Read Hmar ESTHER 7 Bible Online

ESTHER 7 - Hmar bible

ESTHER 7

¹Chuongchun, lal le Haman chu lalnu Estherin thlaithlêng a buotsai chu an awt ta a.

²Chun, uoin dâwn huna a ni hni ni chun lal chun Esther kuoma chun, “I hnina ieng am a na, lalnu Esther? Phalpêk ni ngei i tih, i ingên chu ieng am a na? Ram chenve rau khawm ni sienla thaw pei nîng a tih,” a ti nâwk a.

³Chun, lalnu Esther chun a dâwn a, “I mithmua hin ditsak tlâk ka na, aw lalpa, lal ṭhati zâwng a ni chun; ka ingêna hin ka chipuihai le, ka ihnia hin keima hringna ngei hi hla ni el raw se:

⁴sukchimit ding le, that ding le, sukbohmang ding sa, kei le ka chipuihai hi zawr kan ni ta si a. Amiruokchu, siehlawpahai, siehlawnuhai ding ang dâma zawr ni inlang chu, lal sietna ding chu hmêlma chun a thung zo naw ding khawma, ka to ṭawk ṭawk ding a na,” a ta.

⁵Chun, lal Ahasuer chun a biek a, lalnu Esther kuoma chun, “Chuong ang thil a lungrila thaw ngam chu khawlai am a um a? Ama chu tu am a na?” a ta.

⁶Esther chun, “Hmêlma le khingpui chu hi mi rilotak Haman hi a nih,” a ta. Chuongchun, Haman chu lal le lalnu hmaa chun a ṭi ta a.

⁷Chun, lal chu a lunginsen chun uoin dâwn lai chu a tho a, lal in huona chun a va fe ta a; chun, lalnu Esther kuoma a hringna ta dinga ngên dingin Haman khawm chu a ngîr ta a; a chunga chun thiltum ṭha nawtak lal chun a nei ti a hmu ta si a.

⁸Chun, lal chu lal in huona inthawk chun uoin dâwnna hmuna chun a hung kîr nâwk a; Esther umna ṭhungpha chunga chun Haman chu a bawkkhup a. Chun, lal chun, “Ina hin ka hmaa ngei khawm lalnu chu a sukpawrche ding a ni maw?” a ta. Lal baua inthawka thu a hung suok ta lei chun, Haman hmai chu an inkhum ta a.

⁹Chun, lal hmaa um hlak, mi tillâkhai laia mi pakhat Harbona chun, “Ngai ta, lal ta dinga thu ṭha hriltu Mordekai ta dinga khaihlumna tawng sâwmngaa insâng Hamanin a siem chu, Haman ina khun ân phun a nih,” a ta.

¹⁰Chun, lal chun, “Chutaka chun ama kha khai hlum ro,” a ta. Chuongchun, Mordekai ta dinga khaihlumna a buotsaia chun Haman chu an khai hlum ta a. Chun, lal lunginsen chu a hung dam ta a.