Read Hmar NEHEMIA 5 Bible Online

NEHEMIA 5 - Hmar bible

NEHEMIA 5

¹Chun, mipuihai le an nuhmeihai chu an unau Judahai chunga chierin an khêk ta mur mur el a,

²“Eini rawi hi ei naupasalhai le ei naunuhmeihai leh tam tâwk tak ei na; bu hi inchûin inchû el ei tiu, ei fâka ei hring theina dingin,” ti dâm an um a.

³Chun, ṭhenkat, “Ei lohai, ei inhai, ei grêp huonhai hrên dingin ei sie si a, ṭâm lei hin bu hi ân chûin inchû el ei tiu,” ti dâm khawm an um bawk a.

⁴“Ei lohai, ei grêp huonhai hrên dinga siein lal kuoma dâm sie chawi dingin sum dâm ei pûk a.

⁵Ei taksa chu ei unauhai taksa ang bawk a na; ei nauhai khawm an nauhai ang bawk an ni si a; nisienlakhawm, hi, ei naunuhmeihai, ei naupasalhai hi siehlawa um dingin suokah ei inlûttir takngiel ding a ni hi; ei naunuhmei ṭhenkhat lem chu suokah an lût ta nghe nghe a, san ngaina hre nghâl lo me; mihaiin ei huonhai le ei grêp huonhai chu an nei ta si a,” ti dâm an um nuol bawk a.

⁶Chuong thuhai le an rihâu chu ka hrietin ka lunginsen êm êm el a.

⁷Chuongchun, ka lungrilin ka ngaituo a, mi ṭhahai le rorêltuhai chu ka khak a, an kuomah, “Mi tinin in unauhai a pung hnawtin sum in inpûktir zing el a,” ka ti a. Chun, an chungchâng chu ngaituo dingin mi ka ko khâwm ṭeu el a.

⁸An kuomah, “Hnam dang kuoma zawra um ei unau Judahai chu ei thei ang angin ei intlan a; nangni hin in unauhai hi zawr in tum a ni maw? Nangni[7] kuoma ngei hin zawr an ni ding a ni maw?” ka ti a. Chuongchun, an to zing a, dawnna ding iengkhawm an hriet naw a.

⁹“In thil thaw hi a ṭha naw tawp el a nih: ei hmêlma, hnam danghai mi hrilsietna lei hin ei Pathien chu ṭia in um a ṭûl a ni naw am a nih?

¹⁰Kei le ka unauhai le ka mihai khawmin kan sum le bu kan inpûktir ve bawk in sawnnaw. A pung hnawta inpûktir hi bân dai ei tiu khai.

¹¹Vawisûn ngei hin an lohai, an grêp huonhai, an oliv huonhai, an inhai le, an sum le an bu le an uoin le hriek hmun zaa hmun khat in lâk hlak khawm chu, pe nâwk vawng ro khai,” ka ti bawk a.

¹²Chuongchun, anni chun, “Pe nâwk vawng kan tih, annia inthawkin iengkhawm phût naw ning ungah; i ti ang tak chun thâwng kan tih,” an ti a. Chuongchun, thiempuhai ka ko a, an hmaah chu thutiem ang taka thaw ngei ding chun kân khâmtir a.

¹³Ka dierkei chu ka thin a, “Hi thutiem anga thaw naw taphawt chu Pathien chun a ina inthawk le a sinthawa inthawkin hieng ang hin thinthla raw se; hieng anga thin thlâkin um sienla, sukruokin um raw se,” ka ti a. Chun, a pungkhâwmhai po po chun, “Amen,” an ti a, Lalpa an inpâk a. Chun, mipuihai chun chu thutiem ang chun an thaw ta a.

¹⁴Chu naw khawm chu Juda rama anni awptu dinga ruot ka ni china inthawk, lal Artazerzia kum sâwmhni ân lal kuma inthawka kum sâwmthum pahni ân lal kum chen, kum sâwm pahni sûng chun kei le ka unauhai hin ram awptu puol bei hrim hrim khawm kan fâk ngai naw a.

¹⁵Nisienlakhawm, kha hmaa ram awptu ka hmaa lo umhai chu mihai chungah lu an lo ling hle a, tangka shekel sâwmli tiem lovin an beihai le uoinhai an lâkpêk hlak a; a chu nâksapah an siehlawhai chu mihai chunga chun an insuklal hle hlak a; amiruokchu, kei chun chu Pathien ṭina leiin chuong ang chun ka thaw ve nawh.

¹⁶Anih, hi kul sin thaw hin ka um zing a, ram hrim hrim inchâwk khawm kân châwk naw a: ka mihai po po khawm sin chu thawin chutaka chun an um khâwm zing a nih.

¹⁷Chu chau khawm chu ni lovin kan vêla hnam danghai laia inthawka hunghai tiem lovin Judahai le rorêltuhai laia mi ka dawkâna awt hlak mi za le sâwmnga an um zing a nih.

¹⁸Chun, ni khat dinga an buotsai chu sebâwngchal pakhat le berâm paruk a ṭha ṭhieu a na; chun, ârhai khawm ka ta dingin an buotsai a, ni sâwm dan peiah uoin hran hran tam tâwk tak leh; chuong ang chun buotsai hai sienla khawm hieng mihai tuor hi a rik êm leiin ram awptu puol bei chu ka phût naw hrim hrim a nih.

¹⁹Aw ka Pathien, hieng mihai ta dinga ka thilthawhai po po hi ka ṭhatna dingin hre zing raw aw.