Read Hmar EZRA 5 Bible Online

EZRA 5 - Hmar bible

EZRA 5

¹Chun, zâwlneihai, Haggai le Iddo naupa Zekaria chun Juda ram le Jerusalema Juda umhai kuoma chun thu an hrillâwk a; Israel Pathien hmingin a nih anni chun thu an hrillâwk chu.

²Chun, Sealtiel naupa Zerubbabel le Jozadak naupa Jesua chu an tho a, Jerusalema um, Pathien in chu an bâwl ṭan ta a; chun, an kuoma chun Pathien zâwlneihai chu anni ṭhangpuiin an um bawk a.

³Chu hun lai chun vadung râl tieng rorêltu Tattenai le Setharbozenai le an ruolhai chu an kuomah an hung a, an kuomah, “Hi in bâwl ding le, kul hi siemzo dingin tuin am thu a pêk cheu a?” an ta.

⁴Chun, an kuoma chun hieng ang hin thu kan hril a, “Hi in bâwltuhai hi an hming ieng am a na?” tiin.

⁵Nisienlakhawm, an Pathien mit chu Juda upahai chunga chun a fu a, chu thu chu Daria kuom a tlung a, a chungthua dawnna lekha chu a hung tlung hmakhat chun anni chu an suktâwp ta naw a.

⁶Vadung râltieng rorêltu Tattenai le Sethar-bozenai le a ruolhai Apharsak mihai[10], vadung râltienga umhaiin lal Daria lekhathawn an inphur chu:

⁷a kuoma chun lekhathawn an inphur a, chutaka chun hieng anga ziek hi a nih: “Lal Daria kuomah, inremna po po um raw se.

⁸Juda ram bielah, Pathien in ropuitaka chun kan fe a, chu chu lung ropuitakhaia bâwl a na, a banghai chu thinga siem a na; chun, sin chu taimataka thaw pei a na, an kuta chun a hung hlawtling hle el a nih ti hi lal chun lo hre raw se.

⁹Chun, chuong upahai chu, ‘Hi in bâwl ding le kul hi siemzo dingin tuin am thu a pêk cheu a?’ tiin kan indawn a.

¹⁰Hung hrilfie ding chein, anni laia lua um mihai hminghai chu kan hung ziek theina dingin, an hminghai khawm kan indawn bawk a.

¹¹Chun, anni chun hieng ang hin an mi dawn a, ‘Hnuoi le vân Pathien siehlawhai kan na, Israel lal ropuitakin a lo bâwl, kum tamtak a lo bâwl tah, in hi, kan bâwl a nih.

¹²Nisienlakhawm, chu hnunga chun kan thlatuhai chun vân Pathien chu an lo suklungsen a, ama chun Kaldai mi, Babulon lal, Nebukadnezzar, hi in hi suksea, mihai chu Babulon tienga ṭhuoi sâwngtu kuta chun a pêk ta a.

¹³Nisienlakhawm, Babulon lal Kura inlal kum khatnaa chun, lal Kura chun hi Pathien in hi bâwlna dingin thupêk chu a siem ta a nih.

¹⁴Chun, rângkachak le tangkaraw bûr le bêlhai Nebukadnezzarin Jerusalem biekina inthawka a lâk a, Babulon biekina a hung lâkhai chu, chuonghai ngei chu lal Kura chun Babulon biekina inthawk chun a lâk suok a, mi pakhat a hming Sesbazzar, amain rorêltua a siem ngei kuoma chun chuong chu a pêk a nih;

¹⁵ama kuoma chun, Hieng bûr le bêlhai hi la la, fe la, Jerusalema um biekina chun sie rawh; chun, Pathien in chu a hmun ngaia ngei bâwl ni raw se, a ti a.

¹⁶Chun, chu Sesbazzar bawk chu a hung a, Jerusalema um Pathien in lungphûm a phûm ta a; chutaka inthawk tah tu chen hin bâwl a ni ta zing a, zo fel lo a la ni zing a nih,’ tiin.

¹⁷Chuleiin, tuhin lalin ṭha a ti zâwng a ni chun chu Babulona lal sum inah zawng ni sienla, Jerusalema Pathien in hi bâwlna dingin lal Kura chun thupêk a lo siem ta chun chutaka chun a um âwm si a; chun, lal chun hi thu chungchânga hin ṭha a ti zâwng chu mi hung hril bawk raw se,” tiin.