Read Hmar NEHEMIA 4 Bible Online

NEHEMIA 4 - Hmar bible

NEHEMIA 4

¹Nisienlakhawm, Sanballat chun kul kan siem ṭha ti a hriet chun, nasatakin a lunginsen a, a lungawi ta naw a, Judahai chu a dêusâw ta a.

²Chuongchun, a unauhai le Samari sipaihai hmaa chun thu a hril a, “Hieng Juda mi hrâtlohai hin ieng am a ni leh an thaw? An inkul puitling vei ding am a ni ie? An inthâwi vei ding am a nih? Ni khat thil thuin an puitlin ding maw? Hmunhnawk um khâwm mei meia inthawk le lung kâng se ta sa an inngîr thartir ding maw?” a ti a.

³Chun, a kâwla Ammon mi Tobia chun, “Hang inngîrtir hrim raw hai se chu, sihal khawm hang lâwn sien an lung kul chu sukchim el a tih,” a ti a.

⁴Aw kan Pathien, en ta, hmusitin kan um hi, an mi hrilsietna chu anni lu chunga ngei inlêttir la, anni khawm khâwlai rama manih muolphotakin intângtir zing rawh;

⁵an bawsietnahai chu inkhum naw la, an suolnahai chu i hmaa inthawka thaihmangin inumtir naw rawh; kul siemtuhai hmaah an suklungsen che hi.

⁶Chuongchun, kul chu kan siem a, ân sâng tieng chenvein kul po po chu kan zawm suok vawng a; mipuihai chun thaw inhâwkna lungril chu an put hle a.

⁷Amiruokchu, Sanballat hai, Tobia hai, Arab mihai, Ammon mihai le Asdod mihaiin kul chu siem ṭhat a ni pei ti an hriet chun an lunginsen ta hle el a;

⁸chuongchun, Jerusalem chu hung thawa buoina siem chu an rawt tâwl ta a.

⁹Nisienlakhawm, anni lei chun kan Pathien kuomah kan ṭawngṭai a, sûn le zânah anni chu a vêngtu ding kan sie zing a.

¹⁰Chun, Juda chun, “Sinthawtuhai tha hlak a châu zo ta a, hmunhnawk hlak a nasa si a; kul chu ei siem thei ta naw ding a ni hi,” a ti a.

¹¹Kan hmêlmahai hlak chun, “Anni lai ei hang fe a, ei hang that a, sin chu ei hang suktâwppêk hmakhat chun hre naw ni hai a, mi hmu bawk naw ni hai,” an lo ti bawk a.

¹²An kuoma Juda umhai an hung hlak khan hmun tum tuma miin vawi sâwm zet, “Kan kuomah in hung nâwk ding a nih,” an mi lo ti zawmzawt bawk a.

¹³Chuleichun, kul phên, ân hnuoina lai tak, hmun inthâwlna fai laia chun mipuihai chu a sûng sûngin an kâwlhnâmhai, an feihai, an thalngulhai chawiin ṭhanghmun kân khuortir a.

¹⁴Chun, ka hang en vêl a, ka tho a, mi ṭhahai le rorêltuhai le mi danghai kuoma chun, “Anni chu ṭi dêr naw unla, LALPA ropuitak le, ṭiumtak el chu hre zingin in unauhai, in naupasalhai, in naunuhmeihai, in nuhmeihai, in inhai hum dingin thaw[6] ro khai,” ka ti a.

¹⁵Chun, kan hmêlmahai chun kan lo hriet ti le, an thil thaw tum chu Pathienin teploah a siem ti an hrietin, kul tieng mâni sinthawna sengah kan fe nâwk tâwl ta a.

¹⁶Chutaka inthawk chu ka mihai a zâtve chun sin chu an thaw nâwk ta a; a zâtve danghai chun feihai, phawhai, thalngulhai, âwmphawhai chu an kawl a; chun rorêltuhai chu Juda sûnghai hnunga chun an um a,

¹⁷chuong bang siemtuhai hnunga chun. Chun, chuong phurrik phurtuhai chu an inbel rik ṭeu a, an kut khingkhatin sin an thaw a, khingtiengin hriemhrei an chawi a;

¹⁸a siemtuhai chun an kâwlhnâm an pâi seng a, chuong pum chun an siem a nih. Tawtawrâwt mûttu chu keia kâwlah a um a.

¹⁹Chun, mi ṭhahai le rorêltuhai le mipuihai hmaa chun, “Sin hi a nasain a lien êm a, kula hin ei inhlatin ei indar hle el si a;

²⁰tawtawrâwt ri in hrietna hmun hmuna chun keini kuom tieng hung tlân khâwm unla; ei Pathien chun mi dopêk a tih,” ka ti a.

²¹Chuong ang chun sin chu kan thaw a, chun, a zâtve chun vârṭiena inthawka arasi inlang chen feihai chu an kawl zing a.

²²Chuong ang bawkin chuong lai chun mipuihai kuoma chun, “Zâna mi vênga, sûna sin thaw dingin tukhawm an siehlawhai leh Jerusalem sûngah riek vawng raw hai se,” ka ti a.

²³Chuongchun, kei khawm, ka unauhai khawm, ka tlangvâlhai khawm, vêngtu a mi zui hlakhai khawm, tukhawma kan silfên kan hlîp hrim hrim naw a, hriemhrei inbel pum zingin tui tienga chun kan fe hlak a nih.