Read Hmar 2 CHANCHIN SUINA 9 Bible Online

2 CHANCHIN SUINA 9 - Hmar bible

2 CHANCHIN SUINA 9

¹Seba lalnu chun Solomon chanchin chu a lo hrietin, indawnna intak takhai le Solomon chu fie dingin rawi nasatak leh; sanghâwngsei, riminhnik le rângkachak tamtak le lunghluhai phurtuhai le chun Jerusalema chun a hung a; chun, Solomon kuom a hung tlung chun, a lungrila umhai po po thua chun ama chu ân biekpui ta a.

²Chun, Solomon chun ân dawnnahai po po chu a dawn a, Solomon ihriet naw thil, a dawn thei naw iengkhawm a um naw a.

³Chun, Seba lalnu chun Solomon varzie le, in a ibâwl ta le,

⁴dawkâna a bu dâm, a siehlaw inṭhunghai le a rawngbâwltuhai ngîrzie dâm le, an incheinahai le, a no chawituhai le an incheinahai le, a kailâwn LALPA in a hang fena chu a hmu chun, amaa chun lungril dang hrim a um ta naw a.

⁵Chun, lal kuoma chun, “I varzie le i thilthawhai keia rama ka lo hriet thuthanghai hi ân dik ngei a ni hi.

⁶Kei ngei ka hung a, ka mit ngeia ka hung hmu hma khan chu an thuhai ka lo ring naw a; ngai ta, i varna nasatzie chenve khawm hi hril ka lo ni naw hi tie; i hminginthangna ka lo hriet hi i khûm dai a nih.

⁷I mihai chu an vângnei a nih, i siehlaw i hmaa ngîr zing zinga, i varna thu ngai hlakhai chu an va vângnei de!

⁸LALPA i Pathien chu inpâkin um raw se; ama chun LALPA i Pathien ta dinga lal ni dinga lalṭhungphaa inṭhungtir che chu a lâwm zâwng tak a na; i Pathien chun Israelhai chu kumkhuoa tungding zing chu a nuom zâwng a ni leiin, indiktaka rorêlna chu nei dingin an chunga lalah a siem che a ni hi,” a ta.

⁹Ama chun lal chu rângkachak talent za le sâwmhni le, riminhnik tamtak le, lunghluhai a pêk a; Seba lalnuin Solomon kuoma a pêk ang hrim hrim riminhnik a la um ngai nawh.

¹⁰Chun, Huram siehlawhai le Solomon siehlawhai Ophira inthawka rângkachak hung phurtuhai khan algum thing le lunghlu an hung phur a.

¹¹Chun, lal chun algum thing chu LALPA in ta ding le lal ina inhuonna ding le, hla saktuhai ta dinga perkhuong le ṭingṭanghai dingin a siem a; chuong ang hrim hrim chu Judai rama chun a hmain hmu a ni ngai naw a.

¹²Chun, lal Solomon chun Seba lalnu kuoma chun a dit taphawt, a hni phawt chu amain a hung chawi ang ni lo phawt kha chu a pêk ve a. Chun, a kîr a, ama ram ngeia chun ama le a siehlawhai chu an fe ta a.

¹³Kum khat sûnga Solomon kuoma rângkachak hung lût bûk zât chu, rângkachak talent za ruk sâwmruk paruk a nih:

¹⁴chu chu dâwrkaihai le sum dâwnghaiin an hung lâk lût tiemsa lovin a nih; chun, Arabia rama lalhai po po le ram sûnga rorêltuhai po po chun Solomon kuomah rângkachak le tangka an hung lâk lût a.

¹⁵Chun, Solomon chun rângkachak âwmphaw a suta sutin za hni a siem a, âwmphaw pakhata chun rângkachak sutphêk shekel za ruk a lût a.

¹⁶Chun, rângkachak a suta sutin phâw za thum a siem a, phaw pakhata chun rângkachak sutphêk shekel za thum a lût a; chun, lal chun chuonghai chu Lebanon ramhnuoi inah a sie a.

¹⁷Chunawa khawm, lal chun saiha lalṭhungpha a siem a, rângkachak inthiengin ân luon khum a.

¹⁸Chun, lalṭhungpha hang kaina chu kailâwn paruk sirpha rângkachak seng lalṭhungphaa zawmnghet a na; chun, ṭhungna hmun sir khing ve vea chun sakeibaknei lim pahni an ngîr bawk a.

¹⁹Chun, kailâwn paruka chun sîr khatah sakeibaknei sâwm le pahni an ngîr a, a sîr khingtienga khawm chun; khâwlai rama khawm hieng anga siem hi a la um ngai nawh.

²⁰Chun, lal Solomon dâwnna nohai po po chu rângkachak an na, Lebanon ramhnuoi ina bûr le bêlhai po po khawm chu rângkachak inthieng an nih, Solomon hun lai hin tangkaruo hin hlutna a nei rak nawh.

²¹Huram siehlawhai le Tarsisa fe hlak lal chun lawnghai inkawppui a nei si a, kum thum dan peiah Tarsis lawnghai chu hungin rângkachak dâm, tangkaruo dâm, saiha dâm, zâwng dâm, ârâwn dâm a hung phur hlak a.

²²Chuongchun, lal Solomon chun hnuoia lalhai po po chu varna le hausaknaa chun a khûm a nih.

²³Chun, hnuoia lalhai po po chun Pathienin a lungrila varna a sie chu ngai dingin Solomon chu an hung pan huoi huoi hlak a.

²⁴Chun, mi tin chun a thilpêk, rângkachak bûr le bêlhai, tangkaraw bûr le bêlhai,silfên dâm, râlthuom dâm, riminhnik dâm, sakawr dâm, sabengtung lien chi dâm, kum tina bituk angin an hung pêk seng hlak a.

²⁵Chun, Solomon chun sakawrhai le sakawr tawlailîrhai ta dingin in sâng li le, sakawr chung chuong mi sîng khat le sâng hni a nei a; sakawr tawlailîr khawpuihaia le lal kuoma Jerusalema a siehai chu a ni a.

²⁶Chun, lal po po vadungpuia inthawka Philistin mihai ram chenin, Aigupta ramri chena umhai chunga chun ro a rêl a.

²⁷Chun, lal chun a tam êm lei chun Jerusalema chun tangkaruo chu lung ang el le, Sidar thing chu phairuoma theichang thinghai ang elin a siem a.

²⁸Chun, Aiguptaa inthawk le ram tina inthawkin Solomon ta dingin sakawrhai chu an hung lâk a.

²⁹Solomon thilthaw danghai, a hmasa le tâwpna chenin zâwlnei Nathan ziek chanchin bua le, Silon mi Ahija hrillâwknaa le, Nebat naupa Jeroboam chungthua zâwlnei Iddo thil hmulâwkahai chun ziek a ni naw am a nih?

³⁰Solomon chun Israel po po chunga chun kum sâwmli Jerusalemah ro a rêl a.

³¹Chun, Solomon chu a thlatuhai kuomah a in a, a pa David khuoa chun phûm a ni ta a; a naupa Rehoboam chun ama aia chun ro a rêl ta a.