Read Hmar NEHEMIA 2 Bible Online

NEHEMIA 2 - Hmar bible

NEHEMIA 2

¹Chun, lal Artazerzia kum sâwmhni ân lal kum, Nisan thlaah uoin an hung pêk hnung chun, uoin chu ka lâk a, lal chu ka pêk a. Kha hma khan chu a hmaa hin lungngai hmêl ka la put ngai naw a;

²lal chun ka kuomah, “I damnaw khawm chu a ni si naw a, iengtiziea lungngai hmêl i put am a na? thil dang ni naw nih, i lungril a lungngai a ni hi maw,” a mi ti a. Chuongchun, ka ṭi ta êm êm el a.

³Kei chun lal kuoma chun, “Lal chu kumkhuoin dam raw se; a mi thlatuhai thlân umna khuo chu a ram ta a, a kawtkhârhai chu a kâng vawng ta si a, lungngai hmêl put lo thei am nîng ka ti?” ka ti a.

⁴Chuongchun, lal chun ka kuomah, “Ieng am a na i hni chu?” a ti a. Chuongchun, vân Pathien kuoma chun ka ṭawngṭai ta a.

⁵Chun, lal kuoma chun, “Lal remti zâwng a ni a, i siehlaw hin i mit ka lo tlung hlak a ni chun, Juda ramah a mi thlatuhai thlân umnaa chun mîn fetir la; khuo chu va siemthar nâwk ka tih,” ka ti a.

⁶Lal chun ka kuomah, (lalnu khawm chu a kâwla chun a ṭhung ve a), “Ieng chen am va thang i ta, ieng tik am hung nâwk i ta?” a ti a. Chuongchun, lal chun lâwmtakin a mîn fetir ta a, kei khawm chun hunbi ka tiem bawk a.

⁷Chu bak khawm chu ni lovin lal kuoma chun, “Lal remti zâwng a ni chun, vadung râla rorêltuhai inhmutir dingin, Juda ram ka tlung chen an mîn fetir theina dingin phalna lekha mi pe la;

⁸chun, lal ramhâk vêngtu Asaph inhmutir dingin invêngna kulbîng kawtkhâr kal ding le, khawpui kul ding dâmin, ka va hluo ding ina hmang ding dâmin thing a mi pêk theina dingin lekha mi pe bawk rawh,” ka ti a. Chun, ka Pathien mi ditsakna ang peiin lal chun a mi pêk ta a.

⁹Chuongchun, vadung râla rorêltuhai kuom chu ka va tlung a, lal lekhahai chu ka pêk a. Chun,lal chun ka kuoma chun sipai hotuhai le sipai sakawr chung chuong mihai ân fetir ve a nih.

¹⁰Chun, Horon mi Sanballat le Ammon mi siehlaw, Tobia haiin an lo hriet chun, Israel mipuihai thawvengna ding ngaituo dingin mi an hung a ni chu tie tiin an lo lungninaw hle el a.

¹¹Chuongchun, Jerusalem chu ka hang tlung a, ni thum ka hei um phawt a.

¹²Chun, zâna chun ka tho a, kei le mi dang tlâwmtêhai le chun: Jerusalem ta dinga ka thaw ding, ka Pathienin ka lungrila a sie chu tukhawm ka hril naw a; ka chuongna sa ngawt naw chu sa dang ka kuoma um a um naw a.

¹³Zâna chun Ruom kawtkhâra chun ka suok a, Dragon Tuisunsuo tieng le Hmunhnawk kawtkhâr tienga chun ka fe a; Jerusalem kul chimhai le a kawtkhâr kânghai chu ka en vêl a.

¹⁴Chun, Tuisunsuo kawtkhâr le lal Dîl chen chun ka fe a, nisienlakhawm, ka chuongna sa a fethlengna ding hrim hrim a um naw a.

¹⁵Chuongchun, zânah vadung chu a tungin ka zui a, kul chu ka en a; chun, ka lêt nâwk a, Ruom kawtkhâra chun ka lût a, chuong ang chun ka hung kîr nâwk ta a.

¹⁶Rorêltuhai chun khâwlai am ka fe a, ieng am a na ka thaw ti khawm chu an hriet naw a; chun, Judahai, thiempuhai, mi ṭhahai, rorêltuhai le mi dang sin thawtu ding hrim hrim khawm ka la hril hri naw bawk a.

¹⁷Chuongchun, an kuomah, “Ei chan a sietzie hi in hmu a, Jerusalem a ram ti dâm, a kawtkhârhai khawm a kâng ti khawm in hriet a; thaw ro, hrilsiet ei ni ta nawna dingin Jerusalem kul hi inngîr nâwk ei tiu,” ka ti a.

¹⁸Chun, ka Pathienin a mi ditsak thuhai dâm chu ka hril a, ka kuoma lal thuhrilhai le chun. Anni chun, “Tho ei ta, inngîr takluong ei tiu khai,” an ti a. Chuongchun, chu sin ṭha thaw ding chun an kut an sukhrât a.

¹⁹Amiruokchu, Horon mi Sanballat le Ammon mi siehlaw Tobia le Arab mi Gesemin an hriet chun, an mi nuisan a, an mi hmusit a, “In thil thaw hi iengtizie am a na? Lal chungah in hel am a nih?” dâm an ti a.

²⁰Chun, anni chu ka dawn a, an kuomah, “Vân Pathien chun mi suktluongtlung a ta; chuongchun, keini a siehlawhai chu tho kan ta, inngîr kan tih; nangni ruok chun Jerusalema hin chanvo amanih, thuneina amanih, hnûhma amani khawm in nei naw hrim hrim a nih,” ka ti a.