Read Hmar ESTHER 2 Bible Online

ESTHER 2 - Hmar bible

ESTHER 2

¹Hieng thilhai hnunga lal Ahasuer lunginsenna chu a hung rê hnunga chun, Vasti le a thilthaw le, a chunga thupêk um chu a hriet zing a.

²Chun, lal siehlaw ama rawngbâwltu chun thurawt a siem a, “Lal ta ding hin nunghâk tleirawl hmêl ṭhahai zawng ni raw se.

³Susa khawpuia nuhmeihai inah hieng nunghâk tleirawl hmêl ṭhahai po po hung ṭhuoi khâwm dingin lal hin a rambung sûng po poa dingin hotuhai ruot bawk sien. Anni chu nuhmeihai kawltu, lal mitillâk Hegai enkawlna hnuoiah sie ni hai sien; chun, incheimawina hmangruohai pêk ni bawk hai sien.

⁴Chun, nunghâk lal suklungâwitu chu Vasti aiah lalnu hung ni raw se,” tiin. Chu thil chun lal chu a suklâwm a, chuong ang tak chun a thaw ta a.

⁵Susa khawpuia chun Juda mi, a hming Mordekai, Benjamin mi Kis naupa, Simei naupa, Jair naupa chu a um a;

⁶ama chu Juda lal Jehoiakin ruola Babulon lal Nebukadnezzarin a ṭhuoi hmang sal intânghai ruola Jerusalema inthawka ṭhuoi hmang a ni ve a.

⁷Ama chun a pami naunu Hadassa, chu chu Esther a nih, chu a châwmlien a, amanu chun nu amanih, pa amani khawm a nei si naw a; chu nunghâk chu hmêl ṭha ditumtak a na; chuongchun, a nu le a pa an thi chun Mordekai chun ama naunu dingin a lâk a nih.

⁸Chuongchun, lal thupêk le a thu sukthlûk chu hriet a na, nunghâk tamtakhai chu Susa khawpuia Hegai enkawlna hnuoia chun ṭhuoi khâwm an ni phing chun, nuhmei enkawltu Hegai enkawlna hnuoiah lal ina chun Esther khawm chu ṭhuoi a ni ve ta a.

⁹Chu nunghâk chun ama chu a suklâwm a, a lungsietna chu a hlaw ta a; lal chun incheimawina hmangruohai le a fâk ding chanpuol chu lal ina mi nunghâk thlang suok pasari leh inhmawtakin a pêk a; nuhmeihai in hmun ṭhatna taka chun ama le a nunghâkhai chu a sie ta a.

¹⁰Esther chun a chihai le a laibunghai lai khawm a hrillang naw a; Mordekai chun hrillang lo dingin a khap si a.

¹¹Chun, Esther chu ieng angin am a thaw a, ieng am a chang a ti hre dingin, nuhmei in tuol puoa chun Mordekai chu ni tin hin a fe hlak a.

¹²Nunghâk chu lal Ahasuer kuoma a lût hun a tlung hma chun nuhmeihai ta dinga incheimawina hun ruot thla sâwmpahni a hmang zo ding a na, thla ruk sûng chu mura hriek leh, thla ruk dang chu riminhnik danghai leh.

¹³Chun, nunghâk chu lal kuoma a lût dân ding chu hieng ang hi a nih: lal ina va fe dinga nuhmeihai ina a dit zâwng taphawt chu chawi dinga pêk a na.

¹⁴Zântieng chun chutaka chun fêng a ta, zingkâr chun nuhmeihai in pahnina, thaikêmhai enkawltu, lal mitillâk Saasgaz enkawlna hnuoia chun hung kîr a ta. Lal chu a chungah a lâwm naw a, a hminga a ko naw chun lal kuoma chun a kîr nâwk ta ngainaw ding a nih.

¹⁵Chuongchun, a naunu dinga ama enkawltu Mordekai pami Abihail naunu Esther ta dinga lal kuoma lût hun a hung tlung chun, iengkhawm a ngên naw a, nuhmeihai enkawltu, lal mitillâk Hegaiin a ruotpêkhai chau naw chu.

¹⁶Chun, a hmu taphawthai mithmuah Esther chun ditsakna a hlaw a. Chuongchun, a rorêl kum sarina. Tebeth thla, thla sâwmnaa chun, a lal inah, lal Ahasuer kuoma chun Esther chu ṭhuoi lût a ni ta a.

¹⁷Chuongchun, nuhmei danghai po po nêkin lal chun Esther chu a ditzâwng a, nunghâk po pohai nêk chun a mithmua chun lunginsietna le ditsak a hlaw nasa lem a; chuongchun, a lua chun lallukhum ân khumtir a, Vasti aia chun lalnuah a siem ta a.

¹⁸Chun, lal chun a lalhai le a siehlawhai po po ta dingin, ruoi ropuitak, Esther ruoiṭhe, chu a siem ta a, rambunghai ta dingin châwl a siem a, lal tiktlâina ang peiin lâwmmanhai khawm a pêk bawk a.

¹⁹Nunghâkhai an hung inkhâwm a vawihninaa chun Mordekai chu lal kul kawtkhâra chun a ṭhung a,

²⁰Esther chun a sûnghai le a hnam khawm a la hrillang naw a, Mordekai chun a khap leiin; ama a umpui lai ang bawk khan Esther chun Mordekai thu chu a awi si a.

²¹Chuong nihaia Mordekai chu lal in kawtkhâra a ṭhung lai chun, mi tillâk pahni, Bigthan le Teres, kawtkhâr vêngtuhai chu an lunginsen a, lal Ahasuer chunga kut thlâkna ding an zawng a.

²²Chu thil chu Mordekai chun a lo hriet a, ama chun lalnu Esther kuoma chun ân hriettir a; chuongchun, Esther chun Mordekaia hming chun lal chu a hril ta a.

²³Chuonga chu thu chu dâwpsuokna siem a hung ni chun, chuong ang ngei chu a ni ti hmusuok a ni ta a, anni chu thinga khai hlum an ni ve ve ta a; chun, lal hmaa chun lal chanchin ziekna bua chun ziek a ni nghe nghe a.