Read Hmar FESUOKNA 10 Bible Online

FESUOKNA 10 - Hmar bible

FESUOKNA 10

¹LALPA chun Mosie kuomah, “Pharao kuomah va lût la, hieng ka inchiknahai hi anni lai ngeia kân entir theina dingin a siehlawhai le ama lungril ngei khawm chu ka sukngar tah a nih;

²anni lai ngeia inchikna ka thawhai le, Aigupta mihai chu ieng angin am an chungah thil ka thawa ti i naupa le i tupa hrieta ngei khawm i hril theina dingin le; LALPA chu ka ni ngei ti i hriet theina dingin, ti rawh,” a ti a.

³Chun, Mosie le Aron chu Pharao kuomah an va lût a, a kuomah, “Hebraihai Pathien LALPA chun hieng hin a tih: ‘Ka hmaa insiehnuoi ieng chen am i nuom naw ding a ni a? Ka rawng an bâwl theina dingin ka mihai chu infetir rawh.

⁴Ka mihai în fetir phal naw chun, ngai rawh, i ram sûngah, zinga leh khâuhai hung ṭhuoi ka ta;

⁵hnuoi chung po po chu a dâpin hung dâp an ta, hnuoi chu mi hmu theilo khawp hielin um a tih. Riel isuksietnaa i la chang a mahla la umhai chu fa vawng an ta, i ta dinga loa thing mâwng tinrênghai khawm chu fa vawng bawk an tih.

⁶I inhai le i siehlaw po po inhai le Aigupta mi po po inhai chu sip vawng an ta, i pahai le i thlatuhai khawmin, hi hnuoi chunga an uma inthawk vawisûn ni chen hin chuong ang chu an la hmu ngai nawh,’ a tih,” an ti a. Chun Mosie chu ân her a, Pharao kuoma inthawk chun a fe suok ta a.

⁷Chun, Pharao siehlawhai chun a kuomah, “Hi mipa hi ei ta dingin ieng chen am châng a ni ding a ni leh? An Pathien LALPA chu a rawng an bâwlpêk theina dingin mihai chu infetir ta la: Aigupta hi suksiet vawng a ni tah ti hi i la hriet naw rawp am a nih?” an ti a.

⁸Chun, Mosie le Aron chu Pharao kuomah an hung ṭhuoi nâwk a, ama chun an kuomah, “Fe unla, in Pathien LALPA rawng chu va bâwl ro le; amiruokchu, a fe ding chu tu tuhai am an ni a?” a lo ti a.

⁹Mosie chun, “LALPA ruoiṭhe hmang ding kan ni leiin, kan naupanghai, kan tarhai leh, kan naupasalhai, kan naunuhmeihai leh, kan bâwng ruolhai, kan berâm ruolhai leh fêng kan tih,” a ti a.

¹⁰Pharao chun, “LALPA chu in kuomah um raw se; nangni le in nauhai leh chu kân fetir tâk cheu leh! Lungrilah thiltum ṭhanaw tak innei ti a chieng annâwm.

¹¹Chuong chu ni thei naw nih, mi puitling bak va fe unla, LALPA rawng chu va bâwl ro: chu chu in nuomtak a ni si a,” a ta. Chun, Pharao hmaa inthawk chun hnawtsuokin an um ta a.

¹²Chun, LALPAIN Mosie kuomah, “Khâuhai hungna dingin Aigupta ram chungah i bân phar rawh; Aigupta rama an hung a, a rama hna hring tinrêng, rielin a suksiet mahla chu an fâk vawngna dingin,” a ti a.

¹³Chuongchun, Mosie chun Aigupta ram chunga chun a hmawl chu ân let ta a; chun, LALPA chun chu ni sûnnithlâk le zânkhawvârin ram chunga chun sak thli ân hrângtir a; chun, zîngtieng a hung ni chun, sak thli chun khâuhai chu a hung lên ta a.

¹⁴Khâuhai chu Aigupta ram po po chunga chun an hung a, Aigupta ram sûng po poa chun an um khup el ta a; a râpthlâk bêk a, anni hma hin anni ang hrim hin khau an la um ngai naw a, anni hnunga khawm um ngai ta bawk nawng an tih.

¹⁵A ram pumpui chu an dâp khup el si a, ram chu ân thim khup el bawk a; rama hna hring tinrêng le, thing rahai, riel ihlahai chu an fâk ta ngei a; Aigupta ram pumpuia chun loa thlaihna, thing le thil a hring hrim a um ta dêr naw a.

¹⁶Chun Pharao chun Mosie le Aron chu inhmawtakin a ko a, “Nang le in Pathien LALPA chunga chun thil ka suksuol tah a nih.

¹⁷Tuhin ka ngên che hi, ka suol hi vawikhat bak mi ngaidam nâwk phawt la, hi thina hi keimaa inthawka a lâkhmang theina dingin LALPA chu mi hnipêk rawh,” a ti a.

¹⁸Pharao kuoma inthawk chu a fe suok a, LALPA chu a hni ta a.

¹⁹LALPA chun khâuhai po po chu lêna, Tuipui Sena khal lût vawngtu, thlang tieng thli hrâttak el chu ân hrângtir ta a, Aigupta ram po poa chun khâu pakhat khawm a um ta naw a.

²⁰Nisienlakhawm, LALPA chun Pharao lungril chu a sukngar a, Israel mihai chu ân fetir chuong nawh.

²¹LALPA chun Mosie kuomah, “Aigupta ram chunga inthimna, inmaia inmaina khawp hielin inthimna a hung um theina dingin i bân phar rawh,” a ti a.

²²Chun, Mosie chun vân tieng a bân a phar a; chuongchun, ni thum sûng chu Aigupta ram sûng po poa chun inthim sa mup el chu a um ta a;

²³chu ni thum sûng chun tukhawm an hmuna inthawkin an suok naw a, inhmu khawm an inhmutuo thei bawk nawh; Israel mihai umnahaia ruok chun var an nei seng a.

²⁴Chun, Pharao chun Mosie a ko a, “Fe unla, LALPA rawng chu va bâwl ro; in nauhai khawm in ruolin fe ve hai sienla, in berâm ruolhai le in bâwng ruolhai ruok chu mâksan ro,” a ti a.

²⁵Mosie ruok chun, “Kan Pathien LALPA kuoma kan inthâwi theina dingin, pumrawhmang thilinhlân dinghai le inthâwina dinghai chu kan kutah i mi pêk ding a nih.

²⁶Kan ran ruolhai khawm keini leh an fe ve ding a nih, ran tê pakhat khawm mâksan an ni ding a ni naw a; kan Pathien LALPA rawng kan bâwlna dingin kan ṭhuoi ve ngei ding a nih; a hmun kan tlung hmakhat chu ieng hmangin am LALPA rawng chu kan bâwl ding a nih ti kan hriet si naw a,” a ti a.

²⁷Nisienlakhawm, Pharao lungril chu LALPAIN a sukngar a, anni chu ân fetir chuong naw a.

²⁸Pharao chun a kuomah, “Ka kuoma inthawkin fe hmang la, ka hmêl hrim hrim hung hmu nâwk ta lo dingin fîmkhur rawh, ka hmêl i hmu nâwk ni ni chun i thi ngei ding a ni si a,” a ti a.

²⁹Mosie chun, “I ti ṭha ngawt el ie, i hmêl hmu nâwk hrim hrim ta naw ning,” a ti a.