chu LALPA bâwm hungna a ni a, ân thieng leiin,” a ti si a.

¹²Chun, tuolpûk hmaa LALPA maichâm a siema chun Solomon chun pumrawhmang thilinhlânhai chu ân hlân a,

¹³ni tinin vawi ieng zât pei amanih, châwlniahai, thla tharahai, ruoiṭhe hunahai Mosie thupêk ang peia inhlânin; kum khat sûngah vawi thum, chawl ṭhanglo bei ruoiṭhea le, hapta kâr ruoiṭhehaia le, bâwkte ruoiṭhehaia le chun.

¹⁴Chun, a pa Davidin a lo sukdet ta angin, an rawngbâwlna dingin thiempuhai pâwl hun chu a ruotpêk a; chun, Levi mihai khawm chu sin tuk an nina, inpâk ding le thiempuhai hmaa rawngbâwl dingin, ni tina a ṭûl ang peia an bituk angin a ruot bawk a; dai kawtkhâr tinahai chun kawtkhâr vêngtuhai chu an pâwl hun ang peiin, chuong ang chun Pathien mi David chun thu a lo pêk ta si a.

¹⁵Chun, ro siekhâwmna in chungthu le, thu ieng kima hrim hrim Levi mihai le thiempuhai kuoma lal thupêkhai chu an ngaitha ngai dêr naw a.

¹⁶Chuongchun, LALPA in chu a lungphûm phûm nia inthawka zo a ni chenin Solomon sinhai po po chu thaw zing a na. Chuongchun, LALPA in chu a puitlin a nih.

¹⁷Chun, Solomon chu Edom rama tuipui kama Eloth le Ezion-gebera chun a fe ta a.

¹⁸Chun, Huram chun a siehlawhai kutin lawnghai le siehlawhai tuipui chanchin hre mihai chu ama kuoma chun a thawn a; chuongchun, anni chu Solomon siehlawhai le chun Ophira chun an fe a, chutaka inthawk chun rângkachak talent za li le sâwmnga an hung phur a, lal Solomon kuoma chun an hung lâk a.