Read Hmar ESTHER 6 Bible Online

ESTHER 6 - Hmar bible

ESTHER 6

¹Chu zân chun lal chu a in thei ta naw a; lal chanchin hriet zing dinga ziekna lekhabu chu hung la dingin thu a pêk a; chuongchun, lal hmaa chun tiem an ni ta a.

²Lal Ahasuer chunga kut thlâkna zawngtuhai, kawtkhâr vêngtu, lal vêngtu pahni Teres le Bigthan chanchin chu Mordekaiin a hril a nih tia hmu suok a ni ta a.

³Chun, lal chun, “Hi hi ding hin Mordekai chunga chun ieng chawimawina le insângna am siem a ni ta a?” a ta. Chun, lal siehlaw, ama rawngbâwltuhai chun, “Ama ta dingin iengkhawm thaw a ni nawh,” an ta.

⁴Lal chun, “Tu am a na tuollaia um saw?” a ta. Chulaitak chun, Haman chu ama ta dinga a buotsai khaihlumnaa Mordekai chu khaihlum ding thu hril dingin, lal tuollai puo lema chun a hung lût a.

⁵Chun, lal siehlawhai chun a kuomah, “Ngai ta, Haman chu tuollaia saw a ngîr zing ie,” an ta. Lal chun, “Hung inlûttir ro,” a ta.

⁶Chuongchun, Haman chu a hung lût ta a. Chun, lal chun a kuomah, “Lalin chawimawi a nuom mi kuoma chun ieng anga thaw ding am nîng a ta?” a ta. Chuongchun, Haman chun a lungrilin, “Kei naw chu lal hin tu dang am chawimawi nuom a ta?” a ta.

⁷Chuongchun, Haman chun lal kuoma chun, “Lalin mi chawimawi a nuom chu,

⁸lalin a sil hlak lal puon le, lal chuongna hlak sakawr, a lua lallukhum khum chu hung lâk ni sienla;

⁹chun, ‘Lalin mi a chawimawi nuom chunga chun hienga thaw hi a ni ding a nih,’ tia, a hmaa khêk a, kawtthlêra chun sakawr chunga inchuongtir a, lalin chawimawi a nuom mi chu an inthuomtir vawng theina dingin lal mi ṭhatakhai laia pakhat kutah sakawr le silfên chu pêk ni raw se,” a ta.

¹⁰Chun, lal chun Haman kuoma chun, “Inhmaw la, i hril ang chun lal silfên le sakawr chu la la, lal kul kawtkhâr bula ṭhung, Juda mi Mordekai chunga chun va thaw rawh; i hril ang ta po po chu ienghawm kimlo um hlek lovin,” a ta.

¹¹Chuongchun, Haman chun lal silfên le sakawr chu a lâk a, Mordekai chu a thuom a, “Lalin mi a chawimawi nuom chunga chun hienga thaw hi a ni ding a nih,” tia khêk peiin, kawtthlêra chun ân chuongtir ta a.

¹²Chun, Mordekai chu lal kul kawtkhâra chun a hung nâwk a. Haman ruok chu a lu inkhumin, lungngaitakin a in tieng a fe ta a.

¹³Chun, Haman chun a nuhmei Zeres le a ruolhai po po kuoma chun a chunga thil hung tlunghai chu a hril nâwk ta a. A mi varhai le a nuhmei Zeres chun a kuomah, “Mordekai, a hmaa i tlûkna chu, Juda chia mi a ni hrim hrim chun, ama chu ngam naw ti ni, a hmaa chun tlu ngei lem i tih,” an ta.

¹⁴Chuonga ama an biek zing lai chun, lal vêngtuhai chu an hung a, Estherin a buotsai thlaithlêng awt ding chun Haman chu an ṭhuoi ta a.