Read Hmar ESTHER 5 Bible Online

ESTHER 5 - Hmar bible

ESTHER 5

¹A ni thum ni chun, Esther chu a lal puonin ân thuom a, lal in zâwn tak, lal in tuollai sûnghnung lema chun a ngîr ta a; lal khawm chu in lûtna zâwn takah, lal ina lalṭhungphaa chun a ṭhung a.

²Chun, lalnu Esther chu tuollaia ngîr a hmu chun, a mithmua chun ditsakna a hlaw ta a; chuongchun, lal chun rângkachak hmawl a kuta a chawi chu Esther kuoma chun a lâk kâng ta a. Chuongchun, Esther chu a hung hnai a, rângkachak hmawl hmawr chu a them ta a.

³Chun, lal chun a kuomah, “Ieng am i dit a, lalnu Esther, ieng am a na i hni chu? Ram chenve rau khawm ni sien i kuoma pêk nîng a tih,” a ta.

⁴Esther chun, “Lal hin ṭha a ti zâwng a ni chun, a ta dinga thlaithlêng vawisûna ka buotsai hi, fa dingin lal le Haman chu hung raw hai se,” a ta.

⁵Lal chun, “Esther hril ang ngeia thaw a ni theina dingin Haman chu hung inhmâwtir ro,” a ta. Chuongchun, lal le Haman chu Estherin thlaithlêng a buotsaia chun an hung ta a.

⁶Chun, lal chun uoin dâwn huna chun Esther kuoma chun, “I hnina chu ieng am a na? I kuomah phal a ni ngei ding a nih, i ngên khawm chu ieng am a na? Ram chenve rau khawm ni sienla thaw nîng a tih,” a ta.

⁷Esther chun a dawn a, “Ka hnina le ka ngênna chu;

⁸lal mithmua hin ditsak tlâk ka ni a, ka hnina hi phal ding le ka ngênna hi thaw dinga lal ṭhati zâwng a ni chun, an ta dinga thlaithlêng ka buotsai dinga hin lal le Haman hi hung ngei raw hai se; chun, chu chu lalin a hril ta angin zînga hin hril ka tih,” tiin.

⁹Chu ni chun Haman chu lungril lâwmtak le hlimtak chun a fe suok ta a; nisienlakhawm, lal kul kawtkhâra chun ama ta dinga châng lova, a ngîr khawm lo ngîr lo Mordekai a hmu chun, Mordekai chungah nasatakin a lunginsen ta a.

¹⁰Nisienlakhawm, Haman chu ân sûm a, a inah a fe ta a; mi a tir a, a ruolhai le a nuhmei Zeres a ko ta a.

¹¹Chuongchun, Haman chun an kuoma chun, a hausaknahai ropuizie dâm, a nauhai tamzie dâm, lalin ama chu ân kaisângtirna thilhai po po dâm, lal siehlawhai le lalhai chunga ama a siechungzie dâm chu a hril ta a.

¹²Chu naw khawm chu, Haman chun, “Anih, lalnu Esther chun kei ti chau lo chu lal le thlaithlêng a buotsai awt dingin tukhawm a fiel ngai naw bawk a; chuongchun, zinga khawm hin kei chu lal leh fiel ka ni a.

¹³Anachu lal kul kawtkhâra Juda mi Mordekai ṭhunga ka hmu sûng phawt chu hieng thilhai po po hin a mi sukhawi chuong nawh,” a ta.

¹⁴Chun, a nuhmei Zeres le a ruolhai po po chun a kuomah, “Khaihlumna tawng sâwmngaa insâng inphuntir la, chun a zinga chun, chutaka chun Mordekai chu khai hlum ni raw se, tiin lal chu hril la; chuongchun, lal le chun thlaithlêng awtnaa chun hlimtakin um el la a ni el annâwm,” an ti a. Chun, chu thil chun Haman chu a suklâwm ta a; chun, khaihlumna chu ân phuntir ta a.