Read Hmar ESTHER 1 Bible Online

ESTHER 1 - Hmar bible

ESTHER 1

¹Ahasuer hun lai chun hieng hi a hung na, (hi Ahasuer hi Indiaa inthawka Ethiopia chena, rambung za sâwmhni pasari chunga rorêltu a nih),

²chuong nihaia, lal Ahasuer chu Susa khawpuia, a lalram lalṭhungphaa a ṭhung laiin,

³a rorêl a kum thumnaa chun a mi ṭhahai le a siehlawhai po po ta dingin ruoi a ṭhe a; Media le Persia ram thilthawtheihai, mi ṭhahai le lal nauhai, chu rambunga mihai chu a hmaa chun an um a;

⁴chu huna chun ama chun a lalram ropuitak hausaknahai le ân lalzie inzaûmna chu ni tamtak el, ni za khat le sâwmriet sûng zet ân entir a.

⁵Chun, chuong nihai chu a hung tlungkim chun, lal in huon sûng tuollaia chun, ni sari sûng zet, lal in Susaa um mi lien le mi chinhai po po kuoma chun lal chun ruoi a ṭhe ta a;

⁶puon a vâr, a dum le dumpâwl chu sailungvâr banhaia tangkaruo suonkuola puon zai inhmi a êma khitdea khâiin a um a; sailungvâr sen le a dumpâwl le a vâr le a dum phêk chungah, rângkachak le tangkaruo ṭhungphahai chu rem an ni a.

⁷Anni chu rângkachak nohaiin dâwn ding chu an pêk a, (chuong rângkachak nohai chu a danglam seng an nih), lal kut ang pei chun, lal uoin chu tam tâwk zetin an pêk bawk a.

⁸Chun, dâwn dân khawm chu dân ang takin a na; tukhawma an thawlui thei naw a; lal chun mi tinin mâni nuom tâwk ang senga an thawna dingin a ina manmihai chu mi po po ta dinga vêngtu dingin a ruot a.

⁹Lalnu Vasti khawm chun nuhmeihai ta bîk dingin lal Ahasuer lal ina chun ruoi a ṭhe a.

¹⁰Ni sari niha, uoin leia lal lungril chu a hung hlim hle phing chun, Mehuman, Biztha, Harbona, Bigtha, Abagtha, Zethar le Karkas, lal Ahasuer hmaa rawngbâwl hlakhai, mi tillâk pasari chu,

¹¹lalnu Vasti chu lallukhum khuma lal hmaa chun hung ṭhuoia, mi ṭhahai le mipuihai chu a hmêl ṭhatzie chu inentir dingin thu a pêk ta a; hang en hin ama hlak chu a hmêl a ṭha hle el bawk si a.

¹²Nisienlakhawm, mi tillâkhai kuoma lal thupêk chu lalnu Vasti chun a sêl a, a hung nuom naw a; chuleiin, lal chu a lunginsen ta êm êm el a, a lunginsen chu a chawk hin a chawk ta a.

¹³Chun, lal chun mi varhai, a hunhai hretuhai kuoma chun, (dân le rorêl dân hretuhai po po kuoma chun, hi hi lal thaw dân a ni hrim a:

¹⁴ama dawta chun Media le Persia mi lien pasari, lal hmêl chu hmu hlak a, lalrama khawm chun a ṭhung hmasatuhai Karsena, Sethar, Admatha, Tarsis, Meres, Marsena le Memukan hai chu an nih.)

¹⁵“Lal Ahasuerin mi tillâkhai hmanga a thupêk hi lalnu Vasti hin a thaw ta naw lei hin dân angin ieng anga ei thaw ding am ning a ta,” a ta.

¹⁶Chun, lalhai le lal hmaa chun Memukan chun a dawn a, “Lalnu Vasti hin lal chunga chau hin a suksuol a ni naw a, amiruokchu, lal Ahasuer rambung po poa mipui po po le mi ṭhahai po po chunga khawm a suksuol a nih.

¹⁷‘Lal Ahasuer chun lalnu Vasti chu a hmaa hung ṭhuoi dingin thu a pêk a, ama hlak chu a hung si naw a,’ tiin hril dar a ni pha chun, an pasalhai an mithmua entlêuna dingin hi lalnu thilthaw hi nuhmei po po chun an hung chîng ve ngei ding a ni hi.

¹⁸Chuongchun, vawisûna Media le Persia lalnauhai, lalnu thilthaw lo hretuhai chun lalpa mi ṭhahai kuoma chun chuong ang bawkin an ti ve ngei ding a na; chuleiin, inkhingna le lunginsenna nasatak a hung suok ngei ding a ni hi.

¹⁹Lal hin ṭha a ti zâwng a ni chun lal kuoma inthawk hin lal thupêk chu suok sienla, ‘lal Ahasuer hmaa hin Vasti hi hung ta ngai hrim hrim naw raw se,’ tiin Media le Persia dân thleng nâwk ngai ta lohai ang chun ziek ni raw seh; chun, lal hin a lalnu nina hi ama nêka ṭha lem mi dang kuomah pe bawk raw seh.

²⁰Chuongchun, lalin thupêk a siem ding chu a lalram po poa sukdar a ni pha chun ( a lien âwm si a) nuhmeihai po po chun, an pasal, mi lien le mi chînhai kuoma khawm chun inzâna an nei ta ding a nih,” tiin.

²¹Chu thuhril chun mi lienhai le lal chu a suklâwm a, lal chun Memukan thu ang tak chun a thaw ta a;

²²a rambung po poa chun lekha a thawn a, rambung tinah ziek ang tak le, mi chi tin kuomah an ṭawng ang ngei le, pasalin mâni insûng ro chu a phurna ding le, a mihai ṭawng ang ngeia a hrildar theina dingin.