Read Hmar EZRA 9 Bible Online

EZRA 9 - Hmar bible

EZRA 9

¹Hieng thilhai hi thaw a ni zo chun, mi ṭhahai chu ka kuomah an hung a, “Israel mipuihai le thiempuhai le Levi mihai hi hieng a rama um Kanaan mihai, Hit mihai, Periz mihai, Jebus mihai, Ammon mihai, Moab mihai, Aigupta mihai le Amor mihaia inthawk hin insiekieng lovin, an tirdakumnahai chu an thaw ve zing el a nih.

²An naupasalhai le annihai ta ding ngei khawma an naunuhmeihai an nei si a; chuongchun, chi inthieng chu annia hin hieng rama mihai le hin ân chawkpawl ta a; anih, hi bawsietnaa hin mi ṭhahai le rorêltuhai hi a hmaṭhuoi an ni nghe nghe a nih,” an ta.

³Hieng thu hi ka hriet phing chun ka silfên le ka zakawfuol chu ka keithlêr a, ka lua ka sam chu ka phawi ṭil a, ka khâkhmul leh; maktitakin ka ṭhung ta a.

⁴Chun, sal intâng suokhai an bawsietna leia Israel Pathien thua lo inthin hlakhai po kha ka kuoma chun an hung inkhâwm a; chun, kei chu zântieng thilinhlân hun chenin maktiin ka ṭhung ta zing a.

⁵Chun, zântienga thilinhlân hun ding lai chun ka silfên le ka zakawfuol inek pum chun ka lungngainaa inthawk chun ka tho suok a; ka khûpin ka dingṭhaṭhuon a, LALPA ka Pathien kuom tieng chun ka bânhai ka phar a,

⁶“Aw ka Pathien, nanga tienga hung nghat khawm hi ka hmai a mâwkin kân zak a nih, ka Pathien, kan khawhlonahai chu kan lu chunga hin a hung pung deu deu a, kan suolhai chun vân a tawng ta a ni hi.

⁷Kan thlatuhai hun laia inthawk tah vawisûn ni chen hin suol namên lovin kan suol ta a; kan khawhlonahai lei hin kan lalhai le kan thiempuhai chu hieng ram lalhai kuthaia hin pêk suokin an um ta a; vawisûn ni ang chen khawm hin hmêla hamhaina le, suksietnaa le sal intângnaa le kâwlhnâm kuoma pêkin an um hi.

⁸Tuhin mitkhapkâr tawitea dingin kan Pathien LALPA zângaina chu hla bîkhai mi la mâksanpêk ding le, a hmun inthienga um zingna mi pe dingin kan Pathien chun kan mithai a hung sukvar a, kan sal intângnaa hin sukharna tlâwmte bêk a mi pêk theina dingin inlangtirin a um a.

⁹Sal intâng kan na, amiruokchu, kan sal intângnaa khawm chun kan Pathien chun a mi nghatsan ngai naw a, Jerusalem le Juda rama kulhai mi pe ding le, chutaka in siehai chu siem ṭha ding le kan Pathien in chu tungding dinga thathona mi pe dingin, Persia lalhai mithmua chun kan chungah lunginsietna a hung sukpung ta lem a.

¹⁰Chuongchun, tuhin, Aw kan Pathien, hi thua hin iengam hril tâng kan ta? I thupêkhai chu kan lo nghatsan ta si a:

¹¹khâng i siehlaw zâwlneihai hmanga i lo pêk tah, ‘Chu ram hluo dinga in fena ding chu ram thiengnaw, a rama mihai inthieng nawnahaia sukthieng naw, an inthiengnawna kil khata inthawka kil khingtieng chena sip, chu an inthieng nawnaa inthieng naw chu a nih.

¹²Chuleiin, tuhin, in naupasalhai chu an naunuhmeihai inneitir naw unla, in naunuhmeihai chu an naupasalhai khawm inneitir bawk naw ro; kumkhuoa dingin an hausakna amanih, anni le inremna amanih zawng bawk naw ro, chu ram thil ṭha chu in fâk a, in hung hrât a, kumkhuoa dinga in thlahai ta dinga rochan dinga in mâksanpêk theina dingin,’ ti kha.

¹³Chuong po po hnunga chun kan suol nasatak lei le, kan suksuolnahai leiin kan chungah a hung tlung a, nang kan Pathien hin kan khawhlonahaiin a phutâwk nêka nêp lemin i mi hrem a, a mahla khawm i mi la hlapêk a nih ti hmu zing si hin,

¹⁴i thupêkhai chu kan bawsiet nâwkin, hieng pawrchenahai thawtu mipuihai le hin ṭhe ruollovin kan lân zawm zing ding am a nih? A suok ding um dêr lova, a mahla khawm hla dêr lova i mi kânghmang dêr hmakhat chun nang chu i lungdam ding am a nih?

¹⁵Aw LALPA, Israel Pathien, nang chu în dik a, a suok a mahla chu i mi lo hlapêk ta si a, vawisûn ni ang chen khawm hin: ngai ta, kan khawhlonahai leh i hmaa hin kan um a ni hi; hi hi lei hin tukhawm i hmaa chun an ngîr thei âwm si naw a,” tiin.