Read Hmar ESTHER 8 Bible Online

ESTHER 8 - Hmar bible

ESTHER 8

¹Chu ni chun lal Ahasuer chun Judahai hmêlmapa Haman in chu lalnu Esther kuoma chun a pêk ta a. Chun, Mordekai khawm chu lal hmaa chun a hung ta a; Esther chun ama chu a ieng am a ni chu a lo hril ta si a.

²Chun, lal chun Hamana inthawka a lâk, a kutsebi chu a lâk thlâk a, Mordekai kuoma chun a pêk ta a. Chun, Esther chun Haman in chu Mordekai chu ân enkawltir ta a.

³Chun, Esther chun lal kuoma chun thu a la hril nâwk a, a ke bulah a bawkkhup a, Agag mi Haman thil sukpawi le, Juda mihai chunga a thil phierrûkna rawt chu siehmang dingin mitthli pumin a ngên a.

⁴Chun, lal chun rângkachak hmawl chu Esther kuoma chun a lâk kâng a.

⁵Chuongchun, Esther chu a tho a, lal hmaa chun a ngîr ta a. Chun, ama chun, “Lal ṭha ti zâwng a na, a mithmua hin ditsakna ka chang a, hi thil hi lal kuomah indika ân lang chun, le a mit ka tlung chun, Agag mi Hammedatha naupa Hamanin Juda mi lal rambung po poa umhai sukbohmangna dinga a ziek lekhathawnhai chu sukdanglam dinga ziek ni raw se:

⁶ka chipuihai chunga chuong thil ṭha naw hung tlung ding chu iengtin am tuor thei ka ta? Annawleh, ka chi le kuonghai suksieta an umna chu ka en ngam ding am a nih?” a ta.

⁷Chun, lal Ahasuer chun lalnu Esther kuoma le Mordekai Juda mi kuoma chun, “Ngai ta u, Haman in hi Esther kuoma chun ka pêk ta a, ama chu khaihlumnaa chun an khai hlum ta bawk a; Juda mihai chunga a kut ân let leiin.

⁸Chuongchun, ṭha in ti angin, lal hmingin Judahai kuoma chun lekha ziek unla, lal kutsebi hin nam ro; lal hminga lekha ziek a, lal kutsebia nam chu, tukhawma an sukdanglam thei âwm si naw a,” a ta.

⁹Chuongchun, chu huna chun, thla thumna, Sivan thla, chu thla ni sâwmhni pathum ni chun lal lekhaziektuhai chu koin an um ta a; chuongchun, Mordekaiin Juda mihai kuoma thu a pêk ang po poin, rambung za sâwmhni pasari, Indiaa inthawka Ethiopia chena rambunga lalhai, rorêltuhai le ram awptuhai kuoma chun, rambung tin kuoma chutaka ziek ang peiin, chi tinhai kuomah an ṭawng ang peiin. Juda mihai kuomah an ṭawng ang pei le an ziek dân ang peiin, ziek a hung ni ta a.

¹⁰Chun, ama chun lal Ahasuer hmingin a ziek a, lal kutsebi chun a nam a, lal sinthawnaa hmang hlak sakawr hrât mi sakawr sâwizawi chunga chuongin, sakawr chungah lekhathawnhai chu dâkah a thawn ta a;

¹¹chutaka chun lal chun Juda mihai khaw tina umhai chu inkei khâwma, lo invêng him dingin a ti a. Khâwlai rambung le mihai thilthawtheina khawm, anni sukse tumtuhai po po chu, lo thaw ve a, an nau le têhai le an nuhmeihai khawm lo sukbohmang ding le, that ding le sukchimit dingin le, annia inthawka râllâk sumhai khawm lo la ve el dingin a phalpêk a.

¹²Lal Ahasuer rambung po poah ni khat sûng, Adar thla, thla sâwm pahnina, ni sâwmpathum ni sûng chun chu;

¹³Judahai chu an hmêlmahai chunga an phuba la ve dingin chu ni chun an inzosa zing ding a nih ti le, rambung tina thupêk pêk suok dinga ziek, zieksâwng chu chi tinhai kuoma chun ziek suok vawng a ni ta a.

¹⁴Chuongchun, dâk phur mihai, lal sinthawnaa hmang hlak sakawr hrâthai chunga chuonghai chu, lal thupêk inawr zing chun inhmawtakin an fe suok ta a; thupêk chu Susa khawpuia inthawka pêk a nih.

¹⁵Chun, Mordekai chu lal puon dumpâwl zai inhmi leh, rângkachak lallukhum ropuitak leh, lal silfên dumpâwl le vâra inthuomin lal hmaihmaa chu a fe suok ta a; chuongchun, Susa khawpui chu lâwmin a khêk ta a.

¹⁶Chun, Judahai khawm chun var le lâwmna le hlimna le chawimawina chu an chang ta bawk a.

¹⁷Chun, rambung tin le khaw tinah, lal thupêk a tlungna taphawta chun, Judahai chun lâwmna le hlimna an nei a, ni ṭha le ruoiṭhena dâm an nei ta bawk a. Chun, chu rama chi tamtakhai laia mi chu Juda an hung ni ve ta a; an chunga chun Juda mihai ṭitna chu a tlung ta si a.