Read Hmar EZRA 7 Bible Online

EZRA 7 - Hmar bible

EZRA 7

¹Hieng thilhai hnunga hin, Persia lal Artazerzia rorêl lai chu, Seraia naupa Ezra, Azaria naupa, Hilkia naupa,

²Sallum naupa, Zadok naupa; Ahitub naupa,

³Amaria naupa, Azaria naupa, Meraioth naupa,

⁴Zerahia naupa, Uzzi naupa, Bukki naupa;

⁵Abisua naupa, Phinehas naupa, Eleazar naupa, Aron thiempu laltak naupa:

⁶hi Ezra hi Babulona inthawk chun a hang fe a: Israel Pathien LALPAIN a pêk Mosie dân ziek thiem mi a na; chun, lal khawm chun a Pathien LALPA kut a chunga a um ang pei chun a hni taphawt chu a phalpêk a.

⁷Chuongchun, lal Artazerzia inlal kum sarinaa chun Israel thlahai ṭhenkhat le thiempuhai le Levi mihai le hlasaktuhai le, kawtkhâr vêngtuhai le, temple siehlawhai chu Jerusalema chun an hang fe a.

⁸Ama chu lal inlal a kum sarinaa, a thla nganaa chun a nih Jerusalema a hung chu.

⁹Thla khatna, ni khat nia chun Babulona inthawk chun a fe suok ṭan a, a chunga Pathien kut ṭha innghat ang peiin thla ngana, ni khat ni chun Jerusalem chu a tlung ta a.

¹⁰Ezra chun LALPA dân inchûka zâwm tlat ding le, a dânhai le thupêkhai chu Israel rama chun inchûktir a lungrilin a tum tlat a.

¹¹Hi hi LALPA thupêk le Israelhai kuoma a thuruot thuhai ziektu, thiempu le lekhaziektu Ezra kuoma lal Artazerziain lekha a pêk zieksâwng chu a nih,

¹²“Lalhai lal, Artazerzia chun, thiempu Ezra, vâna Pathien dân ziektu Ezra kuomah muongna kim um raw se.

¹³Ka ram sûnga Israel mihai po po, an thiempuhai le Levi mihai leh, mânia Jerusalema fe inhâwkna neituhai chu nanga ruola fe dingin thupêk ka siem a nih.

¹⁴I kuta um i Pathien dân ang peia Jerusalem le Juda ram chungthu chu dâwpsuok dinga lal le a rorêltu pasarihai itir i ni leiin le;

¹⁵Jerusalema um Israel Pathien kuoma phaltaka lal le a rorêltuhaiin an pêk rângkachak le tangkaruohai phur dingin le,

¹⁶Babulon biel po poa mipuihai le thiempuhaiin Jerusalema an Pathien in ta dinga phaltaka an pêk, rângkachak le tangkaruo i hmu thei zât zât chu chawi dinga tir i nih:

¹⁷chuleichun, hi sum hi fîmkhurtakin bâwngchalhai, berâmchalhai, berâmtehai, an bu thilinhlân le dâwn mi thilinhlânhai leh inchâwng i ta, Jerusalema um i Pathien ina maichâma chun inhlân i tih.

¹⁸Chun, rângkachak le tangka la chuong chu i unauhai le nanga ngaia ṭha ang angin, in Pathien dit zâwngin hmang in tih.

¹⁹I Pathien in rawngbâwlna dinga bûr le bêl an pêkhai che chu Jerusalema Pathien hmaa chun pe suok rawh.

²⁰Chun, pêkna hun i nei phaa i Pathien in ta dinga thil mamaw taphawt chu lal sum ina inthawkin pe suok el rawh.

²¹Keima, kei Artazerzia ngei hin thupêk ka siem a, vadung râltienga sum enkawltuhai po po kuoma chun, ‘Thiempu Ezra, vân Pathien dân ziektu hin thil a hni taphawt cheu chu fîmkhurtaka thaw dingin thu ka pêk cheu:

²²tangkaruo talent za khat chen khawm, bu bûk za khat chen khawm, uoin bath za khat chen khawm, hriek bath za khat chen khawm, chi khawm ieng zât am ti um lo dingin.

²³Vân Pathienin a iphût ang taphawt chu, vân Pathien in ta ding chun thaw tei ni raw se; iengdingin am lal le a naupahai ram chunga hin a lunginsenna chu um a ta?

²⁴Chun, thiempuhai, Levi mihai, hlasaktuhai, kawtkhâr vêngtuhai, temple siehlawhai amanih, Pathien in rawngbâwltuhai hrim hrim chungthua chun, anni chu leiman amanih, ram man amanih, sie amani khawm inchawitir chu dân ni naw nih tiin thu kan pêk bawk che a nih,’

²⁵Chun, nang Ezra hin, i kawl Pathienin varna a pêk che ang peiin vadung râltienga mihai chunga rorêl dingin i Pathien dânhai hre mihai ang chu ram awptu le rorêltuhai dingin thlang i tih, a la hre nawhai chu inchuktir unla.

²⁶Mi tukhawm i Pathien dân anga thaw lo le lal dân anga thaw lo chu a chungah inrangtaka rorêlthlûk ni sienla, thi dingin amanih, hnawtsuok dingin amanih, thuomhnawhai chân ding amanih, lungina khum ding amanih ni dingin,” tiin.

²⁷Jerusalema LALPA in cheimawi dinga lal lungrila thil hienga sietu ei thlatuhai Pathien LALPA chu inpâkin um raw se;

²⁸Ama chun lal hmaa le a rorêltuhai hmaa le lal mi ṭhahai po po hmaa chun ka chungah zângaina a hung suklien ta a. Chuongchun, ka chunga ka Pathien LALPA kut ang peiin sukhrâtin ka um ta a, Israelhai laia inthawk chun ka ruola hang fe ve dingin, mi lusa deuhai chu ka kei khâwm ta a.