Read Hmar FESUOKNA 12 Bible Online

FESUOKNA 12 - Hmar bible

FESUOKNA 12

¹Aigupta rama chun LALPAIN Mosie le Aron kuoma chun a hril a,

²“Hi thla hi in ta dingin thla inṭanna nîng a ta, in ta dingin kum khata thla hmasatak ning a tih.

³Israel mi inkhâwmhai po po lai chun hril unla, ‘hi thla ni sâwm ni tak hin, mi tinin an pahnamhai ang peiin berâmte pakhat, sûng khat ta dingin berâmte pakhat la seng raw hai se:

⁴chun, sûng khat chu berâmte pakhat fâ sêng lo khawpa tlâwm an ni chun an tuolbâwm hnaitak leh inkawpin berâmte pakhat, a fa ding mi tamzie ang peiin insem an tih.

⁵In berâmte chu a chal kum khat mi, demkailo a ni ding a nih, kêl ruol laia inthawkin, annawleh, berâm ruol laia inthawkin la tum in tih,

⁶chu thla ni sâwmpali chen chun kawl in tih: Israel mi pungkhâwmhai po po chun zântieng chun that in tih.

⁷Chun, a thisen chu lâng an ta, an fâkna ding in kawtkhâr bieng ve ve le kawtkhâr lu khang pheiah nâl an tih.

⁸Chu zân chun a sa chu meia rawin, chawl ṭhanglo bei leh fâng an ta; hlohna kha leh fâng an tih.

⁹A selin amanih, tuia suongin amanih fa naw unla, em hmin lem ro; a lu le a kehai le a sûnghai le chun.

¹⁰Zîngkâr chena dingin a iengkhawm in hla ding a ni nawh; zîngkâr chena um zing taphawt chu meiin raw hmang in tih.

¹¹Chun, hieng ang hin fâng in tih: in dier kei sa zingin, in kekawk bun sa zingin le, in kuta in hmawl chawi sa zingin, inhmâwtakin in fâk ding a nih. LALPA Fekân Ruoiṭhe a nih.

¹²Chu zân chun Aigupta ram fe thleng ka ta, ran le mihriem khawm, Aigupta rama nau lutîr po po chu ka sukhlum ding a ni si a; chun, Aigupta mihai pathienhai chunga khawm rorêlnahai intlungtir bawk ka tih, LALPA chu ka ni hi!

¹³Chun, thisen chu in ta dingin in umna inhai inchikna nîng a ta; thisen chu ka hmu pha chun, nangni chu fekân ka ti cheu a, Aigupta ram ka hung hrem lai khawm chun, nangni sukbohmang ding cheuin in chungah hri hrim hrim um naw nih.

¹⁴Hi ni hi in ta dingin hrietzingna nîng a ta, LALPA kuomah ruoiṭhena nei hlak in tih: in thlahai chenin, kumkhuoin dân angin hi ruoiṭhena hi nei zing in tih.

¹⁵Ni sari sûng chu chawl ṭhanglo bei in fâk ding a na, ni khat nia inthawk khawmin in inhaia inthawkin chawl sie hmang vawng in ta; ni khat nia inthawka ni sari ni chen chun mi tukhawmin chawl ṭhang bei a fâk chun, chu mi chu Israel mihaia inthawka tuithlâr a ni ding a ni si a.

¹⁶Ni khat ni chun in ta dingin inkhâwmpui inthieng um a ta, ni sari ni khawmin inkhâwmpui inthieng um bawk a tih; chuong nihaia chun sin iengkhawm in thaw ding a ni nawh, mi tinin fâk rawngbâwl ruok chu thaw thei in tih.

¹⁷Chawl ṭhanglo bei ruoiṭhe chu inser in ta, chu ni la la chun in mihai chu Aigupta rama inthawkin ka ṭhuoi suok a ni si a; chuleiin, kumkhaw dâna neiin, hi ni hi in thlahai chenin inser in tih.

¹⁸Thla hmasatakah, chu thla ni sâwmpali ni zântiengah chawl ṭhanglo bei in fâk ding a nih, chu thla ma ni sâwmhni pakhat ni zântieng chenin.

¹⁹Ni sari sûng chu chawl hrim hrim in inhaiah hmu a ni ding a ni nawh: mi tukhawm chawl ṭhang bei fatu chu, mikhuol khawm, a rama pieng khawm, chu mi chu Israel mipuihai laia inthawka tuithlâr nîng a tih.

²⁰Chawl ṭhang hrim hrim chu iengkhawm in fâk ding a ni nawh; in umna taphawthaia chun chawl ṭhanglo bei in fâk ding a nih,’ tiin hril rawh,” tiin.

²¹Chun Mosie chun Israel upahai po po chu a ko khâwm a, an kuomah, “Fe suok unla, in sûngkaw tamzie ang peiin berâmte la unla, fekân ruoi dingin that ro.

²²Hussop bâwr la unla, thlênga thisena chun inchie unla, chu thlênga thisen chun kawtkhâr bieng pahnihai le kawtkhâr lu chung khangphei chu nâl ro: chun, zîngkâr a ni hmakhat chu tukhawm a in kawtkhâra chun suok hlek naw raw se.

²³Aigupta mihai chu hrem dingin LALPA chu a fe thleng ding a ni si a; chun, kawtkhâr bieng pahni le kawtkhâr lu chung khangpheia thisen chu a hmu chun, LALPA chun kawtkhâr chu fe kân a ta, in inhaia chun nangni sukhlum ding cheuin sukbohmangtu chu inhungtir naw nih.

²⁴Hi thil hi dâna neiin nangni le in thlahai chenin kumkhuoin inser in tih.

²⁵Chun, a thutiem anga, LALPAIN ram a pêk ding cheu in tlung pha khawm, hi ser le sâng dânhai hi in sunzawm zing ding a nih.

²⁶Chun, in nauhaiin, ‘Hi rawngbâwlna hi a umzie ieng am a na?’ an ti pha cheu chun,

²⁷‘Aigupta mihai a sukhlum a, ei inhai a sanhim laia, Aigupta rama Israel mihai inhai fekântu, LALPA Fekân inthawina chu a nih,’ tîng in tih,” a ti a. Mipui chun an lu an suk a, chibai an bûk ta a.

²⁸Chun, Israel mihai chu an fe a, LALPAIN Mosie le Aron thu a pêk ang ngei chun an thaw ta a.

²⁹Zânril lai takah LALPA chun Aigupta rama nau lutîr po po, Pharao nau lutîr a lalṭhungphaa ṭhunga inthawka sal lung ina intâng nau lutîr chen le, ran ruol tê hmasatakhai chen chun a hung sukhlum ta vawng a.

³⁰Zâna chun Pharao le a siehlawhai le Aigupta mi po pohai chu an tho a, Aiguptaa chun ṭap nasatak el chu a um ta a: in tin el chu mithi um nawna hrim a um si naw a.

³¹Azân azânin Mosie le Aron chu a ko a, “Tho unla, Israel mihai le chun ka mihaia inthawkin fe hmang dai ro; chuongchun, fe unla, in ti ta angin LALPA rawng chu va bâwl ro.

³²In ti ta angin in bâwng ruolhai le in berâm ruolhai chu ṭhuoi unla, fe vak ro khai; chun, kei khawm mal mi sâwmpêk bawk unla,” a ti a.

³³Aigupta mihai chun Israel mihai chu inhmâwtaka suok dingin an nawr sek sek a, “Ei thi zo vawng ding an ta hi,” an ti leiin.

³⁴Chuongchun, Israel mihai chu an bei hmetna thlênghai chu puona tuoma an liengkohaia putin an beihai chu chawl phul hmain an châwi ta a.

³⁵Israel mihai chun Mosie thu ang pei chun an thaw a; Aigupta mihai chu silfên le, rângkachak le tangkaraw incheinahai an hni tâwl a;

³⁶chuongchun, LALPAIN Israel mihai chu Aigupta mihai mithmua chun ditsakna ân hmutir a, an hni taphawt chu an pêk pei el a. Chuong ang chun Aigupta mihai chu an suksiet ta a.

³⁷Israel mihai, naupangnawi tiem loa puitling ruok khawm nuoi ruk lai chu Ramesesa inthawkin Sukkoth chen kein an fe ta a.

³⁸Mi chilak tamtak khawm anni leh an hang fe ve a; bâwng ruol le berâm ruol le ran ruol tamtak leh.

³⁹Aiguptaa inthawka beihlawm an hung chawihai chu chawl ṭhanglo beiphêkhaiah an zeu a, chawl ṭhanglo a ni hrim a; Aiguptaa inthawk a nama nam suok el an ni leiin le an muong thei ta naw leiin fâk ding iengkhawm an inbuotsai si naw a.

⁴⁰Israel mihai thang sûng, Aiguptaa an thang sûng chu kum za li sawmthum a nih.

⁴¹Kum za li le sawmthum tâwpah, chu ni la la chun LALPA mipuihai chu Aigupta rama inthawkin an fe suok ta a.

⁴²Aigupta rama inthawka ṭhuoi suok dinga LALPAIN a vêng tlat zân chu a nih: chu zân chu a nih Israel mihaiin an thlahai nâwksâwng chen khawma LALPA ta dinga an inser tlat ding chu.

⁴³LALPA chun Mosie le Aron kuomah, “Fekân Ruoi dân ding chu hi hi a nih: ram dang mi chun a fâk ve ding a ni nawh:

⁴⁴amiruokchu, siehlaw tukhawm tangka suma inchâwk tah, ama chu sertanpêk tah a ni bawk chun fa vêng a tih.

⁴⁵Khuolchâm amanih, inhlawfa siehlaw tukhawmin chu chu fa thei naw nih.

⁴⁶In pakhata fâk ding a ni a, a sa a iengkhawm tuolah in chawi dawk ding a ni nawh, a ru khawm in suktliek hlek ding a ni nawh.

⁴⁷Israel mipuihai chun hi hi an zâwm tlat ding a nih.

⁴⁸Hnam dang mi nang le fe ve a um a, LALPA kuoma Fekân Ruoi a hmang ve ding chun, pasalhai po chu an ser intantir la, chun, hung hnai sienla, hmang raw se: chun ama chu chu rama pieng ang bawk chu nîng a tih, a ram mi hrim ang nîng a tih. Sertanlo mi ruok chun, chu chu a fâk ding a ni nawh.

⁴⁹A ram mi hrim le hnam dang mi nangni laia khuolchâm ta ding khawmin dân pakhat chau a um,” a ti a.

⁵⁰Hieng ang hin Israel mihai po po chun an thaw a; LALPAIN Mosie le Aron thu a pêk ang ngeiin an thaw a.

⁵¹Chu ni ngei chun LALPA chun Israel mihai chu an pâwl ruol ang peiin Aigupta rama inthawk a ṭhuoi suok ta a.