Read Hmar ESTHER 9 Bible Online

ESTHER 9 - Hmar bible

ESTHER 9

¹Chun, thla sâwmpahnina, Adar thlaa ni sâwmpathum nia, lal thupêk le a thu sukthlûk chu thaw ding ni a hung hnai chun, chuong nia Juda hmêlmahaiin an chunga ro nei an beisei huna chun; a naw zâwngin a hung um ta thut a, Judahai chun anni theidatuhai chunga chun ro an nei lem ta a;

²anni suknat tumtuhai chunga kut thlâk dingin, lal Ahasuer rambung po poa chun Judahai chu an khawpuihaia chun an inko khâwm tâwl a; tukhawma an dang zo si naw a, anni ṭitna chu hnam po pohai chunga chun a tlung ta si a.

³Chun, rambunghaia lalhai le, ram awptuhai le, rorêltuhai le lal sin thawtuhai chun Judahai chu an ṭhangpui a; Mordekai ṭina chu an chunga chun a um tlat ta leiin.

⁴Mordekai chu lal ina chun ropuitak a ni si a, a chanchin chu rambung po poa chun ân thang a; chu Mordekai chu a hung inṭhang lien tiel tiel el si a.

⁵Chuongchun, Judahai chun an hmêlmahai po po chu kâwlhnâma sâtin an sât hlum tâwl a, suksietna le thatnain anni theidatuhaiin an chunga an thaw ding ang tak chun an thaw ta a.

⁶Lal khawpui Susaa ngei khawm Judahai chun mi za nga an sukbohmang a.

⁷Chun, Parsandatha, Dalphon, Aspatha;

⁸Poratha, Adalia, Aridatha;

⁹Parmasta, Arisai, Aridai le Vaizatha hai;

¹⁰Judahai hmêlma Hammedatha naupa Haman naupasal sâwmhai khawm chu an that a; amiruokchu, râllâk suma ruok chun an kut an rawl naw a.

¹¹Chu ni chun Susa khawpuia thata umhai nizât chu lal kuoma chun hung lâk a na.

¹²Chun, lal chun lalnu Esther kuoma chun, “Judahai chun Susa khawpuia hin mi za nga le Haman naupasalhai sâwm an thatin an sukbohmang ta a nih; lal rambung danghaia chun ieng ang khieuin am an thaw ding chu. Tuhin i hnina chu ieng am a na? Phalpêk ning i tih; annawleh, ieng am a na i la hni rawp ding? Thaw ni bawk a tih,” a ta.

¹³Chun, Esther chun, “Lal ṭha ti zâwng a ni chun, vawisûna thupêk ang bawk hin, Susaa Juda umhai chu zinga khawm thaw dinga phal ni hai sienla, Haman naupasal sâwmhai chu khaihlumnahaia chun khai kâng ni raw hai se,” a ta.

¹⁴Chun, lal chun chuong anga thaw ding chun thu a pêk a, Susaa inthawk chun thupêk chu pêk suok a ni ta a; chuongchun, Haman naupasal sâwmhai chu an khâi kâng ta a.

¹⁵Chun, Adar thla ni sâwmpali ni khawm chun Susaa Juda mi umhai chu an inkei khâwm a, Susaa chun mi za thum an that a; nisienlakhawm, râllâk suma ruok chun an kut an rawl naw a.

¹⁶Chun, lal rambung danga Juda umhai khawm chu anni le anni chu an inkei khâwm tâwl a, an hringna sanin an ngîr a, an hmêlmahaia inthawk chun râlmuongin an um a, anni theidâtuhai sîng sari le sâng nga an that a; amiruokchu, annia râllâk sum chu an lâk naw a.

¹⁷Adar thla ni sâwmpathum ni chun hi hi thaw a ni ta a; chun, chu thla ma ni sâwmpali ni chun an châwl a, lâwmna le ruoiṭhena niin an hmang a.

¹⁸Amiruokchu, Susaa Juda mi umhai chu, chu thla ni sâwmpathum ni le sâwmpali ni khawm chun an inkhâwm a; chu thla ma ni sâwmpanga ni chun an châwl a, lâwmna le ruoiṭhena niin an hmang a.

¹⁹Chuleiin, khaw kul neilova umhai Juda khuoa mihai chun Adar thlaa ni sâwmpali ni chu lâwmna le ruoiṭhena le, ni ṭhaa le, thilpêk inthawn niah an hmang ta a.

²⁰Chun, Mordekai chun hieng thilhai hi a ziek a, lal Ahasuer rambung po poa Juda um po pohai kuomah, a hla le hnaia khawm,

²¹Adar thla ni sâwmpali ni le ni sâwmpanga ni hi kum tinin inser dinga sukdet dingin lekhathawnhai ân phur ta a;

²²chuong nihaia chun Juda mihai chun an hmêlmahaia inthawka châwl an neina nihai a ni lei le, chu thla chu an ta dinga lungngaina lâwmnaa inchangna le ṭapna ni ṭhaa inchangna thla a ni leiin: hlimna le ruoiṭhena ni, chanvohai inphurtuona ni le, mi pasiehai kuoma thilpêkhai pêkna nihaiah an nei ding thu a pêk a.

²³Chuongchun, Juda mihai chun, Mordekaiin an kuoma a ziek ang ngei le, an lo ṭan ta ang chun thaw dingin an nei ta a;

²⁴Agag mi Hammedatha naupa Haman, Judahai po po hmêlmapa chun, anni sukbohmang dingin a lo phierrûk a, anni sukbohmanga sukchimit dingin Pur, chu chu ṭhum vâwr a nih, a lo vâwr ta a;

²⁵amiruokchu, chu thil chu lal kuom a hung tlung chun, a dawhâ ṭha lotak, Judahai chunga dawhâ a nei chu, ama lu chung ngeiah a tla lem ding a nih tiin lekha ziekin thu a pêk a, ama le a naupasalhai ngei khawm chu khaihlumnahaia chun khai kâng an ni ding a nih, tiin.

²⁶Chuleiin, hieng nihai hi Pur hming chawi chun Purim an lo inbûk ta a. Chuleiin, chu lekha thuziek po po lei le, chu chungthua an ihmu ta ang lei le, an chunga thil hung tlungna lei chun,

²⁷Judahai chun, anni le an thlahai le anni hung sûngkhattuhai po po chunga chun belin, an namdet ta a; kum tinin chutaka a ni ruot ang tak le, chutaka ziek ang taka chu ni hnihai chu insera bâwpel ngai hlek lo dingin;

²⁸khaw tina le rambung tina le sûngkaw tinah, suon po po chenin hi nihai hi hriet zinga inser ding a na; hieng Purim nihai hi Juda mihai laia chun bâwpel a ni ngai ding a ni naw a, an thlahai laia chun hriet zing an nina hi a bohmang bawk naw ding a nih.

²⁹Chun, Abihail naunu, lalnu Esther le Juda mi Mordekai chun hi Purim lekha pahnina hi sukdet dingin thuneitakin an ziek ta a.

³⁰Chun, Juda mi po pohai kuomah, Ahasuer lalram, rambung za sâwmhni pasaria chun, thudik le thlamuonna thuhai le chun lekhathawnhai chu a thawn ta a;

³¹Juda mi Mordekai le lalnu Estherin anni an ruotpêk ang le, an ṭap khêk râwl le an bungheina chungthua an thlahai le anni ta dinga an ruotpêk ang ngeia, hieng Purim nihai hi a hun ruothaia sukdet dingin.

³²Chun, Esther thupêk chun hi Purim chungthu hi a sukdet a; lekhabua chun ziek a ni ta a.