Read Hmar FESUOKNA 13 Bible Online

FESUOKNA 13 - Hmar bible

FESUOKNA 13

¹Chun LALPA chun Mosie kuomah a hril a,

²“Israel mihai laia nau lutîr sul hung kêu taphawt, mihriem khawm, ran khawm ka kuomah hung inhlân vawng rawh: ka ta a nih,” tiin.

³Mosie chun mipui kuoma chun, “Suoka in umna Aiguptaa inthawk in hung suok ni kha hre zing ro: LALPAIN kut thahrâtin chu hmuna inthawk chu a hung ṭhuoi suok cheu a ni kha; chawl ṭhang bei hrim fâk a ni ding a ni nawh.

⁴Abib thla, hi ni hin in fe suok a ni hi.

⁵LALPAIN Kanaan mihai, Hit mihai, Amor mihai, Hiv mihai le Jebus mihai ram, in thlatuhai kuoma pêk ding cheua a itiem, khuoizu le nênetuia luong rama a ṭhuoi lût pha cheu chun hi thlaa bawk hin hi rawngbâwlna hunbi hi in hmang ding a nih.

⁶Ni sari sûng chawl ṭhanglo bei fâng in ta, a ni sari ni chun LALPA kuomah ruoi ṭhêng in tih.

⁷Ni sari sûng chu chawl ṭhanglo bei fâk ding a ni a; chun, in kuoma hrim hrim chawl ṭhang bei hmu a ni ding a ni naw a, in ram sûng po po le nangni kuoma khawm chawl hrim hrim hmu a ni ding a ni nawh.

⁸Chu ni chun i naupa kuomah, ‘Aiguptaa inthawka ka hung suok laia LALPA thil mi thawpêk ta leia thaw a nih,’ tiin hril i tih.

⁹Chun, LALPA Dân chu i baua a um theina dingin, i mithai kâra hriet zingna ding le, i kuthai chunga nangma ta dinga inchikna dingin nîng a tih; LALPA chun kut thahrâtin Aiguptaa inthawkin a ṭhuoi suok ta si che a.

¹⁰Chuleiin, kum tinin hi hi a hun peiah dân angin i hmang ding a nih.”

¹¹Chun i thlatuhai le nanga kuoma a tiem ta anga Kanaan mihai ramah LALPAIN a ṭhuoi lût che a, ram chu a pêk pha che chun,

¹²sul hung kêu hmasatak taphawt chu LALPA ta bîk dingin sie tum i tih. I ran nei tê a pieng hmasatak po po a chal taphawt chu LALPA ta nîng a tih.

¹³Sabengtung tê hmasatak chu berâmtein intlan i tih; în tlan naw ding chun a rîng chu her bawng i tih. I naupasalhai lai khawm nau lutîr po po chu intlan i tih.

¹⁴Chun, nakie hun la hung tlung dinga khawm i naupain, Hi hi a umzie ieng am a na? tia ân dawn che chun, a kuomah hieng hin hril i tih, “Suoka umna ram Aiguptaa inthawk LALPAIN kut thahrâtin a mi ṭhuoi suok ta a.

¹⁵Pharao chun lulul suoin mîn suoktir naw ṭâl sien khawm, LALPA chun Aigupta rama nau lutîr po po: mihriem le ran tê a pieng hmasa tak po po chu a sukhlum ta vawng a. Chuleiin, sul hung kêutu hmasa tak a chal taphawt chu LALPA kuomah kân hlân a, ka naupasalhai nau lutîr taphawt ruok chu ân tlanin kân tlan a nih.

¹⁶Chun, i mithai kâra thilkhim ding le i kut chunga inchikna dingin nîng a tih; LALPA chun kut thahrât chun Aigupta rama inthawkin a ṭhuoi suok ta si che a, tiin, ” a ti a.

¹⁷Pharaoin mipui chu ân suoktir phing chun, Pathienin, “An fenaa hin indona an va hmu pha mipui chu insîr an ta, Aiguptaa chun kîr nâwk rawi an tih,” a ti leiin a lam chu hnai sien khawm Philistin mihai ram fe thlengna lam tieng chun Pathienin anni chu a ṭhuoi naw a.

¹⁸Tuipui sen tieng, thlalêr tienga lam inhêl zâwng chun mipui chu Pathienin a ṭhuoi ta lem a, Israel mihai chu râlthuom kim leh Aigupta rama inthawk chun an suok ta a.

¹⁹Mosie chun Josef ruhai chu a chawi pei a, Israel mihai chu, “Pathienin hung kan ngei ngei a ti cheu a, chun in fena taphawtah ka ru khawm sawm pei in tih,” tiin a lo tiem ta hrim a.

²⁰Sukkotha inthawkin an fe suok a, thlalêr sîr Ethama chun bûk an khuor ta a.

²¹Zâna le sûna khawm an fe theina dingin, LALPA chu sûnah sûm ngîrin an hma ṭhuoi dingin le zânah mei ngîrin anni var pe dingin, an hmaah a fe pei a;

²²sûna sûm ngîr le zâna mei ngîr chu mipui hmaa inthawk chun ân kieng ngai hrim hrim nawh.